[hehe]《知音人》: 八十一：機會

Horace在唱片公司的訓練密度和強度也隨著訓練期過了一半而逐步加強，這個星期六他的訓練時間表更由早上十時開始直至下午五時。
 
當他完成了兩小時的課堂，準備去附近餐廳吃飯時，在近大門位置被張總監叫住了：「Horace，入黎傾兩句？」
 
本身肚子已餓到打鼓的Horace雖然萬般不願，但也只能折返，進入音樂總監的辦公室。
 
張總監：「Horace，訓練期都過左一半，你而家覺得點呀？」
Horace：「OK呀，學到好多野，幾個老師都話我進步左。」
張總監：「嗯，我都有聽到，佢地都話你係咁多個練習生比較突出既一個。」
Horace：「過獎啦，都係導師們既功勞。」




張總監：「早兩日我都見到你係學校歌唱比賽段片，真係唱得幾好，我指唔止係技巧上，而係你學識應付台上既心理壓力。」
Horace：「嗯，你地比我既練習係好有用既。」
張總監：「所以，我同老闆傾過之後，決定比你正式錄一首歌。」
 
Horace瞪大雙眼，不知如何回應。
 
張總監：「平常我地都會等練習生完左訓練期先會幫佢錄，但見你既可塑性比較高，所以老闆批准左呢個特別安排。同時都因為公司幫緊Kenneth做隻專輯，佢都話想同你合作，所以會安排首合唱歌比你地錄。」
Horace：「多謝你地比呢個機會我。」語氣仍然充滿著受寵若驚。
張總監：「下星期會有更多資料啦，我會叫同事幫你再度過另一個時間表，可能會再密D，辛苦你啦。」
Horace：「唔辛苦，唔辛苦，多謝多謝。」




張總監：「同事會再通知你啦，講住咁多先啦。」
Horace：「好既，唔該哂總監。」說完便離開總監辦公室。
 
他前往在公司附近的茶餐廳，打算快速吃個午餐然後返回公司準備下一節練習，但一進餐廳，就見到幾位練習生正在點餐，其中一人向他招手：「Horace，過黎一齊食呀！」
 
Horace走到那一檯，坐下說：「好少係度見到你地喎。」
 
Horace在唱片公司練習的日子通常是「獨家村」行動的，原因是他真的比較忙碌，沒太多空閒時間和其他練習生在工餘上有交流。如果練習之間需要吃飯，他通常會在這間茶餐廳快速處理，甚少會見到公司同事。
 
練習生A：「平時會去遠少少食，今日Schedule比較緊，所以呢度食算。」




Horace：「哦，我呢D懶人通常唔想走咁遠，哈哈。」
練習生B：「係喎Horace，你段sing con片網上瘋傳緊喎。」
Horace：「邊有咁誇張呀。」他露出尷尬的表情。
練習生B：「哈哈，你真係唱得好聽喎，Alfred既歌我唱K都覺得難唱。」
 
雖然平日交流不算很多，但Horace與這屆的其他練習生其實關係也算是不錯的。不過他還是決定不提起有關正式錄音的事，一來還未落實，二來也怕招來無謂的敵視。
 
此時，他收到Kenneth的電話。
 
Horace：「喂，Kenneth哥？」
Kenneth：「Horace，你陣間係咪會返黎公司？」
Horace：「會呀，今日練到五點呀，而家食緊野。」
Kenneth：「哦，我岩岩返到去，你轉頭返黎搵一搵我？講關於首新歌既事。」
Horace：「OK無問題。」
Kenneth：「轉頭見。」




 
練習生A：「你同Kenneth好似好熟咁喎。」
Horace：「普通啦，點解咁講？」
練習生A：「我地發現佢淨係同你傾計，就算我地成班人都好，佢都無咩點理我地，一直以為你地本身識既。」
Horace：「哦，唔係呀，其實同佢每次都話不多過十句。」
 
吃過簡單的午飯後，他們一行人返回公司，一進門口便見到Kenneth和Joanne在接待處附近傾談著。兩人跟這班剛回到公司的練習生簡單點頭問好，直至見到最後的Horace時，Kenneth說：「Horace，過黎呀。」
 
在他前面的練習生A馬上轉身對他展示出一個「我都話啦」的眼神，然後跟其他人一起進去。