男神呢個稱號令我食左唔少女(有甜）: 聖誕節(三)

當我地食完之後，出到去商場出面嘅巴士站等車，但係個嗰黑眼男仔突然出現左係我地面前。

我地四個面色沉重咁望住佢，相反個嗰黑眼男仔只係一直係到撻手指，仲係到對住我地微笑。

我地決定扮睇唔到咁行過去，但係我地行一步，佢又跟住我地行一步，個笑容仲要愈黎愈詭異，就好似之前嘅...MOMO一樣...

不過唔知點解其他路人好似見唔到佢嘅存在，反而用一個奇怪嘅眼神望住我地，應該諗緊我地係咪撞邪。

最後我忍唔住開口問個嗰男仔到底有咩目的，點解要跟住我地，諗返都覺得自己好撚大膽。



我：「小朋友你做咩跟住我地嘅？我由戲院個陣已經見到你啦喎。」我扮冷靜咁同佢講。

黑眼男仔：「家姐...家姐...」佢撻手指嘅速度愈黎愈快，隻眼仲要愈黎愈黑，我唔知係佢宜家好興奮定點。

我：「家姐？你指呢三個女仔有一個係你家姐？定係你認錯人咋？」

黑眼男仔：「家姐...家姐...家姐...」佢衝埋過黎，而佢衝嘅目標係以男，我見到以男個樣係好撚驚。

佢就黎衝到去以男到，伸開兩隻手準備攬住佢，我唔知佢係想傷害以男定係點，於是我係佢臨衝到嘅時候抱起以男。



黑眼男仔跑得快跑到出哂界，一下子仆左落地下，雖然我好想笑，但係我更加想快啲走。

我放返低以男，我地四個一齊望住黑眼男仔，佢拎轉頭望住我，佢個樣話比我聽佢宜家好撚嬲。

黑眼男仔：「啊啊啊啊！！！！！」佢好似隻狼人望到月亮就會係到鳩叫一樣，我地個嗰都忍唔住揞住隻耳仔。

佢隻眼變成紅色，好似火影忍者入面隻血龍眼一樣，呢個時候我就心知不妙。

我：「快啲走呀！！佢癡撚左線呀！！！」我大叫佢地三個快啲跑走。



「噠！」

佢地三個已經跑到好遠，但係我隻腳點郁都郁唔到，點解會咁架...你唔係呢個時候先黎玩我呀嘛...？

梓恩：「你做咩仲企係到呀？！！快啲走啦阿燕！！！佢就黎行到你到啦！！！」

我拎一拎轉頭，我望到個嗰黑眼男仔係唔知邊到拎左一把刀出黎，仲笑住咁行埋黎我到。

我無諗過今年嘅聖誕節就係我嘅死期，我無諗過我連中六都未讀完就要死，我無諗過我想享受多幾個月幸福都唔得。

Tracy：「快啲走呀！！！走呀！！！」佢力竭聲嘶咁叫我走，但無可耐何我真係郁唔到。

黑眼男仔同我只係仲有一把15cm間尺嘅距離，我諗我應該都係準備死。

雖然我唔知點解佢要殺死我，但有時候好多野都唔需要理由，純粹想咁做就咁做。



我合起雙眼，等把刀插落我個心到嘅時候，回想自己英明而又充滿罪孽嘅人生，做過幾多錯事。

唔知點解宜家面對死亡嘅我，一啲恐懼感都無，反而仲會欣然接受，可能我都覺得自己應該要死。

死亡並唔係一件恐怖嘅事，無價值咁死亡先至係一件恐怖嘅事，靈魂得唔到解放先係一件恐怖嘅事。

黑眼男仔：「哈哈哈哈哈！！！！哈哈！！哈..哈哈...哈...？」佢將把刀一野插左落黎，但係我一啲感覺都無。

我慢慢咁打開眼，我見到前面嘅唔係個嗰黑眼男仔，而係以男企左係我面前。

我一時反應唔到，只係企左係到呆左咁望住以男，佢慢慢跪左係地下，成個地下都係血。

直到佢成個人訓左係地下我先知發生咩事，隻眼不由自主咁流緊眼淚，個嗰黑眼男仔一下子就消失左。



我：「啊啊！！！你點解要咁傻呀！！！」我望住把刀直插係以男係心到，覺得自己好撚廢。

丘以男：「我...我唔想佢傷害你呀嘛...」佢已經無乜力氣咁講。

梓恩：「發生咩事呀？！點解會咁架！！！Tracy快啲Call白車！！！」

我：「你由得我死呀嘛！！！我呢種人根本唔值得存在係呢個世界！！！」我用力捉住佢隻手咁講。

丘以男：「唔係架...你...你比到好多...好多幸福我地...」

我：「我唔明..我真係唔明呀...點解要對我咁好...點解桐桐又係咁...點解你又係咁...」

丘以男：「因為我地都係一樣...我地都...愛你...」佢講完呢句就慢慢咁合埋對眼。

我：「唔好訓呀！！我唔比你訓呀！！！我唔比呀！！！你同我起身呀！！！」我嘗試用力整醒佢，直到救護車黎左。



我已經...我已經...無法再承受到...再有人離開我嘅感覺...唔好咁對我...個天...你可唔可以唔好咁對我...？

我再次坐上救護車，再次係因為我愛嘅人受傷，再次係因為我嘅懦弱搞到咁。

我望住以男訓係到嘅樣，我真係...心痛到好似比人用腳一下踩落條賓州到一樣...好痛...真係好痛...

最後個結果...就係...以男失血過多而死亡....哈哈...哈哈哈...哈哈哈哈哈...又比你講中左啦...

女仔：「燕仔，你要記住，愛我地嘅人，佢地最後全部都會「死」...」

我已經...無辦法接受...已經有四個女仔...因為我而死...珮恩...桐桐...老師...以男...

個天比得一樣野我，我就預左佢拎返一樣野走，但係點解...你要拎走我咁多樣...？