《如果你見到呢段字，救我！》: Day 13-Part 4
由於勞力消耗得比較多，所以我打算訓覺休息，順便避免空肚嘅難受感覺。
無奈地，太肚餓嘅緣故，我連訓都訓唔到，開始覺得困住密室係一種折磨，有一種等我斷糧斷水至死嘅感覺。
我漸漸睇個雪櫃唔順眼，對住佢嚟拳打腳踢：「開極都開唔到，你用咩做㗎？你整出嚟係比人放嘢食㗎！你當自己係寶箱咩？對唔住，我唔應該咁話你，你乖啦，你開門啦好無？」我無意識到，自己開始語無倫次。
情緒變得反復無常，由嬲變喊，再由唔開心變翻好嬲，「我都話我要開囉！」我向雪櫃咆哮道，而奇蹟竟然係呢一𣊬間出現，一拉就開到對雪櫃門！
我馬上求其揾食物放入口，雪櫃內放置咗各式各樣嘅美食，有壽司、蛋糕、飯團、布甸等食物。我隨心攞咗壽司放入口，一咬，咬唔開嘅？
我攞翻出嚟睇清楚啲，原來，所謂嘅食物都係膠嚟。我意思係，全部都係食物模型，不可食用。
我嬲到將所有食物模型掟向牆壁，對住呢堆仿真度極高嘅食物就更加肚餓，情形就同望梅止渴一樣，睇得唔食得，呢種感覺簡直難受過死，覺得自己好似被人玩咁。
我怒視住散落一地嘅食物模型，以及開咗櫃門嘅迷你雪櫃。
戛然，我靈機一觸，諗到逃生方法。
我打算抬迷你雪櫃上樓梯，利用雪櫃撞爛度門，撞到開到為止。
幾經辛苦之後，終於成功將雪櫃抬上樓梯且到達門前。我擺好姿勢，準備係心入面數三聲就開始撞門。
三，
二，
一。
喺雪櫃快將接觸到門嘅𣊬間，傳來「噠！」一聲，有人......幫我開咗鎖？
我放翻低雪櫃，戰戰兢兢地扭開門把，今次扭得非常順暢，無咗前幾次有嘢卡住嘅感覺，「咔！」道門開咗！
我小心謹慎地探頭，確認下外面嘅環境。Party似乎已經結束咗，無咗嘈雜嘅人聲以及震碎耳膜嘅音樂。
我攝手攝腳咁慢慢行出密室門口，再揭開黑布去觀察環境，外面一個人都無，我應該可以趁機會離開。
我好似小偷一樣放輕腳步逃跑，但當我經過開放式廚房，見到燒雞、意粉、沙律等真正食物就忍唔住停低腳步，無辦法抗拒美食嘅誘惑。
我徒手拎咗雞鎚雞翼，然後狠吞虎嚥咁放曬入口，雖然過咗一段時間，然而啲口感味道依然保持住超水準發揮，好食到一流！
「你到底收埋咗Daddy係邊？行極見唔到喎。」遠處傳嚟我個女把聲。
我即時踎低，利用廚房嘅設備去遮蓋住自己，只要佢哋唔行入嚟，就唔會見到我。
「你真係想知？又係你話唔想daddy知你同我一齊嘅事咩。」係John把聲。
「好奇姐，快啲講啦。」
「Okok，我鎖咗佢係地下密室。」
「咩話？」阿女嘅語氣聽落好驚訝，不過驚訝係唔夠，應該要嬲佢先得。
「你居然唔話比我知你整咗個地下密室？好想去睇啊！」原來密室比我更重要。
「仲未正式佈置好㗎，本身諗住整靚靚先比你睇。
點知比我發現到你Daddy係我間房行出嚟，我諗佢應該知道咗我同你嘅關係先會咁做。
我一直觀察住佢，咁啱佢自己又行入去密室，咁我就順手鎖埋佢係入面，等一陣先放翻佢出嚟，費事你Daddy阻住我哋嘛。」
「喂！你隻手摸去邊度啊？呢度係梳化嚟㗎，好似唔係咁好......」
衰人！又搞我個女！
「怕咩喎，啲人都走曬啦，得我同你咋，密室嗰度又係隔音嘅，你Daddy唔會知㗎。」
唔會知？你啲嘢我知道曬啦！
佢竟然去到呢一刻都呃我個女，仲要鎖我去密室想整死我......
「偽君子！你唔洗旨意再鎖住我同呃我個女！」我走上前，邊勒緊John條頸，邊大聲吆喝佢。由於我太激動，隻手仲拎住食到一半嘅雞翼。
「點解你會出到嚟㗎？放手啊！你係咪想整死佢啊！」女兒焦躁不安咁向我大吵大鬧。
對上次咁近距離同佢講嘢，好似已經係佢細個嗰時，我都唔係記得好清楚。
印象中，嗰時佢細細粒，係全世界最可愛嘅人類，對地球嘅大小事物都充滿好奇心，每日都有好多嘅問題問，一日唔知原因，佢都會問到有答案為止。
同時，佢亦都係一個大喊包，小小事都會喊到塊面紅曬，隻眼腫曬咁跑過嚟，捉住我隻腳喊。每當我抱起佢，佢又會即刻收曬聲，雙眼淚水汪汪、非常無辜咁望住我，嗰一刻，我覺得自己係全世界最幸福嘅爸爸。
唔知幾時開始，佢唔再主動同我講嘢，我哋之間嘅隔閡亦變得越嚟越大，漸漸地，連見多佢一眼，都成為難事，我開始記唔清佢個樣、唔記得佢把聲。
「快啲推開佢！」我沉醉於回憶之時，女兒協助John逃走，當我回過神來，佢已經企咗係梳化側邊，痛苦地喘氣，女兒就在旁睇佢狀況，不時仲會鄙視我。
原來，我對女兒嘅印象，只停留係過去童年時期，但佢經已遺忘咗昔日時光。對於佢嚟講，我同陌生人無分別，最大嘅分別，就應該只有所謂嘅血緣關係。
「佢係Play boy嚟㗎，除咗你之外，仲收埋好多女朋友，唔好再信佢啦！」佢當我係陌生人都好，我仍然想佢睇清楚真相。
「我嘅事唔洗你理！我一早知道佢有其他女朋友，我夠有其他男朋友啦，我哋玩下咋嘛，又無害到人，我唔同你，你差啲摙死人添啦。」原來，我先係最唔熟悉佢嘅人，或者咁講，我根本唔認得眼前呢個人係我個女。
「係我錯，係我多事，對唔住，我唔會再打擾你哋。」我心灰意冷地離開，準備翻屋企。
離開之後，我抬頭一望，太陽已經升起，原來我只係離開咗屋企半日時間，但呢半日發生嘅每分每秒，對我嚟講，都係度日如年。
當我拖到疲累不堪嘅身體翻到屋企，居然有個小朋友跑去我面前，佢個樣仲有講唔出嘅熟悉感，我係咪攰到眼花？