為咗報仇，我開始玩tinder: 六十五
到底點解kelly要單獨約我出嚟，任我點樣諗都無辦法諗得到。
不過點都好，我仍然係會赴約。
因為我想喺佢口中得知amy嘅弱點，從而擬訂策略一報小學之仇！
「喂phillip仔！」kelly把聲喺後面傳嚟。
我望一望佢，差啲唔認得。
kelly今日嘅打扮由一隻雞變返做一個人，仲有啲熟口熟面嘅感覺…咦…唔通佢係學緊crystal嘅裝束？
「hi…」
「等咗好耐呀？」
「唔係呀，一陣之嘛，你約我出嚟做咩？」
「咁小學同學，咁多年無見，約多幾次好出奇咩？」
「如果係普通嘅小學同學，就唔出奇嘅…」我講。
「唔好咁重疑心啦，咁樣會溝唔到女㗎！」kelly講。
關你叉事咩。
「咁你想食咩？」
「我帶你去啦，唔好企喺度喇，一路行一路講。」
「哦…」
「你有冇發覺我今日有咩唔同？」kelly問。
「無喎。」我答。
「乜你咁㗎！咁唔細心都有嘅？我今日成個look都唔同晒喎！」
「哦？係咩…無留意喎真係…」
「其實呢，我係因為amy所以先打扮到好似佢咁…」
「下？你講呢啲做咩？」我問。
「我…有大半世人都活喺amy嘅陰影之下…佢話行東我唔敢話行西，佢話企我唔敢話行…」kelly有些少黯然咁講…
「下？無人叫你同佢做朋友架喎！你做得佢心腹，就預咗架啦！」我講。
「你估我想？小學嗰陣佢咁受歡迎，唔埋佢堆邊仲有人同我玩…？後尾我仲要同佢派埋同一間中學…又loop多一次…」kelly講。
「食得咸魚抵得渴呀！」我講。
「但我驚再咁落去，成世都逃唔出佢嘅陰影…」kelly講。
「所以？」
「我睇得出你同J鋒都好憎佢…係因為小學嗰件事？」kelly問。
「係。所以你都應該知我憎你嘅程度唔比憎amy少。」我感覺到kelly有求於我，即刻襯機俾說話佢聽。
「對唔住…」kelly竟然向我道歉。
「我唔會接受你道歉，你就繼續一直內疚下先…」
「你唔原諒我唔緊要，但可唔可以幫我…？」kelly問。
「幫你啲咩？」
「我知道，amy小學嗰陣已經鍾意J鋒…」kelly咁樣講一講，我突然之間好似諗通咗啲乜嘢…
我一直都唔係好明白，作為小學生嘅amy因乜事要搞個選舉出嚟欺凌我，而家我終於知道，佢嘅目標唔係欺凌我，而係因為我同J鋒本身fd底，佢想藉著個選舉去拉開我同J鋒嘅距離…
屌…估唔到我要讀到大學先睇得穿amy嘅機心…
佢原本打算用一個選舉嚟捧起J鋒，令J鋒沐浴喺虛榮感之中就自然唔會否定選舉結果，J鋒唔否定選舉結果嘅話即係唔會幫我發聲，我就默默承受「最差」嘅銜頭，繼而仇視J鋒，從此疏遠佢…咁amy就除去咗我呢粒眼中釘，就會多好多機會埋J鋒身…
屌…一石三鳥…何其老謀深算！
真係難以想像amy諗出呢條橋嗰陣只係一個小學生…佢而家到底成長到一個咩地步…？我諗起就有啲不寒而慄…
好可惜，佢嘅如意算盤最後都打唔響，因為佢算漏咗一樣嘢，就係我同J鋒嘅關係喺小學嘅時候已經牢不可破。J鋒並無因為所謂嘅虛榮感而拋棄我，而係狠狠咁落鳩amy面…
事隔多年…amy而家到底諗緊咩？
「然後？你覺得佢而家仲係鍾意J鋒？」
「係，佢好執著，佢想得到嘅嘢唔會咁易放開。今次難得俾佢撞返J鋒，我諗佢就快會有行動。」
「咁你想點？」
「喺佢行動之前搶先一步。」kelly講。
「其實唔使嘥心機啦，J鋒一撚定唔會鍾意amy。」我講，因為連crystal咁高質佢都唔放在眼內，更何況係同我有仇嘅amy？
「amy得唔到嘅嘢，都唔會俾其他人得到…」kelly講。
「咁佢會點做？」
「我都唔知，所以要先下手為強！」
「咁我地可以點做？」
「梗係溝咗佢先！我地夾埋J鋒做一場戲，等amy以為自己成功攻略J鋒，放低戒心先，然後再夾埋慢慢陰啲陰啲咁折磨佢，amy份人我最清楚，又高傲又自大，一定唔會認輸，只會繼續攬實J鋒唔放。」kelly好撚兇狠咁講…
女人真係好恐怖…
「最理想就梗係呃埋amy第一次，再狠狠咁撇甩佢。」kelly繼續講。
「下？乜上次佢講堅架？」我好撚驚奇amy真係仲有第一次。
「條八婆咩仔都睇唔上眼，你覺得好出奇咩？」kelly解釋，又有啲道理。
「不過你都係死心啦，J鋒唔會做呢樣嘢。」我講，因為知道佢已經修心養性，剩係一心等miss lin答覆。
「點解？無咗J鋒呢個計劃根本唔work！」
「其實你咁著緊做咩呢？就算你唔妥amy都唔妥咗咁多年啦，係你自己選擇留喺佢身邊做佢朋友，我地無義務幫你報復。」
「我知…我知…但我真係諗唔到其他方法…如果我同佢反面，我一定會無晒而家啲朋友…」
「咁咪識過其他朋友囉。你所講嘅嗰班朋友既然埋得amy堆，某程度上都係同性相吸㗎啦，一次過離開佢地，無壞。」我講。
「女仔嘅友誼…唔係你諗得咁簡單…」
「嗱，唔好一碌鳩打一船人，我知道有好多女仔都好好人。」
「如果我唔瓦解amy呢個權力核心…將佢高高在上嘅形象打落嚟，我就永遠逃唔出佢嘅掌控…」kelly開始哽咽。
我最怕女人喊…
「對唔住，你自己諗辦法…」我決定硬起心腸講。
「咁…你地原本係諗住點樣報復佢…？我可以配合你地嘅計劃…」kelly講。
屌，我而家先諗返起，原本係諗住出動我phiilip仔去攻略amy…
有啲唔好意思講添…
「唔關你事…」
「唔通…唔係掛…你諗住你得呀？」kelly一臉孤疑…
正一死八婆。
「關你咩事？係咪唔得吖？」我有啲嬲。
「無話唔得嘅，我可以幫你！」
估唔到kelly已經走投無路到連幫我都肯，咁樣簡直係將手上嘅武器由神器級換做樹枝一樣…
「點幫？」
「我知道佢嘅弱點。」kelly講。
「係咩？」
「脾氣差。」
「屌你講廢話呀？」
「差到無人有，差到無人頂得順。」kelly無理我繼續講。
「咁佢都幾好戲喎，上次食飯俾J鋒串到咁都處之泰然…」
「咁係因為佢唔想輸啫。」
「咁我可以點做？」
「喺佢發脾氣嘅時候做佢嘅出氣袋，phillip仔，你要記住，就算係一張廁紙、一條底褲，都有佢嘅用處！」kelly講。
「屌你咩…」
「我認真…而家諗諗下，你係phillip仔都無壞…某程度上或者仲理想過J鋒…」
「即係點？」
「即係你人畜無害，反而更容易令amy落搭…」
「真？」
「係，你只要跟我計劃做…」
…
…
…
時間好快咁過咗兩個星期，呢兩個星期我配合kelly嘅計劃，已經初步得到amy嘅信任。
amy有一個習慣，就係心情差嘅時候搵kelly去飲酒，然之後串下kelly呢樣嗰樣，等自己條氣順啲…
咁kelly作為無間道，當然會報料俾我聽，有一次我就喺amy飲到爛醉如泥嘅時候登場，送咗佢返屋企…一路上佢係咁發酒瘟屌鳩我係廢柴，我都吞聲忍氣，目的只係為咗喺佢完完全全信任我之後再狠狠踐踏呢段關係。
每個人都需要朋友，即使amy點都唔會睇得上我都好，但我可以成為佢一個無所不談嘅親密對象，再將佢出賣。
或者由一開始我同J鋒嘅計劃就錯咗方向，要令眼角高嘅amy鍾意我可以話近乎無可能，但相反，amy呢種唯佢獨尊嘅八婆，其實好需要一個小太監喺佢身邊，無錯，充當呢個小太監嘅職責我可以話係綽綽有餘。
到時小太監，都可以將皇后玩弄於鼓掌之間，諗起都爽。
「phillip仔，做緊咩？」amy whatsapp問我。
時間稍稍倒退一下先…
話說嗰一晚，amy飲到成pat屎咁嗰陣，我問佢拎咗電話。
要有佢電話唔難，可以問J鋒拎，可以問kelly拎，但呢一步一定要由我去做，咁先可以顯得我在乎佢，呢招係kelly教。
第二朝我就扮晒關心佢咁問佢有無事，問佢有無頭痛，叫佢飲杯薑茶等等，總之好撚嘔心嘅關懷說話我都一一通過whatsapp同amy講，起初梗係全撚部都藍tic，但我又點會咁易放棄。由一開始就無預計過amy會咁容易躺開心房，但我勝在有kelly呢個間諜，佢會將amy嘅所思所想全部透露晒俾我知，咁我就可以係最適當嘅時候奉上最嘔心嘅關懷。
嗰次amy轉個頭就同kelly提起我，話唔知個phillip仔搞咩，無啦啦對自己咁好…當然呢番說話係由kelly轉達俾我知，俾著一般人溝女，條女藍tic完自己就梗係一定會退卻，因為唔知對方諗咩，驚對方嫌自己煩…但因為kelly嘅關係，我就可以知道amy藍tic我並唔係因為厭惡我嘅關懷，反而係有啲不知所措。
咁樣我就可以繼續進擊。
「做咩飲咁多酒呀…？」我whatsapp問amy。
amy呢條死八婆，依然繼續已讀不回。
「傷身呀…」
佢繼續已讀不回。
「因住俾人執屍呀…」我鍥而不捨繼續瘋狂關心佢。
佢同樣繼續已讀不回。
屌，點撚樣搞架，唔通kelly俾錯料？
「喂，amy無反應喎，全部都藍tic藍tic藍tic…」我同kelly抱怨。
「咁個訊息係咪好快就藍tic？」kelly問。
「好似係…」
「咁即係代表佢十五十六緊囉！你而家停一停先，唔好chur得太勁住，過一兩日佢就會覆你架喇！」
然之後過咗一日…
「你做咩咁關心我？你唔係應該好憎我嘅咩？」果然，amy whatsapp覆返我。
「咁…都過咗去啦…」我講。
「但上次食飯，你嗰位兄弟似乎唔係咁諗喎！」
「佢都係戥我唔抵啫…」
「唔好扮晒嘢啦！佢係咁，你會唔係？更何況你先係受害者喎！」amy講。
「咁佢還佢…我還我呀嘛…我有同佢講我無嘢…不過佢係都要幫我出氣之嘛…」我講。
「你兩個不如結婚啦！」
「香港唔合法…哈哈…」我講。
然之後amy就無覆到我。
但我聽kelly講，amy提起我嘅次數密咗，語態亦都唔同咗，我就知道自己成功咗一半。