《如果你見到呢段字，救我！》: Day 13- Part 3

我小心謹慎地摸黑向下行，深怕一個唔為意就會滾落樓梯。雖然個心好驚，但隻腳同個腦好似分開運作，繼續以正常步速咁行，非常鎮定。

行咗大概半分鐘，終於行到盡頭。

所謂嘅地下密室，原來係一間普通套房。

入面應有盡有，有迷你廚房、迷你雪櫃、浴室廁所、一張雙人大床，仲有......

由於入面燈光都係較為暗，所以我行前睇清楚係咩嚟，原來係一啲情趣用品嚟。





John個腦除咗音樂之外，就只係得翻食女，都唔知我個女鐘意佢啲咩。

行完成間房，原來呢間都只係比佢要嚟食女，根本無咩秘密，唉，唔通真係我太多心？

唔一定，仲未解釋到係邊個閂同鎖咗道門，可以係John，或者係其他可疑人物。

而呢一個人鎖咗道門嘅行為，至少可以證明佢有心困住我，只係動機未明。

問題係，佢幾時先會開翻？





唔通，佢打算困死我？

唔會掛......呢度無庸置疑係密室，我係無可能走到出去。

諗到呢度，突然有啲肚餓，好彩呢度有迷你雪櫃可以醫肚，打開睇下有咩食先。

咦？點解，點解打開唔到嘅？好似有啲嘢痴住咁咗。任憑我幾大力拉，都係無辦法開到雪櫃門。

「我、要、食、嘢、啊！」我一邊踢雪櫃，一邊大叫助威。





可惜，依然都係徒勞無功。

唔可以咁快灰心，一定仲有方法！我安慰自己。

隨後，我即刻走翻上樓梯，跑去門前，

你以為我想用力扭開道門？

錯曬，大錯特錯。

「啊啊啊啊啊！」我提高嗓子大聲納喊，希望出面嘅人能夠發現我存在，繼而開翻道門拯救我。

可惜事與願違，外面嘅人仍然係玩到忘我境界，啲音樂亦越嚟越大聲，相信短時間內都唔會完。

我垂頭喪氣咁行翻去套房，個肚越嚟越餓，嚟Party之前又無食嘢，嚟到就掛住查案，全日都無嘢食落過肚......好辛苦。





雖然雪櫃係我面前，但開唔到的話，對我嚟講，同一個垃圾桶完全無分別，同樣咁廢。

我休息回氣咗一陣，既然都無嘢做，倒不如再試多幾次拉開雪櫃。

如是者，我餘下嘅時間就係不斷重複推拉動作，原先預計可以增加開啟雪櫃嘅機會，然而咁樣做只會帶嚟反效果，就係手痛且令自己更攰、更肚餓。

喺推拉過程之中，我都有花時間去門口大叫，不過仲係無人理我。

於是，我決定改變策略。