《EU超時任務》續作: Chapter 5：第三次穿越
4月1日0800
起床不久，收到威爺訊息:
「今日如果我係醫院見到個西裝友，會跟一跟，查下芷澄單野。我唔同李sir報番工住。」
「你小心，佢係阿正既人，上次幫鍾永啟帶走賀展祥。」我説道。
「我遲早揾郭尚正架啦，佢唔露面都好。」威爺説道。
「你忙你既，我地會查黑警個邊。」
「查還查啊，唔好咁易鎖定二哥就係，你知上次我點架啦。」他不厭其煩說道。
「得啦，長氣。」
下樓，小美還在睡，今次渠頭慢條斯理來到我的家，沒有向父母親表達我倆關係?
「早啊海叔燕姐，有野揾Madam。」他説道。
「出去花園傾。」我向他揮手。
「兩個一朝早古古怪怪。」父親莫名其妙。
「後生係咁架啦，話唔定發展緊呢。」母親笑道。
來到花園，渠頭拿起水壺淋植物，狀甚輕鬆。
「喂，今次冇表白喎。」我故作生氣。
「訓嘰笠，我發現次次咁真係唔得，我係好愛你啊但講得多就唔靈，所以我決定解決所有野先公開我地關係，得唔得先?」
「點話點好啦，唔差咗等多陣。我地要開工啦，唔比阿添出事。」我説道。
「嗱，今次目標，避免小美同賀生有聯絡，要監視佢出入同係手機裝偷聽。我去揾劉Sir查二哥，你就同阿添傾下啦。筲基個邊，我就未有頭緒。」
「威爺要主力查威嫂單野，唔得閒理我地。我想揾多個人幫手查黑警，但我而家仲未識得佢。」我說道。
「你話何sir何天光啊?信唔信得過架?揾海叔聯絡佢咪得，就今日啦試下佢底細。」
「一間問。」我説道。
「但羅波點?而家由得佢地匿係山?」渠頭問。
「上次你地去捉，阿正又成班人，都可以比羅波走甩，證明唔work，係有黑警睇住。今次我地試下唔好行動，可以試下二哥先。」
「好能蟹啊，跟得我多醒咗，諗野周全咗......咁各自行動啦，我唔係身邊記得掛住我啊。」
他離去前想擁抱我。
「哦~原來你同渠頭秘密拍拖。」小美出現在背後。
「你係到匿埋幾耐?多事啦，頭痛番入去抖，低調啊。」渠頭笑道。
「好啦，再聯絡。」我説道。
第三次穿越
4月1日0930
Eu總區
我提早約了阿添回來聊天。
「Madam，有咩特别野揾我?」他説道。
「見你近排好似好多野煩，係咪關於屋企人?」
他隱瞞的事，今日我一定要了解清楚。
「都係緊張個仔健康姐，一間佢去打針，有心啦。」
「唔好去打針啊，聽講啲疫苗針唔好，我介紹個兒科醫生比你啦。」
我找地址給予他。
「唔該晒，平時Madam你冇咁細心，成日黑起面，我地好緊張，係得威
爺先壓得住你。」阿添笑道。
「咁經歷得多，人會變既。」
他坐在梳化裡仰頭説道:
「又係啊，一年前Eu同而家都唔同，阿正走咗，郭sir同鍾永俊居然係黑警，如果係自己人可以點做?」
既然他主動提及，我就開門見山了。
「你係咪懷疑二哥係黑警?」我輕聲說。
他起初有點愕然，很快走過來關上門，問道:
「Madam你都懷疑佢?」
「我想知你發現啲咩。」
「最近哩幾日，佢神神秘秘咁傾電話，我琴日試過跟蹤佢，發現佢同有
啲古惑仔來往，係以前大坤啲人。佢話賭波爭人債，人地追數，但我諗
唔係咁簡單。」
大坤的手下是羅波，他受到黑警保護是明顯的事，但二哥這件事會否有很大嫌疑?可以是巧合，雖然他在幾次抓羅波過程中，經常不服從命令，但影響只是很少。
「你唔使再查，我叫咗人去啦，你而家一家大細，人地黑警集團咁龐大，我唔想你出事，聽我講，交比我!」我強調着。
「啊......好啦，我諗Madam有你既佈署，如果有用得着我，咁我先幫手啦。」
呼，那阿添不會再因調查出事。
我差點忘記今晚要約何Sir晚飯，他就發訊息過來。
「海叔打比我嚇一跳，好耐冇聯絡，佢話你想揾我，如果公事上幫到Eu既出句聲。」
「方唔方便今晚傾?關於好緊要既野。」我説道。
「好。」
二哥，阿dee開門進來，站在後面的是威爺。
「威爺你又話唔番嚟住既。」我問道。
「冇料到咪番嚟。」
「威嫂揾番啦喎，今日Eu齊人好開心。」阿dee説道。
開會時，李sir提及人口失蹤一案。
「威爺老婆突然揾得番，但係仲有好多人唔見咗，上頭話今次可能係一個線索去查，要同重案個邊合作揾到幕後主腦。」
他的意思是説要找威嫂調查?愛妻如命的威爺不會由警方騷擾她吧。
「威爺，如果要揾阿嫂問野方唔方便?」他問道。
「冇問題，不過最好等佢精神好啲先。」
沒料到威爺爽快答應。
「好!咁冇野就散會，二哥你留一留低。」
李sir找他到底是甚麼事?
大家出去後，來到茶水間等候，唯獨威爺不見了人。
「你估二哥咩事吖啦。」阿dee問道。
「工作態度掛，成日唔聽Madam講。」阿添掃視我一眼。
「我去揾揾威爺。」
找了一會，只見他剛好脱掉耳筒。
「你做緊咩啊?唔通你偷聽緊?」
「係聽完。」他顯得若無其事。
「你幾時裝咗偷聽器架?」我問道。
他環顧四周，輕聲説道:
「喂 你唔好咁大聲好唔好?如果有黑警你死咗啦。我覺得有必要係總區一啲地方set野留監視啲人。」
「咁佢地係房講咩?」
我戴上耳筒，他開始播放錄音。
「二哥，我收到消息，icac查你係咪黑警，你搞咩啊?」李sir少許憤怒。
「係咪搞錯啊?邊個報架?」二哥反問。
「我唔知，但我知你同大坤啲人行得埋，借錢又好咩都好，你同我醒定，你都唔想我停你職，Eu唔好再多個黑警。」李sir説道。
二哥無言。
「番出去啦。」
「估唔到李sir都收到幾多料喎。」我説道。
「自從郭偉誠單野後，都唔知成個新界有幾多部門有涉及，人人自危，所以點都要保護自己。」
「你意思李sir都有可能?」
「嗱，佢地係咪黑警我就唔知，渠頭話你會揾何天光，你可以選擇信唔信佢......夠鐘出車。」他站起來説道。「話時話你又會比佢地揾威嫂既?」我問道。
他冷笑了一聲，解釋道:
「Madam，我會睇住芷澄，更何況都唔會問到幾多野架啦，等到佢精神
ok可以問得個時，一早過咗三日。我地又嚟過既，成世都問唔到。有啲
野真相係唔使説明。」
那又是的，威爺不會算錯。
第三次穿越
4月1日14:00
阿正和羅波都低調行事，我們再不見他們的貨車在街行走。
準備午飯時間，大家下車。
「好啦，又巡完，準備食飯，阿添，二哥，食咩?」阿dee説道。
「食咩吖，鮑魚都冇味啊，又冇錢。」二哥在抱怨。
「比李sir照肺完係食唔落架啦。」阿添笑道。
怎料二哥突然反應甚大，罵道:
「你笑咩?我知啦，你前日跟住我，係你報串比李sir聽我差大坤啲人錢!係咪你報icac話我係黑警!?」
「吓?二哥你咁搞法?我地警察嚟架。」阿Dee愕然。
「借錢咋喎?咁就話我係黑警?!」二哥怒火中燒。
「我冇講過，你係行得正唔會有人port你。」阿添平靜回答。
都是我和渠頭責任，令現在手足内拱。
「唔好嘈啦，二哥，其實......」
「其實買得飯未?」威爺在車内指指手錶。
二哥和阿添分兩邊走。
「Dee，陪阿添，順便幫我地買埋。」
他離開後，我回到車上。
「睇見佢地真係......十足我地上次嘈咁，係差咗未拎槍出嚟。就係因為黑警哩樣野，搞到互相懷疑。」威爺笑了出來，搖頭。
「唔該晒你。」
「你頭先想自爆，如果我唔阻你，仲更加禍。咪由佢地囉，有時阻止混亂唔一定要咁，我地冷靜啲去睇，唔使下下都出口又出手。」
我明白威爺長久而來的沉默不是冷酷，是旁觀者清。
第三次穿越
4月1日20:00
下班後，何天光，劉sir約在同一地方，見對方還未到，我們聊聊今日事情。
「你個邊二哥點?」渠頭問。
「李sir知icac查二哥，發晒脾氣，二哥又同阿添嘈，而家好煩啊。」
「下?icac咁易漏風出去咩?」
「咩icac漏風啊?關鼎名。Madam你都係到啊?」
劉sir雙手插袋，停在面前。
「你嚟啱啦，查二哥查成點?」
「你同Eu都冇關，無啦啦比料我，我諗到都係Madam叫架啦。」他說道。
「我線人嚟，講你就講啦。」渠頭沒好氣說道。
「我諗Madam約咗人，啊村長，我地過去傾，反正你都會講番比佢聽。」
他注視門口，原來何天光來到了。
「一間再講。」我說道。
他們走到遠處座位。
「Madam凌，揾得我咁急，一定係有緊要野。」何天光說道。
「最近我個team人懷疑有黑警，可能同毒販大坤既人有關。」
他喝了口水再說道:
「重案哩邊一直通緝緊羅波。自從郭偉誠一案之後，ICAC開始著手調查黑警，但只係成功拉左佢，好多黑警資料證據都冇哂。如果係有咁多黑警，你一個EU警長知咁多野，都唔應該四周圍講，安全至上。」
「我覺得越高層既越值得查。」
「又係，冇理由得一個就退休既郭偉誠可以係新界做咁多野。」他點頭和應。
「我地Keep住互相交換情報。」
「唔介意既我有啲野想問，關於郭尚正。」
我知他可能提及阿正將要做的事。
「係咪佢有咩野?」我明知故問。
「唔，其實重案留意到新界近排多咗好多中東人，同國際刑警傾過，懷
疑郭尚正幫人做非法交易。你同佢仲有冇聯絡?」
「冇，我諗你問佢老婆好啲。」
臨走前，他語重心長地提醒：
「有咩消息CALL我啊，唔好自己去查。照行事規模，直覺
話比我聽兩邊既勢力好大，唔再係咁簡單。」
不久後，渠頭與劉sir談話完畢，二人走過來。
「咁你地有咩料記得報比我聽，大家好好合作，黑警貪污又好，
恐佈份子都好，都唔駛驚。」劉sir滿有自信地說。
「得啦得啦!你唔駛長氣，你叫你條針跟貼啲郭尚正個邊，自然有料到。」渠頭說道。
劉sir冷笑一聲，雙手插袋離開餐廳。
「點啊?今次有冇咩新線索?」我問道。
「點會有吖，劉sir成日耍太極。我地每次番嚟，見到既野問既野差唔多，都係靠運去撞。唯一可以肯定既係......」
渠頭欲言又坐看着窗外，遠處是水晶梨出現，張望一番後上了一車輛離開。
「佢真係劉sir條針，就算收得幾埋，咁唔小心，遲早都會比人知，更何況icac邊夠裙腳仔陰險啊?今次水晶梨慘啦。」渠頭說道。
我擔憂若阿正知道身邊所愛出賣他，會有何舉動?
「訓箕笠，你諗緊郭尚正知道咗會點對水晶梨啊?」
渠頭撫着我的手。
「你點知架?你係我心入面條蟲?」我笑道。
「我咁有型點會係蟲啊?不過係訓璣笠就冇所謂，24小時係你心入面，唔會唔記得。」他囗花道。
「話時話小美今日有冇咩動靜?」
「哎啊，我又要係出面搞哩樣個樣，就算有電話監聽都好難24小時mon住佢去邊。其實只要聽晚賀展祥冇比人救走，自然影響唔到小美。」
真是的，渠頭，絕不能粗心大意，一件小事足而變成大事。
「咁仲有隻usb嘛，一樣關小美事。而家個個都要睇緊，阿添冇事，又唔知今次輪到邊個。」我抱怨道。
「好難搞架，我地計埋神秘人得四個人，要顧住所有人條命，盡做咋。」
「我都知大家穿越咁多都好辛苦......番去啦，渠頭。」
「Yes ,madam!」
現在沒有認識的人，他才可以牽着我的手享受一刻甜蜜。
到了村內，小美獨自在散步。
「咁夜，小美走出嚟做咩?」
渠頭想上前找她，我截停了他。
「由佢啦，我覺得自從賀展祥坐監之後，小美冇一日真係
開心過，最多係苦笑。我咩都幫唔到。」
「唔關你事既，而家個個都學晒威爺咁收埋唔講，點關心啊?好似筲基咁，做咗國際刑警後，我都唔係好知佢做緊咩。」
「講開，上次除咗小美，筲基都失蹤，唔知係咪查到啲野。」我說道。
「我諗起一樣野，成件事真係好似曾相識，第一次係海叔死，第二次到阿tim，咁今次咪到筲基?點搞?下次又到我啦，扔落海喂魚。」
渠頭來回度步，抓抓頭。
平常嬉皮笑臉的他也是有擔憂時候，我只好拍他的肩膊，說道:「有我救你啊，你唔記得啦?」
「我緊係記得，就係個次之後我地先拍住上，拍拍下拍埋拖添。」渠頭又一面不正經。
「總之你救我，我救你，大家唔離開大家。」我說道。
「威爺就慘啦，冇人救佢。」他笑道。
「佢救我地就差唔多。夜啦，仲有好多野做，唔駛送我。」
「咁聽日再見.....」
他靠近我的臉，本以為會吻我，結果沒有。
「你刷咗牙先錫你，哈哈。」
「抄我，好啦，bye 。」我笑道。
我們各自回家。
第三次穿越
4月2日 00:00
4月2日0730
才剛起床，渠頭就打電話過來。
「早啊，訓箕笠。」
「有咩咁急要打電話嚟啊?過嚟揾我咪得。」我說道。
「我琴晚諗咗陣，終於諗到點將賀展祥同小美既影響減
低，只要報料比警方知，到時有人會劫走賀展祥，咁咪唔
會比佢去醫院，留係監獄，小美就同佢冇接觸。」
「但咁咪見唔到最後一面?點解唔加派警察護送?」
「唔理得咁多架啦。係出面，警察係冇用架，鍾永啟一個
都ko佢地啦，況且郭尚正而家咁把炮。你話係監獄，佢都
唔敢劫獄吖。」
倒又是的，我總是顧及人情方面，而怱略了事件安全。
「咁好啦。但賀展祥對阿正後面既大boss重要，如果帶唔
走佢，又唔知會點。」
「哩個只係其中一樣，佢最重要係同中東佬啲交易，但唔
係咁易解決到。你睇住Eu個邊，繼續留意黑警，其實二哥
都未必係上次殺阿添兇手。」
如果不是二哥，更加是沒有可能是阿dee，當時留在警局只
有李sir一人，但我不想亂作懷疑。
「......靜咗既?」他問道。
「咁今晚你同筲基唔使去停車場，同佢傾下啦，等我地幫佢。」
「我實問個衰仔諗住搞咩，遲少少再傾啦，見步行步。」
「今晚再見。」
掛線後，我開門時看見小美站在這裡，一面愁容，她顯然
在偷聽我和渠頭對話。
「係到做咩啊?有咩就問我啦。」
「SORRY，其實我唔係想偷聽，只係頭先想揾你個陣，門
口聽到你講起阿哥，先聽落去。我唔明你話咩最後一面?咩
劫獄，關郭尚正咩事?」
面對她的疑問，我不知如何是好。
「件事好複雜，總之你要相信我地係想你同賀展祥安全，ok ?
生死有命，但可以改變到既我盡改。」
聽見我的話，她由低落轉而歡笑，勾着我的肩膀。
「我明架啦，可以改變到既盡改，我信你為咗我好。
快啲落去食早餐啦，去揾渠頭，哈哈。」
「喂，細聲啲啊。」
她向我伸脷，下樓去了。
或者我們的任務不一定能夠完全阻止壞事發生，但至少盡量令人有一刻安心。
4月2日0930
Eu總區。
只見威爺早了回來坐在茶水間，他不用陪伴威嫂多些嗎?
「咁早啊，Madam。」他說道。
「你都係啊，唔駛去醫院咩?」
他喝了囗咖啡，放下杯子，再說道:
「哦，老婆話唔係有咩特别野，就唔駛麻煩我走嚟走去。
咁我咪早啲番嚟，睇下有咩搞。」
「其實暫時冇架，渠頭睇住筲基同小美個邊，我就繼續查
二哥係咪黑警囉。阿正同羅波個邊都冇咩聲氣。」
「唔唔，你地小心就得，一間有咩事，我費事自己一個番
去，唔理架啦。」
我感覺到他又變得慢條斯理，不知是否因為穿越得太多而沒趣。
「你會唔理我地咩?」
「上次渠頭咪又係自己一個番去，我睇得開。我玩咗百幾
次啦，有得揀仲要玩?」
這時，二哥，阿添和阿dee回來，他們看見對方都是狀甚不
和，現在還未有確定二哥是黑警，我先要穩定好團隊。
「二哥，我相信icac既調查，如果你冇做過，一定會比番清
白你，不過你就戒賭啦，就算借錢都唔好揾個啲人。添，
大家一team人，都唔好咁多猜忌，二哥脾性我地都知......
威爺講句野。」
「係啊，之前madam同我都好多誤會，但時間會證明到啱
定錯，唔駛急於定論。」他緩緩開口。
「我地都係一家人，嬲乜鬼?」
阿dee 將二人拉過來，他們勉強接受。
「我就好大方既，平時贏波都請食飯，點話點好。」二哥說道。
「如果你清白冇野既，我請番你食加句sorry。」添說道。
雖然看見威爺冷笑，但我知道他其實感覺安慰。
「好啦，準備開工，齊上齊落。」我說道。
4月2日 13:00
附近平安無事，休息時，渠頭發訊息給我:
「我而家陪小美，祥媽準備入院，我匿名send咗個訊息去
賀展祥個監獄長官到，話醫院會有埋伏，叫唔好放佢出
嚟，應該就冇野。同埋我約咗筲基今晚見面。」
「好，我個邊暫時冇野，keep聯絡。」
威爺過來問道:
「今晚係咪又要去睇住賀展祥?」
「如無意外就唔駛。」
「哦，最好啦。」他回到車上。
第三次穿越
4月2日1830
「無驚無險又到六點半。」二哥說道。
手機信號不清晰，沒有辦法問渠頭哪邊狀況，但照道理是
沒有問題的。
「沙沙沙......各單......沙沙沙，位住意。」
為甚麼電台又會有通知?賀展祥不應在監獄的嗎?
「威爺，整整佢好。」二哥説。
「181收唔收到?有人想係醫院停車場劫走賀展祥，但經已
被制伏，仲有名西裝男人逃走，請留意附近有冇可疑人
士。」
「收到。」
4月2日0900
一下班，我去酒吧找渠頭。
「點會咁?明明你叫咗佢地唔好帶賀展祥去。」我不明所
以。
「我諗佢地照去係想睇下背後有咩人救賀展祥，有晒準備
捉鍾永啟，又係我搞出嚟既蝴蝶效應。」他洩氣說道。
「算啦，冇人知班黑警計劃。係呢，又話約咗筲基?」
「callcall佢先。」
看見渠頭的表情，就知道電話又是未能接通。他放下手機，無奈地說:
「係咪姐係筲基一定係會玩失蹤，有野去搞?點揾佢都係冇用。」
「順其自然啦，唔好諗咁多，聽日你要陪小美去拎usb。」我安慰他道。
「係wo，劉sir會派定人手睇住我地，今次賀展祥冇見到小美，咁小美就唔會換走隻usb，icac個邊就可以去解密。掂!而家係得郭尚正單交易未解決。」
「啱啱鍾永啟比人拉咗，我諗佢會再低調啲。」
「遲早收佢皮......」他累得打呵欠。
「攰就我同你番去抖啦。」
「攰?老虎都打死幾隻啊......不過唔掂，穿越都係要能量做運動。你話今晚一齊訓?我地冇公開戀情架。，一間比海叔知道，以為你有咩蝕抵，到時我小渠頭不保。」
他卻展露狡滑笑容，真拿他沒有辦法。
「我見大家經歷咁多，好似冇一刻好長既温馨時間，而家趁有時間嘛。」
上次我們的甜蜜時光，遭阿正的瘋狂而導致慘劇收場，我相信要完全解決整件事，才可重拾真正的美好。
「訓箕笠你好似講到第日冇時間咁，我成個醒晒，打鐵要趁熱啦......」
他又變得精神起來，放下金錢結帳，馬上拖我的手離開。
「你真係吖，難捉摸過威爺。」
我們回家後，因為剛才喝了些酒而安睡至天亮。
第三次穿越
4月3日 0800打開手機，收到父親的wts留言。
「女，你去咗邊啊?咁夜仲未番?」
哎，昨晚沒有告訴他們不回去，一定很擔心我了。畢竟當警察以來，大部份時間下班後都是回家，連拍拖時間也少，只顧埋首工作，怱略了家人。渠頭醒來了，手差點揮向我手機。
「阿爸琴晚揾我。」
「等我同海叔交代，哈哈。」他瞇起眼看着我。
「唔駛啊，我覆番啦。」此時卻收到威爺的訊息.......
「今朝有人報案，筲基死咗係大鼎出面。」
知道這個消息後，我並沒有太大的震驚，要來的始終要
來。猶記得威爺說過，若我的父親沒有死亡，就會換成其
他人，根本沒有逃離命運，要所有人都活着，那最後的代
價難道是我?也許開始明白弟弟所說的:
「如果要再冇循環，唔只係冇穿越時空咁簡單，要將蝴蝶效應消除，有蝴蝶就有效應，引起所有野既本身，姐係最後答案係來自個個人。」
「喂，呆咗既未訓醒?定比海叔鬧啊?等我睇過......」
我把手機展示給他看，他的嬉笑很快收起，整個身子坐起
來，緩緩放下電話，看得出他想發怒，但又強忍着。
「渠頭......」
他離開床，雙手叉腰來回度步。
「死係大鼎出面，肯定係打靶仔做架，係筲基發現咗啲
野，唔怪得唔見咗人。」
「我覺得要冷靜啲諗，如果係阿正做既，點會係自己地方
郁手?就算係，都唔會由條屍係到比人發現。同埋佢而家低
調搞緊交易，咁做要同老細交代。」
他停下來看着我，再坐到我身旁嘆氣道:
「唉，訓箕笠，我真係冇諗咁多，明明有得穿越再查，係
都要唔冷靜。」
「始終身邊人死嘛，以前我都係會激動，但係點做都係有
人出事，學你話咪穿越再查囉。」
我安慰他，握着他的手。
「穿到大家冇穿冇爛為止。」
「而家都急唔嚟，食啲野，你再去睇下點。」
「反正就係我都唔駛同小美去拎usb，哩個時空都唔關我地
事架啦，等今晚再穿越。」他沒好氣說道。
若每次這樣消極，根本對事情沒有幫助。
「都要keep住查既。」
「咯咯。」有人敲門。
「媽子起咗身......媽，我地出嚟吔早餐啦。」
渠頭又要裝作平時的嬉笑，真替他難受。
在早餐過程中，渠頭媽滿帶笑容。
「原來madam同阿仔一齊啊?收得真係好埋，阿仔做咩唔
早啲講啊?」
「媽，我而家人帶埋番嚟見你，有心唔怕遲。訓箕笠比較
怕醜，海叔仲未知架。」
「仲叫人訓箕笠?唔得咁架，改下口啦。一間同燕姐傾下
先。」她說道。
「唔緊要啦，伯母，我地情趣嚟。」
沒想到，此時蔡興國來了。
「啊，笑微，都十幾年冇見，你隻腳......」
「唔好講啦，而家有仔萬事足，好快有埋新抱。」她笑道。
「哩位如果冇搞錯係衝鋒隊既madam凌晨風，明日之星，
原來而家同名仔一齊啊?世事真係估唔到，生老病死更加
係。」
「大sir過獎啦。」
「以前既就過咗去，當正義差人真係唔容易，由其今朝死
咗個國際刑警，可惜......」
他竟然也知道這個消息。
「你都收到風啊?」渠頭不禁問道。
「我同一啲舊下屬都耐唔時聯絡既，聽講係正仔既大鼎物
流倉出事，唔希望佢同老郭一樣。唉，貪有咩謂，害己害
人。」
「我地走先啦，你同媽子慢慢聚舊。」
我們離開後，渠頭再說:
「我諗筲基應該係收到人比料先去大鼎，水晶梨走唔甩，你睇下穿越前，揾佢傾傾。」
「好啦，今晚再講，記得要冷靜啊。」
「知啦，唔通我去揾郭尚正咩。」
他先走一步，我也要回家梳洗。
第三次穿越
4月3日 0900
Eu總區
「你覺得關唔關阿正事?」我問威爺。
「唔關，似係有人想借刀去打擊佢，哩幾年，唔只郭尚正，黑警都醒咗，當然有啲野係我地引起既。但冇幾多野可以做，你知輪住嚟架。」
「係既，我約咗水晶梨今晚見。」
「唔，佢要講既自然會講。」
下午休息時，分别收到小美和渠頭的訊息:
「渠頭陪我去咗律師樓處理遺物，希望阿哥既野幫到icac，解決黑警同所有野。大家都要加油!」
「風，筲基雖然出咗事，但其他人，由其你珍惜既，我冇理由唔理。」
渠頭始終都是囗不對心，是不會放棄的。
「咁先係渠頭，抵讚。」
「抵錫啊，等你同水晶梨消息。」
4月3日2130
在餐廳等了很久仍未見她來，結果收到阿正的電話。
「風，你唔駛再揾阿婷啦，我知佢幫icac同國際刑警查我，
但我唔會傷害佢，我唔係阿爸咁無情。」
果然都在阿正的預料之中。
「筲基既死關唔關你事既?」
「渠頭搞到我帶唔到賀展祥見老細，關少基又影響交易，我唔知仲要同你地玩幾多次，我淨係唔想阿爸坐監，每分鐘比黑警睇住。你地唔好再搞咁多野。」
他知道父親錯的，但還是這樣想法。
「你咁係愚孝。」
「你當初夠為咗海叔去穿越，冇一個人想自己至親受罪，
唔同你爭論。」
我要回應時，他掛線了。
23:30
我早了些到電塔，凝望天空想着如何結束事情。
「訓箕笠，唔見咗人，你做咩唔等埋我先嚟啊?幾驚你有事!見完水晶梨點?」
渠頭冷不防出現說道。
「冇，阿正唔比佢嚟，原來佢知道水晶梨幫手查緊佢。佢冇認到殺筲基。」
「估到架啦。威爺又唔做野，神秘人又唔浦頭，我地好難玩。」
遠處看見威爺慢慢過來。
「夜晚唔好亂講野。」我說道。
「你咁大聲講我唔做野啊?村長，有做你唔知咋。」威爺道。
「講笑姐，嗱，又小器啦。」
「威爺你查緊咩?」我問道。
「唔講得住，你有你地做，小心啲啦。」
「巴閉啦，威爺，唔好一間又比個窿我地踩。」渠頭笑道。
「喂，我地要信威爺。」
無論是甚麼線索，希望威爺能夠解開一些迷團。
4月4日00:00
第四次穿越待續。