《戰港》: 一

阿Wing：「哇隔咗咁耐，終於有得返學。」

恆仔：「最弊嘅係一返學就考DSE呢，屌好緊張呀！！！」

恆仔：「峰哥，我同阿Wing跟你搵食呀，照住細佬呀。」

我：「點照呀，我都淆呀仆街，仲要帶住個口罩考，唉殺左我。」

我就係阿峰，2020DSE考生，準備同兩個兄弟步入刑場，然後揸兜，因為......





屌根本上都唔知點溫書，上半年點溫到書，下半年又疫情嚴重，書都唔洗讀。

阿Wing：「不過又會咁搞笑嘅，我哋三個都喺同一個試場考中文。」

我：「唔只我哋，我地全級都係到添，真係癡撚線，個垃圾政府已經仆街，依家連個DSE都安排到咁，係咪覺得原校考試就唔會交叉感染？」

恆仔：「唉是但啦，一齊上去送死啦。」

上到去坐低之後，發現有啲奇奇怪怪，同之前啲呀Sir講嘅唔太一樣。





坐位少，又冇乜老師，啲老師冇見過，全部都神色凝重，仲有杯水係枱面。

禮台上的人：「嗯.....好，大家好，我係你地今次嘅監考官，基於現時疫情嚴重，教育局為左你地嘅健康，每位考生都獲得一杯水。」

禮台上的人：「呢杯水將會賜予你哋力量，去應付晏少少嘅考試，大家一定要飲左先有得考試呀...嘻。」

全場嘩然。

心諗，笑？笑乜尻？係咪一杯水就可以對抗肺炎？呢個政府真係癡撚線，他日我執政真係將你班冚家剷送去武漢呀屌。





我拎起個杯水，準備飲嘅時候，係喎，食埋粒得力素醒下神先。

五粒糖當藥丸咁食。

我細細聲自己講：「嗯....飲哂，咪又係水，唔通會咩特別功效咩......」

噗！哇前面條友瞓低左。噗、噗、噗噗噗噗......

現場全部考生，得返我一個無瞓低。

禮台上的監考官發現左我，講：「點解你冇瞓低架？同我搞掂佢！」

搞掂我？我向後一望，只係見到一支飛緊過嚟嘅捧球棍，然後就一遍黑色了......