《病港２》: 139

為慶祝這個值得紀念的一天，王達尼特意下廚，弄了一客魚湯。

這魚單是拆骨的工序，就很麻煩。

「鮮辣下口鯰魚湯。」王達尼煮好後，將魚湯放到桌上。

下口鯰，即是俗稱的「垃圾魚」。

在以往因為肉質口感差、骨刺多、又經常以吃垃圾為生，而不被世人視為食物。但在這世代，繁殖能力強又易養的牠們，已成為一般平民百姓想吃魚時的選擇。





王達尼刻意用辣味，蓋過下口鯰原本的味道，是很聰明的做法，畢竟下口鯰本身味道平平，多下點蒜和辣椒，有助提升鮮味。

「Ｍ，你想我點幫你？」

「你宜家做生意，會接觸到天環人？」我問。

「唔會，最多都只係接觸到中環人。」接著，王達尼把自己觀察到的倖存區食物鏈階級，告訴給我知。

大約如下：天環人 ＞上環人＞中環人。





有個說法是，金鐘打後的地方，統一被稱為「下環人」，是這群勢利鬼背後的叫法。

天環，代表權力。

整個利益的社會地位都十分超然，幾乎是國家的一部份勢力。

掌控，能源產業、銀行、國防軍火、鐵路服務、濾水廠、發電站，等極為重要的日常基建。

上環，代表商人。





在種子如金的國度，有很多為他們出賣汗水與勞力。

掌控，日常用品、糧食、漁業、輕重工業、醫療、投資等。

中環，代表知識。

專業人士的階層，更是上階位者的走狗。

三個倖存區，是王達尼要打入的目標。

「我最努力都只可以混到去「上環區」，除非我有咩驚人成就，令嗰班天環人不得不會我啦。」王達尼說。

「咁你有冇咩驚人成就？」我問。

「你估下？咁就緊係無，要更多時間，不過......」王達尼揚起嘴，說出另一個可能性：「如果有件事成功，就可以快速打入天環人嘅勢力。」





「係？」我就知道，王達尼不簡單。

「成為「管理人」。」

「管理人......你係指，倖存區嘅管理人？」

「無錯，當你掌控成個倖存區嗰陣，就代表你牽涉住好巨大嘅利益，因為倖存區每橦建築物乃至到每個人民，你都可以喺呢啲嘢身上獲取利益，仲可以自設一啲法律規定。」王達尼一口喝盡杯中的酒，說：「當利益涉及到成個倖存區，就係一個龐大嘅利潤同權力，天環人一定會主動搵上門。」

「詳情係點？」我有興趣聽下去。

「係咁嘅，每過一年，即係到下年一月嗰陣。金鐘區，即係立國者嗰個政府班子，我叫金鐘人啦，會根據倖存區運行情況，例如嗰個區無管理人，就會揀一個，今年有三個疫區啱啱清空返，年底前可以住返人，佢會各挑選一個社會上有影響力嘅人，去做管理人統治嗰個倖存區。」

「無得自己報名？」





「無，所以學我咁，盡量上報就係令自己曝光嘅最好選擇。」王達尼把身子傾前，低聲說：「講個秘密你知，其實今日個記者佬，我係賄賂佢老闆先有今日嘅訪問......」

「但事實係，你又真係買起咗呢橦大廈，同埋你咁講得俾我聽，即係預咗想被選中為管理人？」

「買起摩天大廈先有用。嗱，我經常喺酒吧到打探消息，啲人話通常十月過後，成個倖存區嘅氣氛就好似自由選舉咁，出名同唔出名嘅人，都會喺爭相宣傳自己。」

「有趣，我有嘢幫到你？」

「你一個月前好似搞掂咗山上個賊營？你呢件事，得到唔少人歡心，如果有你公開支持我，我好大機會，會被金鐘入面嘅人選中。」

「但天環人同我係天敵，我公開表態支持你，就算你真係做咗管理人，佢哋之後仲會同你合作，俾你混入圈子？」我疑慮。

「你應該用逆向思維，我係商家出身，喺天環人眼中錢就係一切，佢哋一定會自以為收買到我，諗住利用我嚟牽制你，我哋正好可以嚟個反間計。」

王達尼的城府深得不見底。





「今次可以話係選舉年，因為有四個倖存區管理人嘅空置咗。」王達尼咬住油筆，在移動式白板上，寫下四個地方：「北角、天后、灣仔，仲有鯨寨，鯨寨係個特別例子，因為每任當選嘅管理人，都會被暗殺，所以無人夠擔接管呢個地方。」

「咁金鐘人，點樣去分配倖存區俾被選上嘅後選人？」

「通常會睇佢背景、條友喺咩倖存區長居工作生活，仲有思想理念係傾向符合邊一個倖存區，例如條友係以前係讀農牧業嘅博士生，就會分配佢到北角呢個，專產唔同農作物嘅倖存區，如果條友讀開法律專科，有司法背景，就會好似現任嘅中環管理人咁，掌管住嗰一帶。」

「咁你背景特質係咩？」我抱手、問。

「龍蛇混雜、黑商、唔怕死、異國人，我所有身上嘅特質，都指向住「鯨寨」呢個一地方，所以我會集中揀佢，加上無人同我競爭，如果成功出到頭嘅話，１００％會由我當選！」

「呢個......你唔驚死？」

「大佬，我以前做黑市生意都日日差唔多死咁濟，班傻仔拎住枝槍指住我個頭都唔會驚啦。」王達尼戰力可能不高，但論生存能力肯定最強。





「嗰到一片荒土、大樓大廈都無人租，你確定會令天環人，同你合作？仲未計，入面有黑勢力係天環人手下......」

「嗰啲馬仔交俾你清除，Ｍ。」

「嗯，我會查下，到底係咩黑勢力，有殺管理人嘅癖好。」

「當我令到鯨寨一片富裕嗰陣，天環人自自然然會選擇同我合作，佢哋都搞唔起成個鯨寨，宜家有我幫手搞得起，到時佢哋會好快搵上門。」

「你有競選團隊？」我又問。

「有喇，我班伙記囉，應承咗佢哋，到時鯨寨一人一間屋，俾佢哋住喺海逸酒店最高嗰幾層大房。」就算行樓梯，都行死他們好嗎。

「就咁話，合作愉快。」我伸出一隻手，打算跟他握手：「未來管理人。」

王達尼臉色變得陰沉狡猾，揚著嘴與我握手：「合作愉快！病獵會長，嘿嘿嘿嘿......」

「可唔可以唔好搞到我哋好奸咁？」

「嘿嘿嘿嘿嘿......」

翌日。

我上了《病港日報》的新聞，王達尼上了《籽籽日報》的新聞。

我們在沙發上，各自拿著對方的報章閱讀。

王達尼看得嘖嘖稱奇：「喂，張相影到你出場成個美國總統咁嘅......後面仲打哂燈咁款，個個病獵排好哂隊型，特登嫁？」

「呢張相都影你成個金融才俊咁，係差在你未喺張檯放幾十隻勞力士。」我回讚他。

「老闆！請問我今日要做咩？」突然，有個人南非輪廓的男人走進來。

「喔，你負責扮哂凶神惡煞咁企喺大廈門口就得。」王達尼指示。

「收到！」

「你員工？」我問。

「係，佢係有白化病嘅黑人，仲夾帶些少女權主義，長期自稱係素食者，原本我唔想請嫁，但佢話要到平機會告我喎！唯有請囉。」王達尼無奈地搖搖頭。

我淺淺一笑，站起身準備離開：「叫佢考慮下做病獵，我永遠缺人。」

「得嘅，到時你唔好唔收佢啊，你走啦？下次再見，好兄弟。」王達尼走過來，貼胸拍拍我的背。

「啊......」

「咩、咩事啊你？」

「我傷未好返......」我說。

「咁癲......傷都未好就出院。」

「無太多時間俾我消耗，你都係，打鐵趁熱。」

「嗯，再見。」

「再見。」