[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: Ch.9 M的第二人格(3)

我一面憤怒咁樣行返入去避難所，發現大家都好開心咁樣睇緊手機吹下水，食完個早餐大家都脹到一個個波咁樣，想郁都郁唔到。我見到大家搞笑嘅樣，我嘅心情由谷底抽升上黎，回復正常。

見到佢地個樣依然天真無邪，完全冇去理會外面嘅世界就知道，佢地好安於呢一種生活，佢地可以咁開心絕大多數都係覺得自己有一大班人去陪伴自己，就算去到末日都唔會係孤身一人。

同埋亦都可以睇得出，大家對於我地嘅避難所好有信心，先至會無憂無慮咁樣放空個人，做返真正嘅自己，唔使擔驚受怕咁樣，可以安心渡過，剩下嘅日子。
｜
｜
｜
至少我係咁樣諗啦。






有一班同學可以陪住我，同我分擔壓力，仲有佢同我一齊，真係點樣都得啦，死而無憾啊！

我會用生命去保護大家，即使我嘅能力係咁細，即使我幾咁渺小，幾咁無用，我唔會放棄，我同M都會奉上自己嘅最後一口氣，搭救你地，令你地可以等到病毒散去嘅個一日，還返一個正常嘅香港比大家。


時間09：00

我攞起手機，上網準備去睇時事新聞，很好，仲有訊號，可以上到網，咁樣我暫時都唔使驚外面咁快淪陷，加上我可以根據新聞嘅描寫，製造專門對抗感染者嘅武器，我地嘅資源尚算充足啦，旁邊嘅地盤同時都提供咗好多嘅硬物（建築材料）比我地。





雖然係一個廢棄嘅地盤，但我發現有好多建材都仲係好新好結實，喺旁邊嘅回收站，我地仲搵到唔少嘅半新嘅家具，梳化啊，木枱啊，木椅，仲有飯枱，咁樣一黎大家就唔使自己用手攞住，可以有個位放好碗筷，幾方便。

手機上顯示住一則新聞「新病毒襲港！確診人數急升！」

禁入去，我第一眼見到嘅係一張相片，裏面嘅景象有幾咁恐怖，我就唔多講啦，真係好鬼核突，我見到都忍唔住。滿地嘅屍體（當然係腐屍），眼前景象一片滿目瘡痍，完全唔係昔日我地嘅香港。

向下一拉，我再見到嘅係一個被感染嘅人做咗一個拱橋式嘅動作，然後半起身狀態。我不禁打從心底佩服呢一位敬業嘅記者，佢竟然可以係呢一種情況保持專業，堅守崗位，比我地呢啲細路仔做肯定嚇到人都癲！

佢哋為市民提供最真實嘅資訊，真係偉大！我將呢一張圖比咗我地班嘅P圖大師觀望，以佢嘅經驗同佢講，呢一張一定係真嘅照片，絕對冇可能係合成照，所以話呢張圖係珍珠都冇咁真！





比着係我，我一定唔撈，呢種吃力不討好嘅職業，都係唔啱我，就算記者真係用性命去寫報道，到頭來都只會被冠上一個造假嘅壞名，水洗都唔清，佢地同樣都係一個普通打工仔，攞嘅人工比社會上好多人都要低，但係佢地比任何人都要專業，比任何人都更加堅持。

有啲人只係活喺自己嘅世界之中，選擇性去接受佢地以為係真嘅新聞，永遠都唔會選擇去相信近在眼前嘅事實，只係一味去逃避問題，解決唔到問題，就只係識得解決出問題嘅人，只係去處理表面問題，內在問題又唔去真真正正，實實在在咁樣去解決，根本覺得世界只係為咗圍住佢一個人去自轉，但又唔知自己阻住個地球轉，令到大家都咁憎恨佢，引起民憤，真係佢嘅拿手之作，除咗呢樣嘢做得最成功，我都唔知有啲咩係佢做得到嘅。