《夾出一個她》: 第七集- 回憶備份

我：「我…我其實我…」
-
腦海突然閃起一段回憶，我諗返起小學嗰陣時同一個同班女仔表白失敗嘅片段。
-------------
（小四嗰年）
-
我暗戀咗隔離位嘅女同學都有段時間。嗰日，我約咗佢放學後留喺班房會面。我記得我參考咗電視劇嘅男主角喺表白前寫咗封情信，喺封情信入面表達我對佢嘅愛意。封信嘅內容我都已經唔太記得，我淨係記得求其喺網上抄咗周杰倫嘅「開不了口」歌詞就當情信。
-
「才離開沒多久就開始，擔心今天的妳過的好不好，整個畫面是妳，想妳想的睡不著。」
-




嗰日初春來臨，落著微微細雨，我記得嗰陣時得我哋兩個喺班房入面，我尷尬咁遞咗封信俾嗰個女同學，然後我就開口講我諗咗好耐嘅對白。
-
我：「我…其實我鍾意你，你…你可唔可以做我女朋友吖？」
-
「對唔住！我唔鍾意你！」
-
當時天空閃咗一下電，應該係徹徹底底咁話我失敗咗。同時，個女仔還咗封信俾我就揚長而去。出面嘅天空就好似為我而喊，表達我嘅絕望情緒。
-
［還會記起嗎，那次課室裡告白，背練好的對白，亦害怕；還會記起嗎，那晚雨中撐著傘，沈默不聲對望，淚灑。］-Tonick 回憶備份
-




返到屋企，我記得當時老竇用HiFi播緊Beyond嘅「喜歡你」：「細雨帶風濕透黃昏的街道，沫去雨水雙眼無故地仰望，望向孤單的晚燈，是那傷感的記憶。」歌詞十分應景，完全講中咗我嘅心聲。於是我攞返封已經「失效」咗嘅情信、揸返尋晚仲充滿希望攞嚟寫情信嘅名貴原子筆，寫返自己嘅心聲。
-
「細雨帶風濕透黃昏的街道，沫去雨水雙眼無故地仰望，望向孤單的晚燈，是那傷感的記憶。再次泛起心裏無數的思念，已往片刻歡笑仍掛在臉上，願妳此刻可會知，是我衷心的說聲；喜歡你XXX。」
--------------
我：「吖！」
-
楚翹：「浚彥，你冇事呀嘛？你做咩突然打冷震嘅？」
-
我：「冇事，突然間有啲凍啫！」
-




楚翹：「啱先你係咪有嘢想同我講？」
-
我：「都...都係冇喇！」
-
［冇理由㗎，點會唔記得咗初戀女仔個名㗎？又會突然諗唔返個女仔叫咩名嘅？］
-
楚翹：「你係咪真係無事吖？你個樣好似好唔舒服喎？」
-
我：「我…我…我…」
-
「砰！」
-
楚翹：「吖！浚彥你冇事吖嘛？」
----------
我：「呢度邊度嚟㗎？」




-
醫生：「咦！病人，你醒喇！呢度咪醫院囉！」
-
我：「吓！點解我會入咗醫院㗎？」
-
醫生：「你應該平時唔夠瞓，你太攰喇，突然喺條街暈咗。你要休息多啲吖！唔好咁夜瞓！」
-
我：「知道喇醫生，我會休息多啲喇！係呢！楚翹呢？楚翹去咗邊吖！」
-
醫生：「你話啱先送你入嚟嗰個女朋友？」
-
我：「係吖！靚靚哋嗰個吖！」
-
醫生：「唔使擔心，佢咁啱行開咗啫。不過你真係要好好報答你女朋友，佢真係好愛你。啱先你暈咗，佢坐咗喺你隔離，喊住咁捉實你隻手，係咁話你一定無事。」
-




楚翹喺呢個時候入咗嚟，即刻攬到我實一實，突然我膊頭feel到有啲淚水穿過咗我件衫，整濕咗我膊頭，原來係楚翹喊咗出嚟。
-
楚翹：「你無事呀嘛！啱先嚇死我。你知唔知我好擔心你吖！」
-
我：「對唔住，我令到你太擔心。放心，我以後會休息多啲㗎喇！」
-
楚翹：「你呢幾日都唔使去宵夜鋪返工喇，等我去幫你啦！阿妹喺出面吖，我去搞一搞啲手續先，你哋兩個慢慢傾吖！」
-
（待續 To be continued）

IG：chingchingstory