［愛情甜故前傳--無糖純愛］曾經嘅我地，都係兩條平行線⋯: 65. 我是乖孩子

我番到屋企之後同平日都一樣，沖涼、洗頭、換番屋企衫，最後入房

我打開History書，拎埋夾喺入面筆記簿出嚟，今日溫History，希望趕得切溫晒咁多課…

我唔係一課都唔識，但唔多囉…識嘅都係好偶爾聽書聽到番嚟嘅，但係唔識嘅比識嘅仲多先係最大嘅問題

雖然對History唔係話特別感興趣，但係考試要考我有咩辦法，唯有努力啲溫書追番個成績，可能未必追到幾多但盡咗力總好過咩都唔做坐以待斃嘅…

上個學期嘅分數同今個學期嘅功課分、平時分應該就拉唔到幾多，不過考試佔嘅百分比多啲，所以今次考試只要考得好睇啲應該都唔會有咩問題





希望今次考得好啲次餘，下年仲可以同方芷諾一班就好啦…希望我地可以分到入同一班啦

我反覆背着筆記入面嘅內容，叫得做筆記，入面抄嘅當然係重點，所以背晒呢本嘢之後就Okay啦，本筆記入面有埋上一個學期嘅嘢，但背晒呢個學期嘅先會比較重要，因為今個學期嘅考試應該都係出今個學期教嘅嘢為主

背完呢一頁我就掀去下一頁，我都唔知道背咗幾耐，我望一望鐘，8點幾，休息一陣再繼續溫

我企起身拎埋比歷史書同筆記擋住嘅手機行出廳，當做下伸展運動，我溫咗3個幾4個鐘頭書，休息半個鐘唔係好過分啫

「叮～噹，叮～噹…」





就喺我行到去梳化前面嘅時候，門鈴響起，呢個鐘數會係邊個…？我轉咗個方向行到門前，打開咗木門，見到我媽企喺門口

「呢幾日你都唔上嚟食飯呀？」喺我打開鐵閘嘅同時我媽講道，「我拎咗飯落嚟比你。」

「嗯…」我從我媽手上接過飯壺，轉身就將飯壺放到餐枱上

我媽行咗入嚟，閂上鐵閘同門，我冇多理，直接就拉開木櫈坐低，將飯壺擰開

飯壺分咗兩層，上層放咗餸，下層放白飯，我挑起上層嘅把手然後將上層抽出嚟放喺飯壺嘅蓋上，我媽坐喺我對面望住我





「你呢幾日做咩唔上嚟食呀？」我媽問道

「溫書，嚟緊考試。」我當然唔會話比佢知我唔上去食係因為唔想上去啦，不過考試要溫書的確係事實嚟，我真係有乖乖地喺屋企溫書

我見我媽冇出聲，稍微抬眼望佢，見到佢一臉愕然咁…都係嘅，喺佢心目中，佢個仔都算係不學無術嘅

「考試加油，要揀科上高中啦，比心機。」我媽同我講咗一句，我心裏係有啲愕然，因為我從來都冇聽過我媽同我講呢啲嘢，我媽好少會同我講讀書上嘅嘢，亦都唔會同我講呢啲好鼓勵性嘅說話

不過我對於佢對我嘅想法我都唔太在意，我一直都唔會特別介意自己喺其他人心中嘅想法，宜家可能會有小小唔一樣

「嗯。」我輕輕咁嗯咗一聲，我同我屋企嘅關係真係冇話特別差，但亦稱唔上好

我早就習慣咗自己一個，所以就算點都好都一樣…如果你問我將來會唔會養我爸媽，我嘅答案係「會」，可能你又會覺得好奇怪，我既然講到同屋企關係咁一般，點解仲會揀養阿爸阿媽

養父母唔係天經地義㗎咩？而且佢地對我都唔係特別差，好多嘢都係佢地買比我，只係我唔太中意上去食飯啫





我將食完嘅飯壺擰番好，然後遞比我媽

「我番上去先。」我媽接過飯壺，然後企起身行去門前

我媽番咗上去之後，我將廳燈閂上然後入番房繼續溫書

我再一次坐低喺書枱前，其實要咁樣溫書真係有啲攰，但係卻有半分覺得宜家咁努力係值得，我好似從來都冇試過真係咁比心機溫書，曾經都試過努力讀書，但喺F.2開始我就唔知因為咩原因而冇再努力過

我再一次拎起筆，一邊抄一邊背下筆記嘅內容，望兩眼筆記入而寫嘅嘢，然後用手蓋住啲字喺心中背出嚟

記得有一次我問方芷諾借History筆記抄，佢本筆記好整齊，明明楊sir講得咁快，但佢仲可以寫得井井有條咁，一絲凌亂感都冇，該Highlight嘅都用螢光筆Highlight咗

我伸手拍咗自己嘅臉頰兩下，好啦！溫書啦！我今次要考個好睇少少嘅成績番嚟





…

我坐起身，用力睜開雙眼，用盡全身嘅力氣伸一個大懶腰，伸懶腰嘅時候我仲要聽到啲骨有「咔啦」嘅聲音，因為我醒嚟嘅時候我並唔係瞓喺床上，而係伏喺書枱上

枱面一片凌亂，同琴晚一模一樣，睇嚟我琴晚係溫書溫得太攰所以直接就伏喺枱面上瞓着咗，最好笑嘅係我手上仲拎住原子筆




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link