［愛情甜故前傳--無糖純愛］曾經嘅我地，都係兩條平行線⋯: 33. 誰花痴了？

「做咩突然咁嚴肅咁嘅？你搞到我比你嚇咗一嚇啦！」我笑起嚟講道

「芷諾呀，你中意葉子朗都一段時間啦，可能時間唔太長，但係都成個幾月有多啦！」靜愉突然間替我擔心咁講道，「你真係打算一直都唔同佢講呀？」

「其實我都喺度猶疑緊應唔應該同葉子朗表白…」我自己都有啲迷惘，「但難得我同佢熟咗少少，我唔想破壞我同佢之間少少嘅熟絡呀…」

「但你主動同佢熟，你都係想喺佢身邊多啲啫唔係咩？」靜愉反問道，「你點解就唔試下同佢表白啫？」

「我中意佢又點啫…陣間佢拒絕咗我咁點算？」我始終有啲擔心，「靜愉…我都想好似你講嘅咁有勇氣…其實所有事都好簡單，同佢講嘢又好點都好，一切都好簡單，只係…」





「只係咩呀？」靜愉見我欲言又止，便頓時問道

「只係因為我唔係同普通人一樣當佢係普通一個同學…」我唔知可以點樣，所以只好拎住手上嘅筆，捉住筆嘅一頭一尾，「佢對你嚟講係普通同學，但對我嚟講…佢係我中意嘅人…我都想好似你咁樣做咩都咁勇，但係嗰下真係要鼓起好大嘅勇氣走向佢…」

每次我行向葉子朗之前，我都要深呼吸一下，然後先可以假裝同其他人一樣自然地走過去佢隔離，走到一個同佢更接近嘅位置

「我一直都唔明白，到底你中意葉子朗啲咩…」靜愉一邊執嘢放入書包，一邊講道

我一開始都唔清楚我中意佢啲咩，因為我只係單純地比嗰一刻嘅佢吸引咗，我都冇多諗到底我中意佢啲咩





其實葉子朗好有自己嘅個人魅力，縱使喺其他人眼中佢係一個讀書完全唔叻，什至唔中意讀書都好，佢都有方法令自己突出

我好難指出一點成為我中意葉子朗嘅原因，因為佢嘅性格同個人魅力先係最吸引到我嘅嘢

「唔知呢～」我笑一笑講道

「你又開始花痴啦救命！」靜愉一臉嫌棄咁望住我，佢孭住書包企起身將佢嘅枱櫈移番執本來嘅位置

我孭好書包之後都拉一拉條裙，然後望向靜愉，睇下靜愉行得未





「行得啦花痴～」靜愉對住我講咗一句然後就直行

「你話邊個花痴呀？」我即刻跟上靜愉嘅步伐，同佢一齊行出課室

我同靜愉行到出去學校門口嘅時候，聽到有「噠、噠、噠」拍打籃球嘅聲音，我知道一定係葉子朗又一個人打緊波

我嘅嘴角不禁揚起，喺我腦海中全是葉子朗嘅身影，佢嘅身影就好似刻咗喺我嘅腦海中一樣難以抹去

我想記住佢嘅身影，佢嘅背影特別好睇，企喺佢身後時我嘅心都會不自覺地跳得好快，或者只係因為我中意佢啦

我始終冇表白嘅勇氣，我覺得只要可以默默地喺佢身邊守候，我已經會覺得滿足，我唔貪心，唔奢望有兩情相悅嘅一日，但至少我希望我可以留喺佢身邊…遠距離望住佢又好，企喺佢隔離以朋友嘅身份望佢都好，我都唔介意

「芷諾？」靜愉隻手喺我面前上下郁咗兩下，「你諗咩諗到入晒神呀？」

「冇咩呀～」我微微一笑道，「只係諗起葉子朗啫～」





「你又諗起佢啦？」靜愉無奈地放低手，搖搖頭，「真係頂你唔順啦！」

「仲話我，你幾時想我再幫你補底呀？」我拉開話題，將問題掉番去靜愉嘅身上

「聽日囉～聽日去我屋企同我一齊補底…幫我補底先啱～」靜愉笑了笑，「最多我請你留低食飯啦～」

「本來仲想話猶疑一下，考慮下先答你添～」我伸手挽住靜愉嘅手臂，「不過見你出動到阿姨嘅廚藝就當然要去啦！」

「當然啦～你睇下嚟幫我補底嘅報酬幾厚！」靜愉豎起一個大姆指

「阿姨煮嘢真係好好食！」我都豎起大拇指

以前我屋企真係得星期六、日先有飯食，因為我媽星期六、日唔洗番工，所以可以煮晚飯…簡單嚟講我就係星期一至五都係冇飯食，都要靠自己買飯又或者煮嘢食





有一次我喺靜愉屋企，同佢一齊做功課，阿姨知道我成日都冇晚飯食之後，好多時都會叫我上去一齊食飯，嗰陣我每個星期都會有兩、三日上去食飯

宜家我媽比起以前多咗煮飯，有時公司冇咁忙佢就可以番嚟煮飯，雖然一個星期都係得兩日左右，嗰計星期六、日嘅話

我已經好耐都冇試過阿姨嘅廚藝啦～所以今晚喺靜愉屋企食飯，係好好好好好事嚟嘅～




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link