［愛情甜故前傳--無糖純愛］曾經嘅我地，都係兩條平行線⋯: 81. 怎麼還對我好？

我有一刻嘅衝動想衝上前就拍佢嘅博頭，將佢同周樂恆分開，將方芷諾拉到我嘅身後

由幾時開始，連我自己都感覺到自己變得愈嚟愈在意方芷諾？

喺我差唔多行到留去課室嘅時候，我先見到周樂恆手上拎咗一本書，佢將本書還番比方芷諾，然後見到佢地又講咗兩句，之後周樂恆就走咗

我行到去方芷諾隔離嘅同時方芷諾轉身行番埋位，唔知係咪我嘅錯覺，總覺得佢行得快咗，就好想快速咁行過我

啱啱見到佢行喺我前面嘅時候，有個衝動想叫住佢，冇咩特別嘅原因，就係純粹地…想叫佢個名，想佢留意我…





…

喺Lunchtime過後就係派我用咗最長時間嚟溫嘅數學，我淨係覺得終於要派呢科，希望佢會派咗Long Question先，因為Long Question佔分重啲，MC對我嚟講唔太重要

我見差唔多到我出去拎卷嘅時候，我就已經行定出去，已經迫不及待想知道成績

中三嘅數學我嘅基礎應該係Below average，因為我上一個學期完全冇聽過書，功課拎番嚟嘅grade唔係D就係遲交，什至冇交

所以上個學期嘅考試我Fail到一個點，100分滿分我先拎得12分，仲要係咁撞中得而拎到嘅12分，我希望我今次努力溫書之後可以得到一個好嘅成果





「Congratulation, pass. 」Mr. Li喺遞份數學卷比我嘅時候講咗一句，臉上亦有淡淡嘅笑容，佢點點頭

我喺佢手上接過數學試，今次終於合格啦！我就知道努力係有回報，個天真係知道我有努力

我望向方芷諾，我同佢之間嘅距離會唔會拉近咗啲…？

我成個腦入面都係諗緊同方芷諾有關嘅事，特別係，我想同佢表白嘅呢一件事…

如果去到散學禮嗰日，我應該講啲咩去同佢表白呢？我可以點樣令佢知道我嘅心意…？我可以做啲咩…？





「我中意你」

呢句說話對我嚟講太過困難，我好難可以好似若無其事咁，帶着心動得過火嘅感覺，對住我中意嘅人講呢一句說話

「到底我中意方芷諾啲咩…？」我眼尾嘅餘光望向方芷諾，呢一個係我從來都冇諗過嘅問題，我一直以嚟都冇認真咁樣諗過到底我中意佢啲咩，只係因為突如其來嘅心動，而令我知道我中意咗佢

本來嘅佢喺我眼中係平平無奇，一啲都唔起眼，我對於佢嘅認知就只係「同班同學」同埋佢個名「方芷諾」

我從來都諗過我會中意佢，一開始亦覺得佢冇咩吸引到我嘅嘢，就算聽到佢同人講佢中意我，我都只係覺得佢同其他女仔一樣係外貌協會，只不過係因為睇樣而中意我

或者用另一個講法，就係我唔知我有咩值得佢中意，我唔覺得自己有啲咩特別吸引佢

後來，我好直接咁同佢講我唔中意佢，就喺佢開口之前先拒絕佢嘅一刻，我見到佢嘅另一面…「眼淚」

嗰一日嘅佢令我印象格外深刻，同平日嘅佢唔一樣，平日嘅佢總係笑得開朗，但喺嗰一日…明明覺得難受，但點解要強顏歡笑？





喺街燈嘅光下，佢嘅笑容比平日顯得更加難睇，我見到嘅係愕然、係失望，最後係佢擠出笑容，用盡力氣答一句「我明白啦」

明明聽到我講咗咁過分嘅說話理應討厭我已但佢冇，仍然每一次都微笑着，每一次都係…但嗰一刻嘅我覺得冇題…我就係咁樣講咗難聽嘅說話然後又當冇事唔道歉

喺地理室執嘢嘅嗰一日，佢有着細心嘅一面，但同時有少許天然呆一樣，先係撞到頭，然後撞上層架…喺我見到放喺層架頂層嘅紙皮箱搖搖欲墜嘅時候，我毫不猶疑就行到去佢嘅面前，伸手將就跌嘅紙皮箱扶住

或者，對佢與眾不同嘅感覺就喺嗰一刻嘅對望而產生，之後嘅每一個對望，都為我帶嚟觸電般嘅感覺

以前從來都唔會察覺到呢一個人，但佢就好似突然喺我嘅世界中出現，想要嘗試走近我，但我卻親手將佢推開

後來慢慢地，當我每次見到周樂恆同佢行埋啲我都會覺得唔高興，心情一下子就會自動地塌落嚟，我唔中意見到佢同其他男仔行得咁埋…

我嘅心情唔知由幾時開始會隨佢嘅一舉一動、一顰一笑而有所起伏…嗯，的確好冇面，但係我早就冇辦法否認我對佢嘅感覺…





我中意佢，什至比自己想像中更加中意佢…的確我咁樣講真係唔算啲咩，行動比語言更好對吧？

中意一個人，最怕嘅係喺未開口就已經被拒絕，對方親手喺你嘅面前劃下一條界線，望住對方無情嘅樣子，望住對方走遠，而你卻只可以停留喺原地，將一塊又一塊心嘅碎片拾起…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link