[hehe]《知音人》: 九十二：橫禍

Horace只能站在原地，在Jordan的耳邊說：「無事，無事。」
 
Jordan緊抱著他持續數分鐘，Horace只能用口形跟身旁的父母示意不能跟他們吃飯。他父母點頭回覆他，便帶著困惑的眼神離開。
 
約十分鐘後，Jordan終於冷靜下來，Horace帶他返回自己的家，讓身體十分凌亂的Jordan沖洗下。
 
在Jordan於浴室沖洗的途中，Horace收到了Charlie的電話。
 
Charlie：「喂，Horace。」
Horace：「喂，搞咩呀，佢係我屋企樓下出現，好似周身傷咁既？」




Charlie：「佢補習個學生遲左放，電話又壞左通知唔到我地，然後佢搭的士，點知撞車，送左去急症。」
Horace：「下？咁佢做咩唔留係醫院？」
Charlie：「佢好輕傷啫，但佢無左部電話，搞左好耐先借到電話call我。我咪話我同你都周圍搵緊佢囉，佢就好緊張問我你係邊，我見你提過話返緊屋企，佢就話要衝過黎搵你，阻都阻唔到。」
Horace：「嚇死人咩，唔該哂你，我轉頭陪佢返你度啦。」
Charlie：「你睇住佢啦，我聽佢講野都覺得佢好驚慌，有D擔心佢情緒。」
Horace：「嗯，唔該哂，佢就沖完涼，我轉頭再搵你啦。」
Charlie：「OK，轉頭再講，bye。」
Horace：「bye。」
 
說完這個電話後約兩三分鐘，Jordan就從浴室出來，面上的表情仍然有點不安。




 
Horace走上前主動給他一個擁抱，然後牽著他的手帶他到梳化坐下。
 
Horace：「頭先Charlie同左我講啦，點呀你，痛唔痛呀？」
 
Jordan搖頭，但沒有回話。
 
Horace：「無事啦，我係度。」他把手放在Jordan的肩膀上，以示支持。
 
Jordan把頭依偎在Horace的膊頭上，一直沒有出聲，而Horace也選擇不再說話，留一直空間給Jordan。




 
沉默了約五分鐘後，Jordan終於開聲：「張志鈞。」
 
Horace看著Jordan的眼神，嘗試了解他此刻的感受。
 
Jordan：「頭先撞車果下，我以為自己會無命，成個腦空白一片，成個人唔知有咩反應，直至司機拍左我好多下，我先知道自己無死到，但個腦仍然轉唔到，然後好快救護車就來到送左我上車。
 
然後第一個諗起就係你，我好驚之後見唔到你，但部電話又壞左，成個人好無助，好徬徨。去到醫院，搞完一輪走得既時候，我先記得我約左Charlie佢地，然後就借電話call佢，佢話我知你返左屋企，打比你又無人聽，我就過黎搵你。
 
我知我應該搵返Charlie佢地先，但我真係好想快D見到你，但又唔記得你邊個單位，唯有樓下等到你出現。」
 
Horace見Jordan一邊說一邊眼泛淚光，唯有不停輕拍他的膊頭，讓他知道，他會一直在身邊陪著他。雖然不理解Jordan為何選擇在樓下等他，但相信發生這麼突然的事對他的心理衝擊一定有很大影響，他也不應再問下去。
 
看著Jordan的眼神，Horace突然發現他們復合後的這大半年期間，一直都是Jordan撐著他度過壓力的日子，卻不為意Jordan自己都有很大壓力沒有告訴別人，而這個「飛來橫禍」就把一切的壓力（包括他的不安全感）都逼了出來。
 




Horace：「陪你落去食野好唔好呀？」
 
Jordan點了點頭，兩人站起來，稍為整理一下就出門口。
 
路上Jordan突然說：「死啦。」
Horace：「做咩呀？你無野嘛？」
Jordan：「唔係呀，我頭先係咪幫你係屋企人面前come out？」
 
Horace聽完後笑了出來，他沒想到Jordan這刻竟然在關心這個。
 
Horace：「係都無辦法啦，無野既，放心啦。」