為咗報仇，我開始玩tinder: 七十一
我之後轉咗handsfree嚟同阿欣講電話，咁樣我就可以彈返出主畫面搞吓其他嘢…
我都唔知點解自己會有呢個動作，但就係好想撳吓電話上面嘅其他嘢…
之後就撳咗入tinder…我開始碌返同肥婆一開始嘅對話…
仲記得一開始嗰陣係J鋒幫我同肥婆打開對話匣子…嗰啲flirt女嘅技巧我諗我呢一世都學唔識…但同肥婆傾落咗之後，先發覺原來佢係一個唔需要任何flirt女技巧嚟溝通嘅女仔…我只係需要拎個心出嚟，講自己最真誠嗰句說話…肥婆就永遠永遠都會回應我嘅真心…
無可否認…當我第一眼見到肥婆發覺佢已經唔肥嘅時候，我自卑感作祟…怕已經蛻變嘅肥婆會嫌棄我呢啲地底泥…但一直以嚟肥婆都無…佢一路都係用最真摯嘅自己嚟同我交往…而我呢…？
「喂…喂…？」電話傳嚟阿欣把聲…
一把我曾經發夢都會聽到嘅聲…再一次喺耳邊傳嚟…
「係…？」
「你今日好似好攰咁嘅…？」阿欣問我…
「有少少眼瞓…」我講。
「咁…聽日先傾啦，你瞓先啦～」
「嗯…咁好啦…早抖…」我講。
「早抖～」
呼…
臨收線我望一望個通話時間，原來只係一個鐘又十六分鐘，我哋以前到底係點樣傾三四個鐘傾到唔瞓㗎…？
點解而家傾得個零鐘頭我已經覺得唔知點樣傾落去…
我好苦惱…我係咪真係好似J鋒所講咁，一直以嚟對阿欣只係執著，只係因為得唔到而執著，而唔係真正鍾意佢呢…？
我接受唔到咁樣嘅自己…
一方面希冀同憧憬一生一世嘅愛情，另一方面連愛個人都午時花六時變…咁我仲有咩資格去追尋呢樣嘢？咁我仲憑啲咩去相信呢樣嘢？
屌…比著以前我已經搵咗肥婆傾訴…但偏偏而家我煩惱嘅根源就係同肥婆有關…
…
仲有邊個可以俾到答案我…？
諗吓諗吓，我就瞓撚著咗…
仲發咗個好真嘅夢…
「男人老狗，揀定離手呀…」的士佬講。
「我揀咗喇…」
「揀咗你個死樣會好似咁撚樣？喂細路，人一世物一世，另一半都係一世㗎！」
「我好鍾意佢…至少曾經係…」
「咁而家呢？」
「喂，唔好講我嗰筆住先，你嗰個阿敏點撚樣㗎？我嗰次去翻嗰間花店，個士頭婆有老公，仲話佢唔係叫阿敏喎！」
「乜鳩呀？邊q個阿敏呀？我的士佬單身寡佬咗好多年喇喎，就係後生嗰陣唔定性，得一想二，所以先勸勉你，等你唔好行我條舊路…」
「阿敏喎！同你同一間中學嗰個阿敏喎！同你一齊考入港大嗰個阿敏喎！同你一齊開花店嗰個阿敏喎！」
「你係咪精神分裂呀你？我今日先第一次車你咋喎…」
「唉算喇算喇…當我精神病…」
「但你睇落好唔精神喎！哈哈哈哈哈！」的士佬自己講自己笑，但我就乜鳩心情都無…
「係喇係喇…你踩快啲啦唔該…」
「係喎屌你！你仲未撚講去邊喎，一上車就剩係叫我開車！」的士佬講。
「…？我去邊？係呢…我去邊？我點解會喺的士上面？」
「都話你精神分裂㗎啦！去邊都唔知，搭乜撚嘢的士呀？」
「我記得我係趕緊時間去見一個好重要嘅人…但我記唔起佢係邊個…」
「唉…都叫你揀定離手，而家成碌撚咁，又係咁跳錶，陣間咪撚走我數呀屌你！」的士佬講。
「咁你仲過隧道？屌你咩仲要行西隧！」我講。
「話俾你知猶豫不決嘅成本係幾撚高呀細路，我代返錢落你袋呀傻仔！」的士佬講。
「我都唔知自己要去邊…但還掂都過咗海…咁不如去又一城啦…」我講。
「又一城？出西隧都兜幾撚遠先到㗎喎！你去嗰度做乜撚？」
「我都唔知…剩係覺得嗰度有個好重要嘅人等緊我…」
「咁好啦，坐穩呀細路！」
的士佬講完就一嘢踩落個油門到，嗰吓加速嘅離心力嚇鳩醒咗我…
然之後夢就醒了。
我成頭冷汗，隻手仲揸撚住部電話，撳一撳著佢就傳嚟阿欣一連串嘅message…幾個月之前我仲係樂此不彼咁逐個逐個whatsapp quote返嚟回覆，怕佢覺得我唔上心唔在意…
但而家我第一個反應係唔想打開whatsapp住，一日唔show個藍tic出嚟都仲可以扮吓未睇到訊息…
我襯睡意仲未遠去就嗱嗱臨諗返個夢先…陣間唔記得就揼春都無謂…
估唔到夢入面嘅的士佬都仲係貫徹佢的士佬嘅形象，都係咁九唔搭八…不過阿敏之謎始終未解得開，畢竟夢只係反映緊我哋潛藏腦海深處嘅想法…並唔可以解答一啲現實未知嘅問題…
夢嘅開端已經係喺㗎的士入面…雖然發夢都見到的士佬有啲噁心，不過無可否認…的士佬俾我嘅印象係一個有大智慧嘅人…
我坐喺架車上面，毫無目的地…但架車個錶就係咁跳…的士佬條仆街仲揸撚咗架車行西隧…佢好似講咗句好重要嘅說話…係咩呢…？
係咩呢…？
呀！係猶豫不決帶嚟嘅成本好高！我只要繼續無目的地咁坐喺架車上面，架車就會唔停咁一路行…個錶就會繼續起勢咁跳…代表我最後要付出我承擔唔到嘅代價…
我記得我最後揀咗個目的地…
係邊呢…？係邊呢…？
係維園同阿欣嘅老地方…？定係crystal屋企…？
呀！！！！點解去到呢度先斷片㗎！夢入面嘅自己到底點撚樣揀…
唉…唔撚理了…瞓多陣先…
瞓醒之後我都仲係搞唔清自己真正嘅想法，我始終都係無搵返肥婆…我唔想同佢講我已經同咗阿欣一齊…我唔知點樣面對佢…
至於阿欣…我更加唔知點樣同佢解釋清楚自己嘅想法，因為根本連我自己都唔清唔楚…
順其自然…呢個就係我嘅結論…
不過當我決定順其自然之後，就開始發生意想不到嘅事…
一切事件嘅開段係肥婆一個whatsapp…
「6月9號，去唔去遊行？」肥婆問我。
二零一九年六月九號，民陣發起反對修訂逃犯條例大遊行。
「去呀！」我即刻答。
「一齊行？」肥婆問。
「好呀！」我又係諗都無諗就答。
因為我知道阿欣一定唔會去遊行，佢係屬於有少少離地嗰類人…
「咁到時見～」肥婆講。
我哋就好似以前約出街咁，好平常嘅幾句對答，確認對方得閒同埋想出，就即刻約實…
但我到時點同肥婆講佢同我表完白之後…我已經有女朋友呢…
六月九號當日好撚多人…真係好撚多人…我同肥婆都搞咗一輪先搵到對方喺邊，然後就一直鳩等起步…
嗰陣我同肥婆都喺度講緊，屌你老母成百鳩萬人上街，政府應該都唔會wfc掛…
不過我哋的確係低估咗呢個政府嘅無恥程度，佢真係wfc…
「唉…唔知之後會點呢…」行完之後我同肥婆坐低咗食飯…
「唔知㗎…不過…唔可以就咁放棄。」肥婆講。
「嗯…」
呢個時候…阿欣打俾我…我有同佢講我去遊行…
「喂…？」
「喂，你行完未呀？」
「哦…差唔多喇…」我又講咗個大話…明明已經行完同肥婆食緊飯…
「咁靜咁嘅？」
「哦係呀…」
「你今晚同唔同我食飯？」阿欣問。
「唔喇…我行完有啲攰…」
「咁好啦，小心啲呀！」
「嗯嗯，我返去再打俾你…」我講。
「拜拜。」
「拜…」
收線之後我先突然驚覺啱先嘅對話內容隨時出賣自己，敏銳嘅肥婆好有可能察覺到我同電話入面嗰個人嘅關係…
我飆撚晒冷汗咁望住肥婆，睇佢有咩反應…
「望住我做咩呀？」
「無…想望吓你之嘛…」我心虛…
點知肥婆就好似有啲怕羞咁移開視線dup低個頭…繼續食佢碗拉麵…
唔知點解，我突然有一種我想搣佢面豬登嘅衝動…
但我用理性抑壓住衝動…我知道如果我咁樣做，即係同時對唔住阿欣同肥婆…所有嘢都覆水難收…
食完飯之後我送咗肥婆去搭車，一路上佢都無提到關於個電話啲乜嘢…
有時我會諗，其實肥婆係唔係已經知道我同咗第二個一齊，不過佢唔忍心拆穿我…佢想繼續同我保持呢種關係…
我都唔知…
我唯一知道嘅係…現階段，我實在俾唔到啲乜嘢肥婆…所以咩都唔講，或者就係最好…
然後過咗幾日，六一二…