《夾出一個她》: 第八集-聖誕前夕

阿妹：「你個衰佬，你係咪想嚇死我？啱先楚翹打俾我，我以為你哋兩個整蠱我，點知你真係喺條街度暈Q咗。你以後唔準咁辛苦，要休息多啲，知唔知？」
-
我：「放心啦，下次唔會再暈㗎喇。」
-
阿妹：「仲有下次？」
-
我：「冇下次，冇下次。」
-
阿妹：「算你啦！不過唔該你真係要好好對待楚翹。啱先你暈咗，佢捉住你隻手，喊到七彩吖，佢明明識咗你唔係好耐，都為你而喊。我真係唔明你有咩特點值得佢喊？」
-




我：「我知 ，醫生啱先都有講楚翹嘅事。其實我真係好想報答佢，但唔知點樣報答佢先好？」
-
阿妹：「想報答人定想追人吖？不過追人就要快喇，時光總不留人。放心啦，我好識do，唔會阻住你哋拍拖嘅。」
-
我：「真係報答，完全冇非分之想㗎！」
-
阿妹：「我幫你問下楚翹啦，我收線人費㗎！」
-
我：「是但你啦！係呢，啲住院費同手續點？」
-




阿妹：「啲住院費同埋手續，宵夜鋪老闆同老闆娘幫你搞咗喇！」
-
我：「吓！乜老闆同老闆娘都嚟咗？又要佢哋擔心我，咁樣好唔好意思㗎！」
-
阿妹：「冇辦法啦！簽手續要大人先可以簽，所以就搵咗佢哋喇！」
-
我：「咪住！但係啱先楚翹話佢出去做手續㗎喎！」
-
阿妹：「係咩？啱先喺房門撞到佢，佢話佢係去廁所㗎喎！」
-




我：「佢做咩要呃我？」
-
阿妹：「呵呵唔知呢，可能佢鍾意咗你呢？」
-
我：「頂你咪講笑啦！」
-
呢個時候，老闆同老闆娘都入咗嚟。
-
老闆：「浚彥，你無事呀嘛！」
-
我：「我無事吖，多謝關心。啲住院費就喺之後嘅人工扣啦，要你哋破費。」
-
老闆：「住院費唔使你擔心，我唔會喺你人工入面扣除嘅。你呢幾日都唔使返工，好好哋留喺屋企休息啦。」
-
我：「但聖誕節嚟緊，一定好多人嚟食，得你哋兩個做唔做得切？」




-
老闆：「反正我同老婆都好耐冇休息，就休息一個禮拜啦！老婆大人，你話去日本好唔好？」
-
老闆娘：「我哋兩個加埋都100歲啦，仲嗲咩啫！」
-
老闆：「就咁話，我陣間去book機票同酒店先。」
-
我：「老闆，真係好唔好意思，要你同老闆娘特登過嚟醫院㖭。」
-
老闆：「唔好咁講，呢啲係做老闆應分嘅，唔阻你喇，陣間執好嘢就可以走㗎喇。」
-
我：「好！唔該晒老闆！」
-
話後，老闆同老闆娘就走咗，我都準備執嘢走。
-




趁著執嘢嘅時候，我諗咗個好複雜嘅問題。
-
楚翹明明伸出隻手就有大把錢用，但都唔介意通宵陪我去返工；明明佢好驚啲曱甴、老鼠，都喺我面前扮唔驚；明明屋企有大床瞓，卻又唔介意去一個細單位瞓一張單人床；明明屋企有專業大廚，想食咩都冇問題，但又唔介意食埋啲我煮嘅頹廢垃圾意大利燴飯（即係一啲白飯加啲罐頭湯同幾隻冰鮮蝦）。點解楚翹會唔介意，係愛吖？定係責任吖？
-
［可能我太靚仔，所以楚翹唔介意］
-
楚翹：「浚彥你無事呀嘛，做咩發呆嘅？」
-
我唔知點回應，我就企咗起身，一嘢攬住楚翹。
-
我：「多謝你吖！楚翹。」
-
楚翹突然又喊咗出嚟，我唔知自己係咪做錯嘢？
-
楚翹：「嘿！講呢啲！我哋係一家人嚟㗎嘛，以後仲要多多關照㗎。」




-
阿妹：「今次真係大團圓結局吖！大家聖誕節有冇嘢做，不如我哋三個喺屋企搞個聖誕party吖！」
-
我：「對唔住，我要陪人過聖誕節。」
-
楚翹：「吓！你要陪邊個吖？」
-
好明顯楚翹喺度呷醋，佢紅都面晒，媽！我得咗喇。
-
我：「我要陪我最一生中最重要嘅人，一個叫歐陽蕊心、一個叫顏楚翹。」
-
楚翹：「妖，你去食屎啦！今個聖誕節，你唔使旨意有好日子過。」
-
我：「嚟啦，我等你慢慢懲罰我。」
-




楚翹：「核核突突。」
-
阿妹細細聲喺我耳邊講
-
「阿哥，而家有個大機會俾你去報答人喇，你識做啦！」
-
（待續 To be continued）

IG：chingchingstory