［愛情甜故前傳--無糖純愛］曾經嘅我地，都係兩條平行線⋯: 80. Model Answer

去到Lunchtime嘅時候，已經派咗三份卷，暫時派咗History，Geog同埋英文Writing，三份卷都合格，Geog嘅成績都幾理想對我而言

「你今次又會考得咁好嘅？發奮啦？醒覺啦？」我先啱啱打開個飯盒，徐思迪就嚟串我，都唔知佢有心定冇意，「知要揀科啦終於？」

「係掛。」我敷衍地答咗一句

「你唔好成日都咁cool啦～咁樣會冇女中意。」余嘉偉望向我笑咗一笑

「可能到時佢拍的拖就唔會咁cool呢～」Wilson又加把口入嚟一齊講，我都冇佢地咁好氣





「唔係呀，有人中意佢喎～隔離班嗰個女仔。」徐思迪忽然間又講起上次喺茶餐廳撞到我嗰個女仔，「哎喲～」

我無奈地望咗Wilson一眼，咩都冇講就繼續食飯，我連嗰個女仔叫咩名都唔知…都唔係唔知嘅，佢地上次有講過，只係我冇刻意去記住嗰個女仔叫咩名

一旦心入而嘅席位已經有人佔咗嘅時候，其他人喺你眼中都唔算係喲咩…

「你地有冇對邊個女仔有好感之類？」余嘉偉又開啓咗八掛模式，我真係唔太想理佢，所以我都係坐喺一邊聽就好啦

余嘉偉一問，大家都靜咗落嚟，Wilson同徐思迪都同步咁移開視線，我不禁笑咗一下，余嘉偉咁樣喺課室問大家，邊有人會答





「我知葉子朗嘅答案一定係冇，所以唔打算問你。」余嘉偉望向我，好似好了解我咁樣講道，問我都唔會講比你地知，「不過呢～你真係冇對邊個特別有好感呀？一個都冇？」

「唔通你係Gay嘅？」徐思迪一見目標轉移咗就即刻加把口入嚟講，「一定對過邊個有好感嘅～我地班都有啲質素好嘅女仔呀～」

「邊個質素好～」余嘉偉見徐思迪望住佢，就好似要搞氣氛一樣幫徐思迪講埋落去，「嗰幾個都好～」

余嘉偉望向我嘅左邊，嗰邊坐咗五個女仔，嗯…又係嗰五個…方芷諾、李靜愉、游悠、李詩雅，張雯茵；佢地幾個又圍埋一齊食飯

我望向佢地嗰邊一眼，然後假裝不太在意咁耷低頭繼續食飯





「點呀？你對邊個有好感呀？」余嘉偉嘅目標仍然係我，「唔洗話中意，就係…比較有好感。」

「冇。」呢個答案係我嘅model answer，我以同樣嘅態度同樣嘅語氣回答

喺佢地三個人講得興高采烈嘅時候，我微微抬頭望向方芷諾，唔知點解方芷諾都咁啱抬起頭望我，我同佢對望着，佢冇第一時間移開視線

我同佢之間隔咗一段距離，但明顯地佢係同我對望着，我知道佢望住我，我亦知道佢同樣知道我望住佢，第一次我同佢都冇好快咁移開；方芷諾嘅嘴角微微上揚，勾出一個好淺嘅弧度

我都唔知點解我會睇得咁細微，或者係因為中意一個人嘅時候，你會格外留意佢

我嘅心裏有少許在意佢呢一個笑容所代表嘅意思，佢呢個笑容副到底係代表緊啲咩？

我比方芷諾更早移開視線，因為我感覺到我嘅心跳又開始跳得好快，今次我感覺到連臉頰都開始發熱起嚟

「咔啦—」「你去邊呀？」





我突如其來嘅企起身，令徐子迪佢地三個人都同時望向我

「去廁所。」我平靜地講完一句之後迅速地離開我嘅座位什至離開課室去洗手間

我啱啱好努力咁樣壓抑着自己嘅緊張，努力咁以平靜嘅聲線嚟同佢地講我去廁所

我從來都冇試過會同方芷諾對望咁耐，我個心緊張到一個點，我輕輕握緊手先發現我嘅手心出緊汗，我喺走廊望向班房，透過課室嘅玻璃窗望向方芷諾

方芷諾一副若有所思嘅表情，頭微微側着，手托住腮

佢諗緊咩呢…？佢會唔會同我諗緊同一樣嘢？會唔會都係同我一樣覺得有少許害羞所以迴避視線…？

我嘅雙手突然間好似無處安放一樣唔知可以放喺邊度好，我不自覺地就將手插入褲袋，因為手上冇嘢拎住，有種唔知點咁嘅感覺





就喺我番到課室嘅一刻，我見到周樂恆又嚟搵方芷諾，以朋友嘅名義喜歡着，真係令人覺得不爽…

「不如喺暑假之前向佢表白…」

喺我腦海中再一次浮現出呢一個想法，我輕輕地握緊了拳

我唔想佢比人搶走，我想話比佢知我嘅心意，我想話佢知我中意咗佢，想知道佢對我嘅想法，想佢比一次機會我…




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link