[無糖故]我既女神係樂隊既主音: 第十三章
九月五日，星期三，我地學校終於正式開始上堂。
新黎嘅班主任比我地自由調位。我同慧打一打眼色，就坐返FORM3時個位。
唔同嘅係，我隔離再唔係書蟲，變左一個普通男仔。
「終於唔使日日對住個死讀書嘅書蟲啦。」我心入面暗喜。
「喂慧，你有冇諗過聖誕聯歡我地玩咩歌？三個月後就係喇。」我拍一拍慧個膊頭。
「嗯..等我諗下先。最好就唱返中文啦。」慧托起個頭。
「係喎，同你練過咁多次，聽你唱日文歌仲多過中文歌。」
「中文歌，尤其係廣東話嘅BAND SOUND太少喇，就算有都未必岩女仔唱。」
「一係唱英文歌？或者普通話歌？」我提議。
「我都係一陣先諗喇。話時話，你約左佢地下次幾時練習？成個暑假流流長，個個都話有野做，夾夾埋埋我地練得果三次，真係覺得有啲哂左啲時間，你都知中四忙過中三幾多架啦。」慧。
「吓，我未約喎，一係一陣小息我搵佢地，問下佢地幾時得囉。」
「OK。」
－－－－－－－－－－－－－－－－－－－－－－－－－－－－－－－－－－－－－－－－－－－－－
小息，我同慧即刻去Ｄ班搵傑仔。
「喂傑仔，得唔得閒，出一出黎丫。」我向課室入面嘅傑仔揮一揮手。
「咩事呀。」傑仔行出左課室。
「你邊日得閒練習？仲有三個月就聖誕聯歡會，我地連歌都未諗好呀。」我。
「不如就今個星期六啦，趁依家岩岩開學冇乜野做。」傑仔提議。
「星期六我冇所謂呀，慧你呢？」我望一望慧，慧點一點頭，示意ＯＫ。
「咁我就上五樓搵立暉同阿齊喇，問下佢地星期六得唔得。」我。
「阿齊佢喺４Ｅ呀。」傑仔。
「吓？條友又留班？」我覺得幾驚訝，因為佢已經留左一年。
「係呀，我今朝早撞到佢喺４Ｅ，咪傾左幾句囉，問下先知原來佢今年又留班。」傑仔。
「睇黎我地BAND得立暉係FORM５，哈。」我輕輕一笑，就行去Ｅ班。「唔講住喇傑仔，我依家搵阿齊。」我。
「掰。」傑仔。
－－－－－－－－－－－－－－－－－－－－－－－－－－－－－－－－－－－－－－－－－－－－－
「喂阿齊，出一出黎丫。」我企喺４Ｅ外面。
「HELLO。」阿齊揮一揮手。
「星期六得唔得閒？我地練一練聖誕聯歡會唱嘅歌，當然諗左咩歌先啦。」我。
「OK呀。咁你對唱咩歌有冇咩頭緒？因為我都要搵譜。」阿齊挨喺牆邊。
「我同慧都諗唔到..一係我地諗到再搵你啦。再唔係，你諗到同我地提議下，最好就梗係中文歌啦。」我。
「ALRIGHT，冇野既話我返去先喇。」
「話時話，你條友做咩又留班。」
「我不嬲都冇乜心機讀書架啦，出席率又低，上面班友咪留多我一年囉，屌。」阿齊睇落好不滿。「遲下我可能過外國添架喇。」
「吓？姐係點？」我有啲驚訝。
「我應該可能下年就過美國留學，反正香港都冇咩好，要達成我嘅夢想，香港真係滿足唔到我。」阿齊。
「咁姐係，我地隊BAND，最多去到下年？」慧都相當驚訝。
「可以話係。」阿齊攤一攤手。
「咁即係話今年聖誕聯歡會係我地第一次，亦都係最後一次嘅表演？」慧睇落有啲失落。
「應該都係..下年立暉就考會考，阿齊你又出國留學..我地今次一定要把握機會，攞個冠軍返黎。」我握緊拳頭。
「噹、噹、噹」，學校鐘聲響起。
「小息完喇，我同慧返去先喇，今個星期六，音樂室啦。到時見。」我。
「掰。」阿齊入返班房。
「喂慧，陣間午息陪我上去５Ｂ搵埋立暉啦。」我望一望身邊嘅慧，佢睇落好失落。
「唔使咁嘅樣喎，我地起碼仲有一年時間。何況，你地隊嘅結他手都未走，唔使咁灰喎。放心啦，個結他手唔會咁快離開隊BAND嘅。」我半開玩笑咁氹慧，點知佢睇落好似又有啲眼濕濕。
「你真係好衰..」慧突然快步行返班房，搞到我呆左一呆。
「又搞乜？我激嬲左慧？」我完全唔知自己衰咩，唯有跟住慧返班房。
我坐返埋自己位，慧坐喺我前面，但係我突然唔知點撩佢講野，驚死佢又嬲我。
算喇唯有頂硬上。
「喂慧。」我拍一拍慧膊頭，「SORRY囉，我岩岩係咪講錯野，係嘅我道歉，對唔住。」點知慧唔理我。
我地之間靜左幾秒。
「你呀，」慧突然擰轉頭，「唔好下巴輕輕，亂咁應承人呀。」我睇到慧隻眼有啲紅，「你講過架，記住唔好咁快離開隊BAND呀。」慧輕輕微笑，再次展現佢個小小嘅酒渦。
「得喇，我幾時有呃過你。」原來慧冇嬲，只係因為感動而喊。「你唔好咁眼淺啦，搞到我成日以為我做錯啲咩。」
「對唔住囉，我份人係咁眼淺架喇。」慧突然擰返去前面。
「講下笑姐，你喊個樣都好可愛呀。」我笑住咁講，雖然呢個係事實。
「你份人真係，..唉！」慧冇望我，但我偷偷咁望一望佢，見到佢喺度輕輕偷笑。
慧真係好可愛。哈。
我望一望窗外，夏天嘅微風吹散落葉。
「究竟呢啲日子可以持續到幾時呢...？」我望住飄散嘅落葉，落葉就好似青春一樣，一片一片咁喺樹上脫落。
「青春在風中飄著..」
突然，我醒起一句歌詞。
我拍一拍慧嘅膊頭，「喂慧，我諗到我地唱咩歌喇。」
「咩歌？」慧。
「小情歌。」