［愛情甜故前傳--無糖純愛］曾經嘅我地，都係兩條平行線⋯: 32. 你真的不表白？

「芷諾，今是你放咗學之後得唔得閒呀？」靜愉突然上上下堂嘅時候問我

「今日？」我聽到靜愉咁問之後就諗咗一陣，「得呀，做咩呀？」

「教我做功課呀！」靜愉微微耷低頭望向我講道

「好呀。」我比咗一個Okay手勢佢，我低聲問佢

落咗堂之後，我側住身坐望向靜愉，靜愉正好努力咁抄緊筆記，我見坐佢前面嗰個男仔行開咗之後，我便企起身行咗去嗰個男仔個位度坐低





「你拖咗成個幾星期，終於肯留低趕進度啦？」我望住靜愉嘅筆記簿笑道

「哎呀，你唔好窒我啦！我發現其實同考試嘅距離都唔係好遠咋！」靜愉苦惱地抬頭望我，「我再唔追進度嘅話我就真係死啦！」

 「乜原來你都知道好弊㗎？」我無奈地講道，「仲有一個月多啲就要考試啦！你宜家努力啲都追得切嘅～」

「咁呢個重任就交比你啦！」靜愉伸手抬住我嘅博頭，然後笑嘻嘻咁講道，「不過就要委屈你一兩日啦～」

我疑惑咁望住靜愉，我個腦仲未明白到靜愉想講咩





幫佢溫書追進度有咩委屈呀？雖然靜愉成日都唔番學，但其實靜愉都蠢唔晒，每次嘅進度都好易跟得上，我教佢嗰陣都唔吃力呀～咁有咩要委屈呀？

靜愉冇講嘢，仍然咪咪嘴笑 ，只不過今次，佢嘅眼神移向右邊

我跟住靜愉嘅眼神向望嘅方向望去，喺我視線範圍內嘅只見到葉子朗，我頓時就知道靜愉講緊有啲咩「委屈」

咗我

「你知就好啦！」我即刻斜眼望靜愉，嘴角帶着少許嘅笑意，「所以你同我努力啲追進度呀！唔好要我嘅「委屈」白廢呀！」





「知道！」靜愉瞬間遞出一個Okay手勢，「我會努力㗎啦！放心！你嘅委屈唔會白廢㗎！」

「係至好講呀…」我望住靜愉無奈咁笑，「如果你唔好好努力就知死！」

「我會呀！」靜愉笑了笑講道，然後又耷低頭繼續努力咁抄筆記

放學嘅時候，我將我唔拎番屋企嘅書都放喺Locker入面，靜愉去咗洗手間，所以我執完嘢之後就坐喺位等佢

我拎定數學書出嚟，因為今日靜愉叫我教佢做數學功課，所以我就擺定數學書同數學堂課簿出嚟，方便陣間佢一有唔明我可以即刻答到佢

課室裏嘅人一個一個咁離開，都係嘅…畢竟今日係星期五，個個放咗學之後都會想盡快番屋企過一個Happy Friday㗎啦～

唉…明明今日係星期五，聽日係星期六，後日係星期日，明明我又要等兩日先可以再見到葉子朗，但係我今日竟然冇機會睇佢打波或者同佢一齊走，唉～不過我唔會重色輕友嘅～始終都係靜愉重要啲，學業同戀愛邊樣嘢重要？當然係學業啦！

宜家課室就得番我一個人，仲有啱踏入課室嘅靜愉





「點呀？番嚟啦？」我望向喺門口行入嚟嘅靜愉，「快啲做功課啦！今日我想要個Happy Friday呀！」

「呿…Happy Friday…」靜愉反咗一個白眼，「唔好話我睇死你呀～你係想落去睇人地打波咋～」

「唔係囉！」我即刻反駁道，「佢邊有你咁重要呀？我真係想快啲番屋企休息㗎！」

「好啦好啦～」靜愉聽到之後笑了一笑便向我走過嚟，坐企喺我隔離做功課

都唔知過咗幾耐，我偶然抬頭望鐘，原來先4點45分，我望向靜愉，見到靜愉一時拎起計數機，一時又拎起筆繼續寫

「你有冇邊度唔識呀？」我問靜愉

「暫時都Okay…」靜愉好專心咁做緊，所以答我嘅時候聲線都細咗





「咁有問題你記得叫我教你。」我微微一笑講道

「嗯…好呀…」靜愉真係好專心，我睇得出佢真係想努力讀好書

其實靜愉嘅成績唔差，除咗係我平日都會幫佢一把之外，仲係因為佢自己頭腦好，所以成績唔太差，如果佢肯再努力啲，我諗佢成績一定可以更好

我托住頭望向外面，呢個時候外面嘅光都開始變成淡淡嘅橙黃色，話咁快中三又差唔多完啦…

「芷諾。」靜愉叫咗我一聲，我頓時朝靜愉望去

「邊度唔識呀？」我側着頭望向佢做緊嘅練習題，但我見到最後一題都已經寫咗最終答案

「我想問你…」靜愉突然認真咁講，我有啲疑惑咁望住靜愉，靜愉一臉認真地緩緩開口，「你真係唔打算同葉子朗表白呀？」








IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link