《夾出一個她》: 第三十二集-牛歡喜（下）
我：「澄叔，好耐冇見喇！ 」
-
老闆：「各位，真係好耐冇見。」
-
老闆娘：「乜你哋咁早嘅？」
-
楚翹：「係吖！早啲返嚟幫手，準備定啲食材。」
-
老闆：「呢位高高瘦瘦嘅仁兄係？」
-
阿妹：「佢叫希逸，佢係我嘅男朋友，仲係阿哥嘅同學㖭。」
-
希逸：「老闆、老闆娘你好！我叫希逸。」
-
老闆：「隨便坐啦！你要對阿妹好啲啊！我當佢係我嘅女嚟㗎喇！」
-
希逸：「知道喇！老闆。」
-
我：「澄叔，今晚有冇booking吖？」
-
老闆：「得你哋幾個，睇下夜啲有冇walk-in啦！」
-
我：「大家食咩？我而家開爐燒。」
-
阿妹：「我要雞串。」
-
希逸：「有咩好推介？」
-
我：「呢度推介沙嗲系列。豬、牛、羊、雞樣樣有。最暢銷嘅係燒牛柳粒、燒豬頸肉同埋燒雞串。」
-
楚翹：「燒牛脷同羊肉串都好好食㗎！啊！唔記得講，最新商品，燒雞子。」
-
希逸：「燒雞子就唔使喇！其他都要吖！」
-
楚翹：「燒雞子好好食㗎喎，我哋燒到爆汁㗎！」
-
阿妹：「咁我要吖！希逸同我share食。」
-
希逸：「唔使啦！我夠飽㗎喇！仲有牛歡喜呀嘛！」
-
阿妹：「唔得！你要食吖！」
-
希逸：「唔食。」
-
我：「咁我落住單先，你哋慢慢諗。」
-
老闆：「彥仔，每樣燒多少少啊！我哋兩公婆都一齊食，順便同你哋慶祝聖誕節。」
-
我：「收到！」
-
老闆娘：「順便燒多啲雞子吖！」
-
老闆：「我唔食雞子㗎！」
-
老闆娘：「你哋班麻甩佬都唔食雞子，今日我哋就要訓練你哋食雞子。」
-
阿妹：「老闆娘公道！」
-
楚翹：「老闆娘英明！」
-
老闆娘：「雞子咁好食，唔食唔得。」
-
老闆：「原來各位男士都唔食雞子，我有伴喇！」
-
楚翹：「有伴……同你一齊食呀嘛！」
-
老闆：「唔好啦！各位男士，我哋要展現雄性魅力，振夫綱吖！」
-
我：「啱！我哋要振夫綱！」
-
希逸：「堅決唔食雞子。」
-
楚翹：「你哋三位諗下好喇！我燒緊喇！」
-
我：「燒咗返唔到轉頭，各位來生再見。」
-
希逸：「雖然食過一次，但真係好撚難食。」
-
我：「冇人想死兩次㗎！」
-
楚翹：「食雞子係好享受嘅事嚟！」
-
我：「各位！上路之前，我哋食咗牛歡喜先啦！熟咗喇！」
-
希逸：「食完女就食仔。」
-
老闆：「食完好嘢去食屎。」
-
老闆娘：「你哋三隻嘢講好似去死咁。」
-
老闆：「慘過去死吖！」
-
我：「各位，試下呢度期間限定嘅即燒牛歡喜。」
-
希逸：「等我試下先……嘩！好好食吖！」
-
老闆：「呢啲牛歡喜新鮮㗎！每日新鮮運到，到貨即刻醃，即日攞嚟燒。一隻牛得咁多，燒完就縮㗎喇！」
-
希逸：「啲肉好爽、好彈牙，啲醃料同牛歡喜好夾。」
-
我：「都話冇介紹錯㗎啦！食過返唔到轉頭㗎喇！」
-
老闆：「你哋鍾意食就好！而家冇乜人識食呢啲，覺得好核突。」
-
希逸：「邊度核突呢！咪都係肉同筋。」
-
阿妹：「咪係囉！咁又唔見你哋食雞子！」
-
我：「雞子係內臟，唔係肉。」
-
老闆娘：「牛肚夠係內臟啦！你哋又食。」
-
我：「雞子真係好核突，咬落去會爆漿。」
-
老闆：「仲要嗰啲漿係……」
-
老闆娘：「挑！你哋都掂唔少啦！你哋冇嘅？」
-
我：「我哋唔會掂人哋嗰啲㗎嘛。」
-
楚翹：「唔好講咁多喇！大家起筷啦！」
-
老闆：「走唔甩㗎喇！來生再見啦！」
-
我：「我哋三個靚仔，雖然不能同年同月同日生，但能同年同月同日瓜老襯。」
-
希逸：「我倒數三聲，大家一齊擺落口。」
-
「3、2、1」
-
「吖~~~~~」
-
我：「食咗第三次，都係接受唔到咁核突嘅質感同味道。」
-
希逸：「啲『精華』真係好核突。」
-
阿妹：「食多幾次就習慣㗎喇！」
-
我：「黐線！叫你食多幾次屎會唔會更加習慣吖！」
-
楚翹：「唔會喎。」
-
我：「咁咪係囉！所以我哋唔食雞子係有原因。」
-
老闆：「屎就食完喇！我哋而家開餐啦！」
-
「好！」
-
「飲杯吖！各位！」
-
「飲杯！」
-
老闆娘：「係喎！我整咗啲泰式鳳爪，彥仔，你喺雪櫃攞出嚟吖！」
-
我：「收到。」
-
希逸：「真係好多謝老闆同老闆娘招待！」
-
老闆：「客咩氣！平時佢哋咁幫得我哋手，呢啲嘢濕濕碎啦！」
-
希逸：「啲鳳爪真係好好食，夠晒辣。」
-
老闆娘：「你哋鍾意食就好。」
-
我：「唔係講笑，真係好好食，有冇諗住之後做埋其中一款菜式？」
-
老闆娘：「平時都係老公食得多，今次都係第一次整俾外人食。」
-
楚翹：「真係得，反正泰式鳳爪同啤酒好夾，簡直fit到漏油。」
-
阿妹：「反正燒串燒要時間，有客人嗌咗泰式鳳爪又可以即刻上，佢哋可以邊食邊等。」
-
老闆：「有得諗喎。」
-
老闆娘：「其實整泰式鳳爪好快，咁聽日開始就加落餐單到啦！」
-
楚翹：「好嘢！」
-
老闆娘：「大家隨便食啦！」
-
老闆：「唔使客氣㗎！」
-
我：「咁我哋就唔客氣喇！」
-
（待續 To be continued）
IG：chingchingstory