《夾出一個她》: 再始動（四） 『感想』
《夾出一個她》再始動（四）
-
『感想』
-
人生第一個長篇連載故事，終於可以寫感想，同大家廢噏一番。
-
唔知睇緊呢篇文嘅你，有幾多係因為《夾出一個她》而認識我，從而認識澄澄故事台其他作品？如果可以，不妨留言講你喺邊度初次邂逅澄澄啊！
-
呢個故事令到我識到好多初代嘅讀者，而呢班初代嘅讀者對故事台嘅發展意義重大，佢哋好多時候會俾好多寶貴而有用嘅意見我，甚或唔少嘅讀者最後成為咗我現實上嘅好朋友，每一個留言、每一個意見、每一條Direct message我都印象深刻，成為之後寫得更好嘅指標，獲得你哋嘅讚賞，我真係好開心。即使係比較負面嘅評價，我都好欣然接受，你哋係想我好先俾啲負面意見，想我更加進步，每個善意嘅批評我都努力改善，做到最好，對得住自己嘅作品。
-
當然各大小說平台嘅排行榜亦都令我對自己嘅創作更有信心，有幸上到紙言追稿排行榜第九名，亦都上過人氣文章小說單日排行榜嘅二十八名，甚至TBC…人人人氣榜都有十三個禮拜上榜。種種推動我寫作嘅動力，又令到更加多讀者認識我嘅故事。
-
去到結局，真係好唔捨得一個咁多view數嘅故事去到呢刻就完，但難道想將一個故事變成沒完沒了嘅肥皂劇？View數一定會不斷累積，不過故事嘅質素一定會低，讀者有機會因為質素放下而流失，而且睇得多都會審美疲勞啦！
-
唯有按照大綱鋪排將故事完結，而留待他日可以加推後記或者番外篇，再續故事前緣。
-
去到最近考完DSE，終於有時間將兩年前嘅作品《霹啪文壇頒獎典禮》搬到去再始動系列之上，完完整整咁完結《夾出一個她》成個小說，有頭有尾。原本構思係想以兩年前嘅文章成為框架，用而家嘅文筆重新演繹。最後決定唔再編寫，簡簡單單將內容輕微修改就算，保留返以前文筆欠奉嘅味道。相信睇而家嘅連載作品同兩年前嘅作品都睇到我喺創作路上嘅成長，文筆同故事都一直喺度改善同進步，我相信之後嘅文章都係會越嚟越好，大家就拭目以待啦！
------
或許大家都可能有興趣知道，呢個故事到底點樣爆出嚟？就係咁：當時夾公仔機非常盛行，就好似便利店「總有一間喺附近」，可惜夾嚟夾去都係得公仔、figure毫無新意，有啲新意咪夾電話同遊戲機囉！根據《賭博條例》「有獎娛樂遊戲牌照」寫到明，每一次獎品的價值不可超過三百港元。
-
咁夾女朋友又算唔算違法呢？女朋友嘅價值係視乎你點睇，可以無價，亦都可以一文不值，相信喺浚彥嘅角度就係千金小姐喇！
-
故事選址喺西灣河太安樓係因為多嘢食，而且樓齡算高，迎合浚彥嘅家境同工作需要。「燒夜店」原型咪就係太安樓入面一間著名嘅串燒店，為咗故事嘅設定，將外賣店變成可供堂食。
-
兩位主角嘅學校設定歸於現實上兩間中學，當然就唔喺度開名，大家就估下，話唔定有獎品㗎。
-
最後就自爆一下故事開頭浚彥嘅撚手小菜-意大利燴飯，正正就係我細個最愛嘅頹食項目，簡簡單單一罐忌廉湯撈飯，有時食豪啲就加些少急凍海鮮，真心方便又好食。
-
故事嘅結尾向某套好出名嘅動漫致敬，大家不妨估下。
-
《夾出一個她》behind the scene 去到呢度，其實文章有好多彩蛋留待大家發掘㗎！睇完今集不妨再重新回味浚彥同蕊心嘅甜蜜之旅啦！
------
感想文章嘅最後特別衷心感謝希逸同安琪，呢兩位好朋友義不容辭為故事付出咗好多嘢，成個故事嘅主要大綱就係同佢哋兩位一齊去露營嘅時候傾出嚟，三日兩夜嘅露營主要就係傾故事大綱，到落實故事構思嘅時候，安琪為故事嘅鋪排俾咗好多重要嘅意見，甚至去到連載期間都一直追睇，每集連載過後都有俾意見，想我寫得更好，想故事更加吸引人去追看，亦都幫手宣傳我嘅作品，幫我儲咗一部分讀者。
-
去到故事封面設計，希逸同我畫咗好多個設計，務求將故事封面畫得最好最靚，仲記得希逸為故事封面辛苦嘅付出，不斷聽我嘅意見去修改，最後嘅成品正正就係而家嘅封面，而安琪知道故事要出街之後，特登為《夾出一個她》題字，原本由電腦字變成手寫書法字，令到封面更加靚。
-
之後要多謝歐陽浚彥（故事名嚟），現實上成日惡搞我啲故事，整咗好多正memes抽故事台水，大家可以睇Instagram限時動態精選嘅「薪水小偷」，佢整咗好多高質而搞笑嘅memes惡搞澄澄故事台。
-
故事入面，佢同楚翹閃到爆登；喺現實上，佢係同阿妹-歐陽蕊心拍拖，閃出一個新境界，小弟見證住佢哋曖昧到相戀，真係sweet爆囉，唔知幾時可以到我閃呢？我都好想放閃啊！
-
最重要要多謝文字編輯HiHi，HiHi都加入咗澄澄故事台接近兩個年頭，幫我喺故事中後期俾咗好多意見我，令到故事冇咁悶。HiHi永遠都係世界上第一個睇每篇新鮮滾熱辣寫完嘅文。放心將來故事台大把文要你睇，差你好多好多餐飯，到時過嚟幫襯我啦！
-
當然都要多謝睇到呢度嘅你，去到呢度第七十一集，啱啱好十二萬字，兩年四個月嘅時間，見證住澄澄故事台嘅發展，冇呢個故事，我相信自己都唔會有呢刻嘅成就，故事台都唔會維持到咁耐。
-
呢個係憧憬愛情嘅故事去到呢度就正式圓滿結束，下個故事將會係對愛情嘅失望，心水清嘅讀者應該知係咩故事嚟，冇錯就係《前度超渡師》，呢個故同時都迎接緊尾聲，唔知文杰同阿嘈最後去定留呢？就喺度賣個關子喇！
------
成長路上，感恩有你改變我的興趣。
-
一日寫文，一世寫文。
-
澄澄
2022/07/31
IG：chingchingstory