《夾出一個她》: 第三十七集-除夕（上）
今日係澄澄故事台開台一年半，多謝大家支持！Happy Birthday to me！
-
楚翹：「哎！見你咁慘，要返你喇！」
-
我：「被大家遺棄的小孩，總有人收留的。」
-
六個人吹水吹到第二朝收舖，收完鋪就好似平時一樣，返屋企沖涼上床瞓覺。 唯一唔同嘅係……由一個三人屋企變咗做四人屋企。
-
之後呢兩日，希逸都係喺我屋企瞓，大家瞓醒就落去「燒夜店」，我同楚翹就梗係返工，而阿妹同希逸呢……就當然係去放閃同埋阻住我哋拍拖㗎啦！
-
阿妹：「認真啲啦！你哋返緊工㗎！」
-
希逸：「工作期間就唔好拍拖啦！」
-
阿妹：「而家燒串燒定放閃光彈吖！」
-
希逸：「假公濟私，毫無專業道德。」
-
呢兩條茂利真係阻人拍拖尤如殺人父母，不過佢哋啲「篤灰」對白真係搞到我哋哭笑不得。就連啲情侶熟客都話埋我哋一份，搞到大家笑到見牙唔見眼，笑到gap gap 聲，好彩上面啲住客冇投訴我哋嘈喧巴閉咋！
-
可能係舊樓嘅關係，太安樓周圍都冇乜聖誕氣氛，唯一所謂嘅「聖誕氣氛」就喺大堂嗰度有一棵聖誕樹，同埋牆上掛咗「聖誕快樂」同埋「Merry Christmas」呢幾隻字。作為一間有歷史嘅店舖，「燒夜店」當然亦都冇奢華嘅聖誕裝飾，但我哋有搞笑嘅氣氛，喺呢個寒冷嘅聖誕，帶嚟一啲溫暖。
-
［梗係啦！我都冇講爛gag，唔係個個都變咗雪條啦！］
------
12月31日，除夕。
-
原本老闆話休息一晚，去海傍倒數，迎接新一年，點知突然叫我哋返去……
-
老闆：「咁倉卒叫大家返嚟，有事想大家幫手。」
-
我：「唔緊要，反正今晚都係諗住食完嘢就去出面海傍倒數。」
-
老闆：「咁就啱喇！等等，我攞架烈火戰車出嚟先。」
-
楚翹：「烈火戰車？」
-
老闆：「燈凳！就係烈火戰車喇！」
-
我：「喂！正喎！好耐冇見過小販推車仔賣嘢食。」
-
楚翹：「今晚我哋去賣？」
-
老闆：「冇錯，我哋整咗2架車，一架賣紅豆沙、綠豆沙，而另外一架就燒串燒。」
-
我：「得我哋，會唔會俾人捉㗎？」
-
老闆娘：「太安樓好多攤檔都一齊去推車仔，有燒賣魚蛋、牛雜、格仔餅同埋雞蛋仔都有。」
-
我：「咁就得啦！唔同店舖合作，一齊去海傍擺檔，相輔相成。」
-
老闆：「放心，有咩事，我哋會幫你哋交罰款嘅。」
-
楚翹：「講呢啲，咁而家有咩要幫手？」
-
老闆娘：「我哋而家煲緊紅豆沙同綠豆沙。你哋執定啲串燒，擺落雪箱到。同埋你哋裝飾下架車，我print咗啲紙都可以加落去。」
-
楚翹：「咁藝術嘅嘢就交俾我哋啦！」
-
老闆：「今晚真係辛苦晒大家。」
-
我：「唔好咁講，大家一路倒數，一路食嘢，夠晒溫暖。」
-
楚翹：「順便宣傳下我哋太安樓多嘢食呀嘛！」
-
我：「有冇興趣叫埋阿妹同希逸落嚟幫手。」
-
老闆：「好吖！大家一齊玩下都得。」
-
我：「咁我打電話俾佢哋先。」
------
阿妹：「阿哥咩事，你唔係返緊工咩？」
-
我：「國家有任務俾你哋兩個。」
-
阿妹：「今晚我同希逸去海傍倒數，費事阻住你哋拍拖。」
-
我：「有冇興趣做小販檔？」
-
阿妹：「你講好似黃大仙小巴總站隔離嗰啲推車仔小販檔？」
-
我：「就係嗰啲喇！澄叔搞咗2架車，諗住推出去海傍，陣間倒數嗰陣時就做下生意咁樣。」
-
阿妹：「幾點邊度等？」
-
我：「而家隨時落得嚟幫手。」
-
阿妹：「好！陣間見。」
------
我：「好！搞掂，阿妹同希逸陣間落嚟。」
-
老闆：「真係辛苦晒你哋，要特登返嚟幫手。」
-
我：「阿妹平時好鍾意食呢啲小販推車檔，我哋之前去黃大仙，阿妹係咁狂掃街。」
-
老闆娘：「啲小販檔喺邊度？」
-
我：「喺黃大仙小巴總站隔離嗰個巷仔入面。」
-
老闆：「搵日可以去試下，反正呢度搭地鐵去好快。」
-
我：「唔好搭地鐵啦！又上又落，又要轉幾程車，仲要冇位坐，梗係坐106啦，總站落過對面就係。」
-
老闆娘：「106好喎，搭巴士仲可以遊車河。」
-
老闆：「106梗係好，記唔記得之前睇嗰本小說《106與她的邂逅》？」
-
老闆娘：「我記得吖！真係好好睇，呀一同Rachel嘅邂逅真係好正，然後你仲要係巴士司機㖭。」
-
老闆：「冇辦法啦！靚仔咪多人用我嗰名囉！」
-
老闆娘：「瞓啦柒頭！」
-
我：「估唔到你哋連《106與她的邂逅》都有睇，我以為淨係得後生仔先睇㖭。」
-
老闆娘：「乜我哋而家好老咩？」
-
老闆：「睇小說唔係後生仔嘅專利嚟。」
-
楚翹：「我都有睇呢個故事，喺地府嗰度好好笑。」
-
希逸：「估唔到呢個故事可以橫跨咗咁多代。」
-
我：「冇辦法！呢個故事真係好好睇！」
-
希逸：「我都未睇過呢個故事，得閒去睇下先。」
-
阿妹：「喺IG search 『澄澄故事台』就得，或者去紙言、TBC、Penana search 澄澄都可以。」
-
希逸：「都幾多方式可以睇喎。」
-
老闆娘：「係吖！作者好有心機㗎！聽聞佢自己寫埋個網站係擺佢啲故事㖭。」
-
希逸：「個網站喺邊度搵？」
-
老闆：「你喺Google search『澄澄故事台』第一個顯示就係嗰個澄澄故事台嘅網站。」
-
希逸：「聽你哋咁講，佢啲故事好似好吸引，得閒去睇下先。」
-
（待續 To be continued）
IG：chingchingstory