《夾出一個她》: 再始動（一） 最佳男/女配角
敲碗咗勁耐嘅《夾出一個她》終於都迎來Season 2，當然唔會係續寫個故事啦！唔再寫歐陽浚彥同顔楚翹嘅愛情故事，話晒個故事已經圓滿落幕，有情人終成眷屬。
-
作為澄澄故事台最受歡迎嘅故事，點可以俾佢停！
-
適逢最近執緊《夾出一個她》小說格式版 嘅PDF，突然想加返一啲back of scene嘅劇情，故事嘅番外篇將會加插早前《#霹啪文壇頒獎典禮》嘅頒獎片段，同埋加埋最後嘅作者感想，希望可以係一個完整嘅網絡連載小說。
-
頒獎典禮嘅情節會進行輕微嘅修葺，並會成為《夾出一個她》再始動嘅情節，因為頒獎典禮嘅時間線將會係《夾出一個她》之後嘅情節，為咗大家可以有個完整嘅版本，所以都一併納入故事入面，大家不妨搵下兩篇文有咩改動。
－－－－－－
「最佳男配角」頒獎情節
「燈鄧凳鄧燈凳敦凳躉凳躉……」
-
歡迎嚟到7月24號夜晚10點，又係我-澄叔，為大家主持《霹啪文壇頒獎典禮》。今日嘅獎就係「最佳男配角」。
-
霹啪文壇2020最佳男配角。
-
係你「哋」喇！澄叔同埋宵夜鋪老闆。
-
澄叔-《106與她的邂逅》飾演巴士司機一名，其麻甩佬嘅車手性格深受乘客歡迎，每朝由澄叔揸嘅班次都坐滿乘客，可見澄叔大受歡迎。（梗係啦，朝早繁忙時間紅隧過海線冇人坐就死得啦。）
-
宵夜鋪老闆-《夾出一個她》飾演宵夜鋪老闆，其風趣幽默嘅性格同埋優質嘅食物質素吸引唔少客人由唔同地方專程去佢間宵夜鋪-「燒夜店」光臨。「燒夜店」最出名嘅嘢食就係即燒牛歡喜，每日一定冇淨，聽聞要打電話留貨。
-
台下觀眾：「咦！點解冇人上台攞獎嘅？」
-
實不相瞞，其實兩個角色甚至《澄叔的1.5米距離》同《霹啪文壇頒獎典禮》嘅主持都係我嚟。
-
冇辦法，而家搵食艱難，咩都要做下，搵下外快㗎喇！跟住多謝咁多位讀者咁鍾意一個中年大叔，又要睇我撞鬼、又要睇我揸巴士、夜晚又要睇我燒串燒啦！真係早、午、晚都見都我。另外要多謝我老婆，冇佢嘅支持都冇我啦！老婆，我愛你！
-
有各位讀者嘅支持同鼓勵，我先可以由故事台開頭，從巴士司機，到而家做燒夜店老闆，兜兜轉轉做到而家。雖然我嘅戲都麻麻，但相信之後會更好嘅。
-
細細聲講：我之後都會喺澄澄唔同嘅故事入面穿插，成為故事入面嘅彩蛋，大家可以喺唔同故事見到有我嘅出現，話晒澄叔都係故事台嘅signature嚟，又靚仔又有型，出場仲多個澄澄本人。
－－－－－－
「最佳女配角」頒獎情節
「燈鄧凳鄧燈凳敦凳躉凳躉……」
-
歡迎大家嚟到《霹啪文壇頒獎典禮》。繼續都係我-澄叔，為大家頒發獎項。之前收到投訴，話啲投票率係咪自己吹出嚟。想清清返，所有投票都係讀者「一人一票」投票出嚟嘅。投票過程絕對公平、公開、公正。
-
今日頒呢個獎嘅受歡迎程度係僅次於「最佳女主角」。今日要頒嘅就係「最佳女配角」。
-
霹啪文壇2020最佳女配角。
-
嘩！咁多人投佢，佢係咪種票㗎！叫佢出嚟回應啦-歐陽蕊心。
-
歐陽蕊心《夾出一個她》飾演男主角-歐陽浚彥個阿妹。阿妹爽直、放蕩性格深受學校嘅毒男歡迎。其歡迎程度拍得住Youtube片段《20110218台北世貿電玩展之Mega戰鬥哥》，可以話係紅出一個新境界。
------
蕊心：「首先我要多謝各位讀者咁支持我。另外，我冇種票㗎！我淨係叫學校啲兵仔投票。」
-
澄叔：「聽聞你喺學校好受歡迎，講嚟聽下。」
-
蕊心：「邊係呢！我唔受歡迎㗎！我知道，我想要啲咩，開口就得。」
-
澄叔：「咁都話唔受歡迎，真係吹你唔脹！不如講下你嘅新男朋友-希逸，故事入面你睇嚟好似好想食咗佢咁喎。」
-
蕊心：「梗係啦，雖然嗰次唔小心篤中小希逸，係細咗啲，但佢啲腹肌真係好鬼死正。」
-
澄叔：「阿囡，咪話阿叔長氣，記得要做足安全措施吖！唔好害咗BB。」
-
蕊心：「我未夠16㗎！我唔會亂咁『造人』嘅。」
-
澄叔：「咁都好啲，其實我想代各位觀眾問一個問題，唔知你介唔介意呢？」
-
蕊心：「梗係唔介意啦！」
-
澄叔：「我想問你其實有冇曾經埋怨過屋企？例如冇父母、阿哥俾嘅零用錢少等等。」
-
蕊心：「開頭真係有，父母離去嗰陣時，我仲細，我曾經埋怨自己冇家庭溫暖。我亦都曾經埋怨過窮，屋企冇咗經濟支撐，阿哥放學就去你嗰度返工，佢就擔任埋我嘅米飯班主。細細個成日埋怨零用錢少。但大個之後就明白阿哥嘅辛苦，佢一個人承受晒所有嘢，所以我之後都冇埋怨屋企。」
-
澄叔：「咁就好喇！咁你覺得楚翹份人點？」
-
蕊心：「簡直正爆啦！又靚女、身材又好、仲要勁nice。對我同阿哥超級好。我超鍾意佢。」
-
澄叔：「第時會唔會介紹下你學校啲兵仔吖！」
-
蕊心：「唔知㗎，睇下作者之後會唔會寫啲兵兵嘅戲份啦！」
-
澄叔：「係囉！我又問下澄澄幾時加我同老婆係『燒夜店』啲甜蜜戲份先。」
-
蕊心：「你見唔見到坐喺觀眾席嘅澄澄睥緊我哋？」
-
澄叔：「咦！係喎，都係唔好講咁多喇！費事之後冇角色做，或者要執屎。」
-
蕊心：「係啦！我哋私底下再傾啦！澄澄嬲嬲豬㗎喇！」
-
澄叔：「好啦！再次恭喜歐陽蕊心獲得『最佳女主角』，同希逸要點甜蜜蜜，閃出一個新境界。」
－－－－－－
再次衷心感謝大家對《夾出一個她》嘅支持，再始動系列會逢星期三連載；而《前度超渡師》將會維持逢星期日連載。
（待續 To be continued）
IG：chingchingstory