[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: Ch.13(7)

時間21:00

呢個時間本來係我打機嘅鐘數，但係冇計啦，依家呢個時勢，一日都要忙到黑，個腦又要高效率咁運作，真係要爆。

內政時間到。我召集咗各隊隊長一齊開會，商討聽日嘅計劃。

M：「今日你WN帶咗隊出去外面做搜救嘅，你覺得一日救兩對人會唔會太多或者太少？咁樣起碼我地都要搞多成半個月先可以全部救曬。」

WN:「我今日係帶咗隊出去啊！一日救兩對呢其實真係有少少慢，再唔快啲嘅話，話唔定就GG架啦！但係跟住我嘅得兩個人，其實我覺得可以派多兩個人跟住一齊出任務，咁樣都比較安全，火力又多啲咁樣，至於其他嘢就比番你安排啦。」





啊餅：「你係啱嘅，人手方面真係要比多少少，加快腳步去進行營救行動，用我嘅推算，每個家庭正常嘅物資都只係可以頂到3-5日，所以呢真係好急，錯過呢個黃金時間就好難救到人架啦，佢地會GG嘅方式有兩個：

第一， 就係壓制唔住自己想食嘢嘅慾望，然後如無意外咁喺第5日左右食完所有糧食，然後就被迫外出搵新物資，之後就好合理地被感染者圍攻，最後一係被完全啃食，一係就被同化。

第二， 就係一樣食曬所有食糧，然後寧死不屈，就咁餓死，或者兩公婆其中一個就犧牲自己，死淨一件，呢個我相信好少會出現，大部分人都覺得自己可以喺感染者嘅口中逃脫，然後就好自然地送出自己項上人頭。

所以呢一度30幾位同學，雖然有幾對同學聯絡唔到自己嘅家長，但我地除咗頭先救返黎嘅兩對之外，仲有二十幾對家長未救到架！

呢兩日要快趣啦！雖然有另外5位同學話佢地屋企嘅存貨仲有一個星期，但我相信你地咁樣每日兩對一定救唔切，比多你都係救到最多15對，今日已經係第二日，我勸你盡量多派人手，分開幾邊去啦！」





K：「我同意啊餅建議，一但我地救唔切所有嘅家長，我肯定其他同學一定會有反對我地嘅情緒，我地要盡可能出外救多少少人！唔可以比呢個情況發生，一但出差錯，我地呢一個地方分分鐘玩完都似。唔使驚嘅M，我會做你智囊，放心安排。不過最重要嘅係，一個都不能少！量力而為，唔好勉強自己，我知道你好想救到所有人架，不過都要好好度下橋！唔好一味亂咁衝，成嘅盲頭烏蠅咁樣。」

Alan+Alex:「我都同意你地講法！我地會幫手，一定唔會縮沙比你睇，話曬我地兩個嘅家長都仲外面，唔知情況，我地當然會盡力去做！」

我：「ok，咁你地兩個分別帶4個人出去，我個邊聽日會帶多個人就出去，我嘅實力應該都喺大家之上嘅！不過同我同隊嘅嗰個人就比較慘啦，淨係得我一個隊友，死都死得快啲XD，當然佢會係最安全嗰個啦，我話過會保護好大家架嘛，係咪先。啊WN，係啦你聽日唔使出任務，留喺呢度休息下，最多做下巡邏job，其他粗勞嘢你諗都唔好諗，如果唔係我打爆你個頭，睇你仲做乜春。」

WN：「收到啦！頂你！你估我好想做啊！唔使做仲好，我聽日hea下，多謝大佬！我要度下橋點樣追女仔啦，之前做得太少，付出多啲應該就可以令佢望多我幾眼。

本身我都唔奢望可以短時間內做到呢件差唔多兩年黎每日日思夜想嘅事，但係依家我決定咗，就算幾艱難，幾辛苦，我都唔會改變，我願意做佢一世守護天使，或者一個平平無奇嘅spare tire，依家多咗個機會我嘅成功率又會再向前加少少。





希望啦，成日聽人講努力會有回報，我唔想對呢句說話失望啊，我好信呢句說話架，如果唔係，相信呢個世界嘅人，相信我自己，都會對建立於呢一個價值觀嘅問題失去信心，仲有崩塌。」

我：「你搞乜鬼又有感而發啊，仲長氣過我，係啦係啦，知道你堅持好耐啦，加油啦你，做兄弟嘅一定會打救你，不過唔好怪我得閒插你兩刀而唔係兩脇插刀喎，relax啦香港人，有時係要搞下笑嘅，係咪先，笑啦！」

WN：「你真係勁，呢個moment都仲笑得出，你認第二，冇人敢認第一，同埋我頭先好認真，唔講笑，亦都冇辦法笑得出，sorry。我依家成個人都好煩，要冷靜下先。」