［愛情甜故前傳--無糖純愛］曾經嘅我地，都係兩條平行線⋯: 66. Stalk

我抬頭望放喺枱上嘅電子鐘，上面顯示咗宜家嘅時間：09:22

「仲係9點幾…」我企起身行去床邊坐低，將張被掀開，我決定咗瞓多陣先，反正宜家時間仲係好早

我灘喺床上面蓋住被，拎住手機睇，我諗住睇一陣手機先瞓多陣，因為宜家仲係好早，而且溫書溫咗咁耐

反正今日係星期六，可以瞓晏啲，冇錯…今日係星期六，放兩日假先再番學…之前我對星期六、日放假的確會覺得幾開心，但我宜家有種想番學多啲嘅感覺…

我灘喺床上輾轉反則，卻冇辦法入眠，一絲睡意都冇，反而覺得比起啱啱更加精神





我坐起身，心入面有啲無奈，其實我覺得我應該要好好瞓一覺，但無奈嘅係我宜家一啲睡意都冇…平時我瞓喺床上面好快就會覺得對腰好攰，然後瞓着，但係宜家我真係瞓唔著

我房嘅窗簾係會透光，薄薄地嘅嗰一種，所以陽光穿透嘅薄薄嘅窗簾照入嚟，睇嚟我更加冇可能瞓得著…既然係咁我唯有真係起身去洗面刷牙啦

落床之後嘅第一件事，係行去床尾將個風扇閂咗，之後再行出房門去廁所

我濕咗條面巾用嚟洗一洗面，倒咗杯水，濕一濕隻牙刷之後再擠牙膏，我一邊刷牙一邊行出廁所，行到去廚房，打算睇下今日食咩早餐好

我的確唔太識煮飯，但簡簡單單嘅一餐都識煮，早餐呢啲嘢又唔太複雜，所以我都幾在行





我打開雪櫃，見到仲有雞蛋，我喺蛋隔拎咗兩飯蛋出嚟放喺鋅盤隔望，正當我要開埋冰隔睇下仲食咩好之際，我行番去廁所，因為我已經刷完牙，我將支牙刷拎番出嚟，然後呷咗一啖水

「咕嚕咕嚕～」我將含啖口入面嗰啖水吐番出嚟，再沖一沖隻牙刷，然後將佢地放番喺原位

我行番去廚房打開冰隔，拎咗一袋煙肉仲有一包廚師腸出嚟解一解凍，不過講到解凍，當然係直接將佢地沖一沖水啦～咁樣嘅話積喺上面嘅冰可以好快咁就融晒

我先倒少量嘅油落去平底鍋，等油熱咗之後就將蛋放入去，蛋殼掉入垃圾桶，本來冇少許淡黃色嘅透明蛋白慢慢變成白色，呢個時候就將蛋蛋撥開到一邊，放入腸仔同煙肉

通常喺放煙肉同腸仔之前，我都會先將佢地稍微印乾，避免彈油，煮熟晒之後就可以上碟啦！





我拎住放咗早餐嘅碟同叉行出廳，另外仲倒咗杯水放喺碟隔離，食嘢當然要飲水啦！

我右手拎住叉，左手拎住手機滑着睇，睇下今日有咩特別嘢，其實睇嚟睇去都不外乎係IG同Facebook，不過我多數都係睇IG多，宜家個個都係用IG po嘢

一打開IG嘅第一件事就係要睇Story，呢個係習慣，可能因為Story喺最頂，所以好習慣睇咗Story先，我好快咁睇晒其他人嘅Story

「咦…？」我本來一直輕輕㩒落螢幕，但忽然好似發現前一個Story嗰個Icon好似方芷諾嘅IG Icon

我即刻撥番去前面嗰個Story，雙眸頓時集中地望着嗰一個Icon，果然係方芷諾po咗嘢，我仔細咁樣睇佢po嘅story

睇下佢喺邊；睇下佢做緊咩；睇下佢同邊個一齊…我認真睇咗一陣之後就知佢其實只係喺屋企溫緊書，因為佢影住嘅嘢係一大疊書，枱面上井井有條，成疊書係整齊咁疊好，筆袋打橫放喺書前面，一絲凌亂嘅感覺都冇，同我係啱啱相反，我溫個書都好似打晒仗咁，張枱亂到一個點

我㩒落去佢個Icon度，入咗佢嘅個人主頁，佢有好多個帖文，一個都冇刪除，我一直向下滑，見到好多都係佢嘅獨照，偶爾會有同朋友一齊影嘅相

我小心翼翼地滑着睇，怕會唔小心㩒錯制Like咗佢嘅相，咁嘅話咪會比佢知道我睇緊佢IG，所以要萬事小心，絕對唔可以㩒錯制之類





我拎起水杯飲咗一啖水，咦…？

啱啱先講完睇嗰陣要小心啲，我隻手指做咩會連㩒咗兩下㗎？咁佢咪會知道我stalk緊佢IG囉！唔得唔得！要喺佢發現之前快啲unlike番先

我鎖咗手機，將手機放喺一邊，企起身嘅同時拎起食完嘅碟同叉行入廚房洗嘢，我習慣食完嘢就即刻洗，因為唔想啲油跡痴喺鍋同碟上，唔想浸完先洗，所以會一食完嘢就洗嘢

「好想快啲到星期一…」我一邊洗碗，心中默默講道

中意咗…唉，自從中意咗方芷諾之後，每一日番學都係一個期待嚟…我比起平日都早咗出門口，因為有一次我留意到只要我平日早10分鐘出門口就可以見到佢

所以我宜家番學都會早10分鐘出門口，好多時都會見到佢，好彩我地住得近又係同一班，雖然星期六日見唔到佢…以前我都覺得番學好悶，但宜家就唔係








IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link