【在還沒認識妳之前，我已經在夢境裏遇過妳】《愛情尋夢人》: 【第二章】續夢（6/4）
「佢一直都鐘意林泳兒，但又覺得佢好似對你有啲意思咁。」陳大威罕見地認真。
「我覺得佢諗多咗姐......」
「唔係，其實林泳兒好少會主動邀請人。」陳大威托了托眼鏡。
單純這樣的一個行爲就能解讀爲喜歡一個人嗎？我也看不清那叫敏感，抑或是觀察敏銳。
「如果你哋係咁認爲嘅話，我唔去啦。」我說：「你叫佢加油。」
只見陳大威看了我一眼，沉默了一會兒然後點了點頭。
回去班房的途中，我恰巧遇到了穿着同校校服的 Peter，他一發現我的存在，便皺着眉頭快步往我這個方向跑來。
「搞咩。」他不會是又有感情煩惱吧......？
「我啱先喺樓上圖書館見到啲唔應該見到嘅嘢......」他垂頭喪氣地說。
「圖書館可以見到啲乜......」
「你應該知陶海敏同人拍拖啦下話......」Peter 見我點了點頭，又說：「佢哋兩個啱啱喺圖書館......」
Peter 在說此話的時候把右手五指合在一起尖狀往自己臉龐一碰，然後露出更失望的神情。
「咁誇張咩。」我想了想，又輕笑道：「不過都唔關我哋事啦。」
「唉，你唔會明我嘅感受。」他竟然又這樣說。
十一月的深秋，掠過的風變得凜冽，枯葉漸漸掉落，眾人似乎都有着感情煩惱。
我沒等到放學的鐘聲響起便收拾揹包準備離開，但正當我踏出校門之際，不遠處卻吹來了一陣香氣......
我仔細一看，只見李采樺拿着個食物盒往課室走來，食物盒裏的目測是個朱古力蛋糕。
可同時間，我的腦門又頓時如被針刺般來了一陣劇痛......
「咦！」她笑着走來，說：「唔好走住！」
「做咩？」她快步走來，我的心跳也因此加速。
「試唔試下我整嘅蛋糕呀~？」她嫣然一笑，那雙酒窩讓我的目光有點難以移開。
「我先十七歲......唔想咁早死......」我笑道。
「唔會死㗎！你聞下先啦~！」她把食物盒往我的鼻子一靠，真的有一種很濃的朱古力香味撲鼻而來。
我故作猶豫，後說：「好啦。」
只見她的食物盒裏其實也只有一個叉子，我看着那片已經吃過一點的蛋糕，不禁有點遐想。
不過我並沒有趁此而讓整個嘴唇觸碰那個叉子，而是張嘴把蛋糕輕輕拉走。
出奇的是，蛋糕竟然十分有口感，而香濃的朱古力味則徘徊在我整個口腔，回味無窮。
她看見我微微點頭的樣子，臉上的笑容也就更加燦爛。
「喺學校點做到自己整？」我邊舔著唇邊說。
「我有參加個家政嘅活動，lunch time同埋啱啱放學嘅時候去整嘅～」她得意地笑著。
「做咩唔叫我呀～？」我笑著說。
「你又有興趣咩～？我以為你對呢啲冇興趣，所以就冇問你添。」她微笑答道。
「唔好講咁多啦～你食埋先啦。」我說。
只見她淺笑著搖了搖頭：「唔係呀，我喺上面已經食咗㗎喇，我依家嘅呢舊蛋糕係等海敏或者泳兒佢哋完咗活動可以試下㗎咋～」
「咁我咪食咗佢哋口水尾！？」我帶點變態的語氣說道。
「你都冇真係咬落個叉到～」她竟然有留意這些細節...
「啊...」我按住額頭，咬牙忍著忽然湧現的痛楚。
「吓你冇睇醫生咩？」
「睇咗醫生都冇咩用。」我搖了搖頭：「得㗎喇，冇嘢。」
就在這個時候，一把讓我更加頭疼的聲音出現了。
「喂～」是林泳兒。
「我俾你哋食㗎，愛笑同小欣呢？」
「佢哋喺 toilet…」林泳兒續問：「阿晨你放學去咗幫整蛋糕咩～？」
「唔係呀，我同陳大威去咗圖書館借書。」我急忙編了個藉口，後說：「我趕住翻屋企先，你哋慢慢食啦～」
回家的路上，痛楚變得約隱約現，後來也漸漸散去。
這奇怪的頭疼已經纏擾了好幾日，雖然那像是個巧合，但的確只要是遇見李采樺後，我的腦袋都一定會經歷一段炸裂式的痛楚......
但不知為何，明知會發生劇痛，卻還是不自覺地想見到她......
05
沒有了鋼琴聲，才發現家裡的冷落於媽媽離家後可以如此明顯。
我看了看手機後覺得無趣，便坐到了鋼琴椅上掀開了白色的琴布。
我隨意彈了幾個音後往旁邊一瞥，只發現桌上擱著了媽媽最近一次寫的曲和詞。
媽媽最近都在寫什麼呀？
我拿起那張寫得密密麻麻的白紙，細讀了一遍後便知道那是一個圍繞夢的故事。
「想也在你夢境的我 最後竟變成錯」 那是副歌的最後一句。
那是寫誰的故事呀？我心裡這樣想著。
而就在這個時候，手機響起來了，我皺了皺眉，因為來電顯示竟然是那個讓我頭疼的女生。
頭疼感，果然一說就來......
「喂咩事。」
「你做緊咩呀～？」她問。
「接咗你呢個電話，然後覺得有啲頭疼。」
「又頭疼！？」我竟然在電話裏聽到她幸災樂禍的笑聲：「我係想同你講呢，聽日你放學唔好咁快走住喎。」
「做咩呢。」
「講咗就唔刺激㗎喇，放心你一定會鍾意。」她竟然說這種話。
「伏味濃。」
「你就係諗太多所以先會頭疼呀，根本唔關我事。」她笑道：「總之你唔好咁快走住啦～聽日見，BYEBYE！」
「Bye...」莫名其妙的道別讓我不禁思索打這通電話的意義......
算了，一想又越加頭疼......