病態城市小說場系列：《用KY殺唔到啲菌？》: 滑滑哋，好有效

尋晚返到屋企樓下，循例打開大堂大閘後，就順手拎支消毒潔手液出嚟，點知望吓個樽，得返嗰幾滴，一定唔夠我㩒完部𨋢個掣，同埋㩒埋個樓層掣後清毒嘅。呢個時候我決定忍一忍，隻手乜嘢都唔掂，直接㩒落個𨋢掣度。新嚟嘅看更阿姐見到我玩一指禪，就笑笑口話：「徐生，你唔使驚，我每個鐘都會消毒部𨋢㗎。」

話就咁話，但一個鐘，幾多個人搭𨋢呀？但我仍不失有禮：「係呀？咁辛苦你喇。」好彩部𨋢啱啱到，我即刻講聲「Bye」就衝入𨋢，㩒埋16樓再狂㩒閂門掣，反正都消毒，唔㩒多幾下咪蝕？𨋢門一閂，我就拎支手液唧得乾乾淨淨。呢個時候部𨋢門打開，咦？點解仲係大堂嘅？SHIT！壞𨋢！冇晒消毒液！點㩒𨋢！

看更阿姐見到我望住隻手，就話：「係咪想消毒，我有殺菌專用藥膏。」然後從褲袋拎咗支藥膏唧喺我手背上。我望吓支藥膏個牌子，大大隻字寫住「KY」！我頂吖！呢支嘢邊係用嚟咁用㗎，但見到阿姐若無其事咁唧完，仲話：「佢係有少少滑，但會喺你手上形成保護層，返去洗乾淨手就得㗎喇。」

待續……