為咗報仇，我開始玩tinder: 六十六
「phillip仔，做緊咩？」返嚟而家，我同amy嘅關係發展迅速，不過就唔係朝住要溝佢呢個目的邁進，而係慢慢地成為一個佢會同我分享心事嘅朋友。
全靠kelly呢段日子入面嘅情報，我先可以咁快獲取amy嘅信任，早排amy已經開始會同我抱怨一啲生活上嘅瑣碎事，但佢啲爛臭脾氣仲係改都無改過。
而我亦都將phillip仔呢個角色飾演到淋漓盡致，喺佢發脾氣嘅時候安慰佢，喺佢唔開心嘅時候安慰佢，喺佢咒罵其他八婆嘅時候安慰佢，總之係唔係都安慰佢。
亦因此，我漸漸學識點樣應對啲臭閪八婆，總之係唔係都話係就無死錯。
「睇緊書。」我答。
當然我只係鳩嗡，我根本無睇書嘅習慣，但從kelly口中我得知amy有，所以我等佢問我做緊咩等咗好耐，咁我就可以同佢講我睇緊書。
「睇緊咩書？」
「東野圭吾…」我講。
「你都有睇東野圭吾㗎？」
當然，amy鍾意睇東野圭吾都係kelly嘅情報。
「係呀…我鍾意佢對兇手動機嘅描寫，多過著重於行兇手法。」我講。
當然，我只係背鳩咗kelly對東野圭吾嘅睇法，藉此嚟同amy展開對話。
「我都係呀！估唔到你都有啲文學修養喎phillip仔。」amy講。
就係咁，我同amy就住東野圭吾呢個話題傾咗好耐，仲延伸到討論有關創作、電影、藝術等等嘅領域…
我feel到自己已經一步一步咁走入amy嘅內心世界。
「我覺得差唔多喇。」嗰晚我同kelly匯報進度嘅時候講。
「差唔多咩？」佢問。
「差唔多可以…傷害佢…？我諗住遲啲約佢出嚟攤牌，當面屌柒佢。」我講。
「你傻㗎？太快喇！你而家同佢關係好好呢咩？你而家已經完全獲得佢信任呢咩？你咁快咁樣做根本對佢不痛不癢！根本傷害唔到佢！」kelly講。
「其實…相處落佢都唔係咁差啫…係脾氣臭啲…係經常唔理人感受…但，講真…小學單嘢都過咗咁多年…我覺得而家啱啱好，喺佢真係完全信任我之前…話俾佢知所有嘢都係一場戲…我諗佢已經唔會好受…」我講。
「no！唔得！唔可以半途而廢！你咁難得先令佢打開半道門，你一定要行埋入去，完完全全咁傷害佢先得！」kelly講。
「點解你咁執著呢？我覺得經過今次之後，佢會學識珍惜身邊嘅朋友，咁樣對你無壞吖。」
「唔係咁呀…我唔要係朋友呀…」kelly講。
下？乜鳩？
「你搞咁大壇嘢…其實唔係想amy無得再掌控你…而係…你想掌控amy…？」
「係…我要令佢知道所有男人都係唔可信！我要佢嘅自尊被踐踏到體無完膚，再伸隻手俾佢，等佢剩係可以捉住我…phillip仔…幫我…」kelly講。
我終於都明白，點解kelly會喺飯局上面三番四次頂撞J鋒，因為作為一個女性，理應對J鋒係無抵抗力，而家終於真相大白。
you竟然是個…les…
「嗱，我就無話歧視同性戀嘅，但，呢啲嘢…勉強唔嚟，你亦都無謂用咁扭曲嘅方法去嘗試得到一個人啦，我唔會幫你。」
「你會後悔…」
「我唔會。」
「我會令你會。」kelly講。
呢個女人，真係可怕…
之後我同J鋒講返成件事，佢都贊成我早啲同amy攤牌，畢竟目的已達，無謂對佢做成更大傷害。
雖然amy係一個不折不扣嘅八婆，但我話晒都同佢傾過下偈，始終都叫熟絡咗…即使曾經有過不共戴天之仇，但要我去傷害一個已經熟咗嘅人，始終都有啲心理關口要跨過…
不過我係唔會心軟。
攤牌過程我就唔多形容，結果就係俾amy摑咗一巴，見住佢眼泛淚光咁轉身離開。
不過我係唔會後悔。
就喺我同amy攤牌嗰一晚，阿欣搵返我。
「近排點呀…？」佢問。
我無應到佢，係咪好型？
但我唔係想扮型，而只係唔知道點樣應佢。
當我收到佢whatsapp嗰陣，心跳嘅感覺始終呃唔到自己，我仲係鍾意佢…
估唔到，喺佢拒絕我之後過咗咁長嘅一段時間，我經歷咗同咁多女仔嘅相處，都仲係唔識得點樣同阿欣講嘢…
呢個時候，梗係搵多啦J鋒。
「佢搵返我，點應佢？」我問J鋒。
「嗰個阿欣？」
「係呀，佢無啦啦問我近排點…」
「咁…你仲鍾唔鍾意人？」
「應該鍾意…」
「乜鳩嘢應該呀？鍾意就鍾意，唔鍾意就唔鍾意架啦！」
「本身我自己都唔係好清楚…但當收到佢whatsapp嗰陣，個心跳到痴線…咁應該係鍾意啦…」
「咁你咪溝返人囉，佢都搵得返你咯，仲唔係依依不捨咩？」J鋒講。
「我驚最後又好似之前咁…話只係唔捨得無咗個朋友…」
「喂喂喂，你玩咗tinder咁耐，識咗咁多女，應該已經好識得同女相處嘅方法架喇喎！自信啲啦！」
我諗一諗J鋒嘅說話，數一數自己呢段時間入面同女仔相處嘅一點一滴…
一切都由肥婆開始，起初以為佢真係肥婆，以為佢同我一樣係食物鏈底層嘅人，所以好容易就對佢躺開心扉，講咗好多自己嘅秘密俾佢聽…而肥婆亦都係一個好溫柔善良嘅人，每次當我唔開心，當我失意低落嘅時候，都會恰到好處咁安慰我…
然之後就係crystal…識crystal嘅時候佢係J鋒女朋友，因為一啲原因搞咗段錯綜複雜嘅關係出嚟…我配合J鋒溝crystal嘅同時配合crystal激J鋒，諗返起都覺得痴線…但crystal亦都係一個好善解人意嘅女仔，無論打機定現實，往往都係人地行先佢行後…
再嚟就係ashley…雞一隻，無咩好講…不過同佢出咗一日街我都叫學識咗點樣放鬆心情，同女仔相處嘅時候無再咁緊張…
之後就係同我有仇嘅amy…相處落依然不改我覺得佢係八婆呢個事實，成日有意無意就踩鳩我串鳩我，不過我為咗得到佢信任再傷害佢嘅時間入面都學識咗點樣應對一個啷嚟嘅八婆…
話唔定…我已經係個溝女高手？
「咁我成功機會有幾高…？」我繼續問多啦J鋒。
「唔知㗎，你要唔要喺tinder試多個先？」
「好！你幫我揀！」我講。
「ok啦，聽日過嚟食lunch，再再針針佢。」
「ok！」
為咗追返阿欣，終於都嚟到task 3：yanny。
記性好嘅你應該都知道task 3對象喺故事一開始就出現過，無錯，就係嗰個會用第三人稱稱呼自己嘅八婆。
佢嘅八婆程度同amy走兩個極端，無amy咁高層次，只係單純一個八婆。
我運用我呢段時間入面接觸過咁多女性之後集大成嘅結論，好快就同yanny混熟咗。
J鋒話揀呢條bitch係要做最後訓練，即係我最缺乏嘅耐性。
根據J鋒所講，耐性並唔係指唔對條八婆發脾氣呢啲咁小兒科嘅嘢，真正嘅耐性level max係能夠令條八婆發完脾氣之後會主動哄返你，我聽完都一頭霧水，不過由J鋒呢個傳銷達人把口講出嚟就實無錯。
至於點解J鋒搵tinder嘅時候可以幫我揀到一條適合我訓練嘅八婆呢？原因就係因為呢個yanny係佢其中一個ex，俾J鋒一眼認出就like咗佢嚟益我。佢話yanny本身都係player，所以叫我唔使就住就住，可以盡情練習咁話。
到底J鋒有幾多個ex？多到可以喺tinder嘅茫茫人海入面都搵到出嚟呢？佢自己都講過數唔清，所以我都廢鬼事深究。
當我同yanny發展一日千里嘅時候，故事亦都接近尾聲。