[hehe]《知音人》: 八十：看開

Horace在星期四下午接獲學生會通知，他在獨唱組以及HERO在合唱組別均入選決賽。
 
傍晚HERO在512室練習，準備一星期後的決賽。
 
Oscar：「係喎，Edmund你獨唱入唔入到決賽呀？」
Edmund：「無呀，無收到通知呀。」
Horace：「竟然，明明你都唱得幾好呀！」
Edmund：「唔緊要啦，玩下啫。」語氣確實是挺輕鬆的。
Roy：「咁你呢Oscar？」
Oscar：「我梗係無啦哈哈。」




Edmund：「你志不在決賽啦。」
 
Oscar聽完Edmund這樣說，輕輕笑了一下，但沒有回應。
 
Roy：「咁我地決賽唱咩歌呀？星期一要交歌啦喎。」
Horace：「想照唱《無盡》定揀另一首？邊個有意見？」
Edmund：「問題係夠唔夠時間練首新先？」
Oscar：「係囉，《無盡》初賽都無人唱，唔怕撞啦。」
Horace：「咁照《無盡》啦喎。」
Edmund：「係啦，新歌係怕練唔切啫。」




 
此時Oscar電話響起。他望一望來電顯示，是Wilson，臉上即時露出了微笑，被身旁的Roy看到了。
 
Oscar：「我出去聽個電話先。」說完便離開房間。
Roy：「一見到係仔仔打比佢就笑到發哂姣。」
Edmund：「Wilson？」
Roy：「唔係仲有邊個呀？」
Horace：「佢地好似進展良好咁喎。」
Roy：「我諗佢應該睇開左啦掛，繼續同佢做好朋友囉。」
Edmund：「唯有係咁啦，但怕唔怕佢越踩越深？」




Horace：「呢個真係得佢先答到。」
Roy：「我都驚佢決定咁同佢繼續做好朋友，會返唔到轉頭，到時仲傷。」
Edmund：「希望佢係真係睇開左，如果唔係再有咩刺激，我怕佢真崩潰。」
Horace：「係喎，佢後日生日，不如陣間去宵夜打邊爐同佢慶祝？」
Edmund：「好喎，但唔知佢得唔得閒喎。」
Roy：「轉頭問下佢囉。」
Horace：「咁我地等埋佢返黎，練多一次就行啦。」
 
過了一會，Oscar便重新進入512室，臉上的笑容仍很燦爛。
 
Roy：「哇，你春風滿面喎。」
Oscar：「咩呀，咪又係咁？」
Horace：「係喎楊俊朗，我地諗住練多一次就出去打邊爐喎。」
Oscar：「做咩無啦啦打邊爐？」
Roy：「咁你去唔去呀？」




Edmund：「我地四個好耐無食餐好啦。」
Horace：「係囉，唔好又食canteen啦。」
Oscar：「哦，好啦咁。」
 
約一小時後，四人已經在西環一間火鍋店坐著，Roy正在點菜。
 
Oscar：「係喎Edmund，你同高佬點呀？」
Edmund：「下？點解咁問？」
Oscar：「尋晚練波，我聽到佢同Darren傾計，佢話你唔理佢喎。」
Edmund笑著說：「無呀，無野。」
Horace：「佢地耍花槍啫。」
Oscar：「同個Gary有關？」
Edmund：「總之而家無野啦。」
Oscar：「我都係估下咋，Darren唔肯講咩事，然後尋日Gary都突然請左假無黎練波。」
 




Edmund笑了但沒有回應，因為他其實從來沒有擔心過那個Gary有什麼能力可以搶走Steven。
 
他昨天所不滿的，是Steven沒有通知他但突然失約，卻不是因為什麼重要事情，而是和Gary食下午茶和傾談。而當晚上Steven來到512室找他時，他的怒氣其實都已消退了。
 
Edmund此時開聲說：「唔關個Gary事啦，你咪聽Darren講咁多，條友成日亂up野。」