女兒，希望你能彌補我的遺憾: 第二十三節 - 理想歸理想，得不到也等於妄想
「BB，狼來了既故事呢，就係叫小朋友唔可以講大話。如果唔係，大人就會唔會再相信你架啦，知唔知道啊？」今天的三分鐘床邊故事就是狼來了。
「知道。咁爸爸以前有無講過大話？」小女天真地問我。
「爸爸係乖寶寶，唔講大話架。」 Sorry，呢句正正就係大話中的大話。
「知道爸爸，我都係乖寶寶，唔會講大話。」
「BB最乖既，記得唔可以講大話，比你呃既人會好唔開心架。好啦，你要訓覺啦。」
若我的理論屬實，最不開心的應該是阿婷。和她一起的幾年內，我說了所有的謊，她全都相信。不過，在最重要的關頭，我決定不再你瞞我瞞，一句說話一個決定，清清楚楚乾乾脆脆，與她永遠不拖不欠。
———————————————————————————————————————————
「阿婷，幾時到你地啊？三姑婆唔擺得耐架啦，再拖就飲唔到你地果餐啦。」
「阿婷，你男朋友一表人才咁樣，唔好再拖啦，快快趣趣拉埋佢啦。」
「唔擺酒住都得架，可以註冊先姐。貴有貴搞，平有平搞，簽紙幾千蚊就得架啦，唔洗怕無錢。」
阿婷家姐和她的初戀男友，拍拖十多年後，終於收成正果，設宴於大埔焦急城的XX大皇宮。我亦無可避免地被邀出席。由於阿婷需要擔任MC，貼心的他們怕我孤獨，特意為我在主家席安排了一個座位，表面上讓我可以與在場唯一認識的人 - 她的父母傾談。像我這種卑鄙小人，一眼就看穿他們的真正用意 - 藉此機會將我介紹給她們的親友，利用群眾壓力，開始逼婚大行動。在一眾三姑六婆車輪戰圍攻下，我整晚一時化身張三豐，不停耍太極，一時變身葉鴻輝，高撲低擋，比踢完一場九十分鐘的賽事更疲累。
在此之前，即使我們拍拖差不多四年，但從來沒有認真觸及這個潘朵拉的盒子Pandora Box，她也沒有給我什麼的壓力，感情表面上十分安穩 （基於她沒有發現我在背後的所作所為的基礎下）。
正如神話中所說，這個盒子打開後，原本寧靜沒有任何災害動亂的世界開始動盪不安起來。她開始有意無意提及有關未來的問題，例如儲錢買樓、生小孩，偶爾配合她的父母的神助攻，有如全盛時期的巴塞之全場壓逼，逼到對手（我）無力反擊，只好放棄控球（發言權）讓出，唯有負隅頑抗，堅守最後防線（不會被逼婚成功）。面對高壓踢法的對手，若是久守，久而久之還是必失，要想想辦法扭轉整個場面。
「你個人都眞係幾仆街架wor，你無心同人結婚就唔Q好再拖人啦。」J小姐直接轟過來。她是我中三的同班同學，是我最親朋的密友，比我媽我老婆還要懂我。我倆有想不通的事情時，很自然就會找對方。
「咁佢份人幾nice，又幾就得人，又唔管我，keep住拍拖都幾好啊。」對著她，我不怕將所有的真心話說出來。
「你講到佢咁好啦，點解人地一提要結婚，就好似殺你父母咁啊？」
「er....」我語塞了。
「人地差唔多三十歲啦，最青春最黃金果幾年都同左你條粉腸一齊。再拖落去，去到佢三十幾歲時候，你先同人講話唔想同佢結婚，隨時會搞到人地一世結唔成婚，你條仆街過唔過意得去啊？係公司搞阿妹，送人番大西北就唔遠，送女朋友番大埔就話萬里長征。你同我講你個妹d野，多過佢既野幾十倍。你根本就唔鍾意佢，只係貪就手，唔想悶，正無賴。」J小姐一劍正中紅心。
「我唔係無賴，只不過同佢一齊落去，睇唔到將來姐。我唔想係大埔焦急城XX大皇宮擺酒啊。我地兩個加埋一個月都係搵六七餅，供完樓，比埋老豆老母，水電煤，剩條毛啊。我老豆老母得我一個仔，有咩事我全部要上身，咁點生BB啊，邊有多餘錢比佢讀書、學樂器啊？我同佢d基因都唔係叻架啦，後天再唔培養，生個BB出來，咪只會害佢。」
「Diu！藉口！阿妹屋企好有錢咩？你咪又係中果頭埋去。」J小姐再次正中紅心。
「所以我最後咪無正式追佢law！我都見唔到我同佢將來可以有幾好。貧賤夫妻百事哀啊！係我地間中學出來，再見埋我間野雞大學d人，就會明白咩叫有Quality嘅人。貧者越貧，富者越富，無得講架。我一係唔生BB，一生就要比最好既佢，要佢做一個有質素嘅人。」
「Diu！藉口！你果d條件，又要人叻，又要人有氣質，又要人屋企有錢，有齊呢d條件就唔Q會睇上你啦，仲話同你生BB，你都on99既。」我身邊最親的女士，永遠對我說話都是這麼的直接。
「之前有架....」大家都知我所指的是誰。
「你收皮啦，分左手幾十年啦，仲講呢d。醒啦，仆街。睇得起你既，唔會fulfill 到你既要求。fulfill 到你既要求既，無可能睇得上你。你咁樣落去，遲早一世都唔會結到婚，唔好講生BB。不過，呢個moment，唔該你同阿婷講清楚先。」
「得啦，我點仆街，都唔會想拖住人既。」
「你自己心知肚明，你果d條件裡面，咩係最重要。你都知道邊度會有人fulfill到你，你以前陶淵明上身，不為五斗米折腰嘛。不過你要因為一個人既外在條件而同佢一齊，而唔係真心鍾意佢既，要prepare 遲早有機會爆煲。」
她口中的那個人，就是我和阿婷拍拖之前的上一位富家千金。殘酷的現實會磨滅人的意志和理想，我亦在當晚下定決心，開始人生最大的賭局。