男神呢個稱號令我食左唔少女(有甜）: 陸運會(四)
我已經下定左決心，如果贏唔到佢嘅話我以後都唔食女。
即使黎到決賽日，大家都係用一個輕鬆玩嘅心態黎到運動場，我一返到去就比好多人搵影相。
但係人海茫茫之中，都比我見到個嗰將女仔感情當玩具玩嘅仆街，而佢身邊都有好多女係隔離。
佢好快就注意到我，只係對我笑一笑，就拎返轉頭同啲女傾計，但我知呢個笑容絕對唔係出於善意。
我地亦都要準備集隊上返看台，而且亦代表住我中學最後一年嘅陸運會，就會係今日結束。
雖然我係有啲唔捨得，但人總要向前睇，唔可以一世都將自己停留係小朋友到。
我上到去看台之後，心入面仲有小小不安感，如果輸左比佢嘅話，係咪就代表我只係一個垃圾？
阿彥坐左係我隔離，我望住佢個陣，同佢一齊嘅回憶好似一瞬間係我腦到全部出現哂。
我：「咁快就六年啦何？」我望住出面個跑道再講。
阿彥：「係呀，估唔到我地最後一年先會咁認真對待呢次陸運會。」
我：「你講到宜家好似真係最後一戰，贏唔到就會死咁。」
阿彥：「中二病爆發呀嘛，不過想有多次機會同啲同學鬥，已經無機會。」
我：「你考兩次DSE咪得囉，又可以再玩多次。」
阿彥：「咁樣咪浪費一年青春，我先唔制。」
我：「哈哈，我只係對我班女有少少覺得唔好意思。」
阿彥：「少有喎，我仲以為你食完就算。」
我：「我都唔知自己諗咩，比賽差唔多開始，我地落去啦。」
我同佢落到去更衣室，今次我換返短褲同釘鞋，認真少少唔再留力。
然後我亦都好順利咁攞左呢個60m第一名，除左條仆街之外，我諗我應該真係跑贏所有人。
至於場100m要等到最後先有得跑，我諗係因為甲組100m係成間學校最刺激嘅比賽，學校最勁個啲人都會跑，所以留返係壓軸。
而我同阿彥只就可以百無聊賴咁睇其他人玩，on99咁坐係看台到唔知做咩好。
睇睇下我feel到有人掂我，我一拎過去發現原來係珮恩。
阿彥：「我唔阻你地啦，自動彈開先。」然後佢就唔知跑左去邊。
我：「你唔係要做工作人員架咩？做咩上黎嘅？」
珮恩：「我掛住你呀嘛，所以咪突登叫人幫我頂十分鐘黎搵你囉。」
我：「我嘅bb真係抵錫~」我趁無人見到就咀左落去。
珮恩：「嗯，但係有啲野我想問你...」
我：「唔？做咩成個人怪怪地咁，係咪有啲咩事？」
珮恩：「我想問下...你同琴日個嗰男仔有咩關係...？」
琴日個嗰男仔...？志霖...？
我：「你講緊...志霖...？」
珮恩：「係呀...」
我：「做咩咁問先？我同佢唔係朋友，亦都唔算係敵人。」
珮恩：「佢係我前男朋友...我見你地琴日好似唔知傾緊啲咩，所以我...」
我：「你講咩話！！！條仆街係你前男朋友？！」
珮恩：「你冷靜啲先啦...比我講埋先好無...？」好彩個句仆街無比老師聽到。
我：「得，宜家你講啦。」我深呼吸再同佢講。
珮恩：「我見你地講到眼神都唔同埋，以為你地想打交...所以想問清楚你囉。」
我：「咁不如我問返你，你兩個邊個講分手先？」
珮恩：「我囉，有次我見到佢去左溝其他女仔，我咪上前鬧佢，點知佢仲鬧返我轉頭，話我阻住佢，我仲記得個陣我喊到傻左，同佢講完分手之後就即刻跑走。」
我：「咁你都算好彩，比起個啲比佢玩到想自殺嘅女仔，你都唔算太投入係段感情到。」
珮恩：「咩意思？點解我聽唔明你講咩？」
我：「唔明就算啦，呢啲小事唔洗太在意。」我摸一摸佢個頭再講。
本身我都無諗住太在意，但你連珮恩都都夠膽玩，我都無辦法唔在意落去，我已經捉實拳頭想行去打佢，但再一次比阿彥阻止。
阿彥：「你咁嬲都無用，就算你打殘佢都改變唔到所有野，因為佢而死嘅女仔都唔會翸生。」
我：「唔通叫我咩都唔做啦喎？佢一日唔死，一日仲會有多一個女仔受害。」
阿彥：「或者你同佢講條件囉，佢輸左你要佢做咩都得，而你輸左佢要你做咩都得。」
我：「唔錯嘅主意喎。」
咁我都直接將所有野跳過哂，黎到大家最期望男子甲組100m決賽，因為我唔想再開多一章寫陸運會。
黎到跑道上面點名，得返最後嘅八個人係到，雖然無一個係識，但睇落去個嗰都係跑得嘅人。
最重要嘅人物終於行左過黎，仲用好撚囂張嘅樣望住我地。
志霖：「大家幾好嘛，呢啲就係要同我鬥嘅人拿？睇黎唔錯喎。」
我：「同我過黎講兩句。」我用一種命令嘅語氣同佢講。
志霖：「好呀，睇下你輸之前有啲咩講。」佢一面輕鬆嘅樣子。
我：「敢唔敢同我玩一樣野，如果我贏左，你要同所有受過傷害嘅女仔道歉同埋以後唔可以再玩人感情。」
志霖：「喂喂喂，得我單方面嘅？咁如果你輸左嘅話，我要你係學校操場裸跑十個圈，咁做好似衰左啲，益你裸下身就算啦，就算比人捉都唔可以停，一定要跑夠十個圈。」
我：「好，講得出做得到，唔可以走數，如果你走數嘅話我將你由學校天台推落去。」
志霖：「用死亡黎威脅我囉？不過我本身就係唔會走數嘅人，你都係擔心你自己先啦。」
黎到最後嘅時刻，我同佢已經係條跑道上面，我知自己唔可以輸，一定要幫所有女仔攞返公道，尤其係珮恩。
(無錯，我諗過都係留返下一章再寫，十分抱歉，利申我愛大家。)