甲賀奇俠: 43.寶藏的形狀

翌日早上，克哉繼續維持習慣，到由紀家樓下迎接

「早晨呀...五十...克...克哉」

「嗯...早晨呀由...由...紀」

即使克哉和由紀已換上上學的衣裝，但兩人對對方的稱呼似乎已有改變


「咁叫結城老師...好似有啲怪」





「佢...仲係叫我由紀...」

兩人均處於小鹿亂撞的心理，導致返校的路上又沒有太多說話


「克...克哉...」

「嗯？」






「我地以後...仲可唔可以一齊睇戲呀？」

由紀甜笑道：「尋晚揾一套黎緊就上畫既戲好似幾得意咁，所以想克哉你...」


面對由紀主動邀請，克哉自然馬上答應

「呃...當，當然可以啦！我仲以為你會覺得同我睇戲好悶添...」






「點會呢，同克哉你睇戲都幾開心呀」

由紀憶起昨日蓋到自己身上的毛衣，心也暖了一道



臨到學校時

「返到學校，我係咪應該...叫返佢做結城老師...呢？」



「咁，我地入去啦，結城老師...」





「嗯好呀，五十嵐老師」

幸好，由紀對於隨時更換稱呼方面沒有任何問題



「早晨日奈！」


「美波！早晨呀」

日奈留意到美波心情不俗：「美波你今日好似...好開心咁既？」


「嘻嘻，算係啦...」





美波心裡非常期待克哉和由紀的發展：「唔知...老師表左白未呢？」


「嗯？」


「丫！冇野呀...」



「美波...最近好似都鐘意將啲野...收收埋埋咁既...」

好友微細的轉變，也使日奈感到距離疏遠







「叮叮叮噹...」

上課鐘聲徐徐響起，使眾學生也返到座位



「各位同學早晨，依家開始點名啦」

克哉和由紀一前一後進入課室



克哉雙目打橫一掃，發覺除了一直關注昨日約會的美波直注現自己之外






還有，紗理依





「叮噹...」


「即係話，呢題只要用到之前教過既兩條公式，就可以輕易解決」

克哉乘住下課鐘聲，結束課室：「好，今堂講到黎呢度啦」



「起立！敬禮！」



「老師！補交功課呀...」

美波藉著補交課業，衝到老師桌前


「尋晚既約會點呀？」課業上，直貼著美波寫的備忘紙


克哉裝作翻看作業，道

「幾...好丫...」


「咁！」

美波馬上降低聲量：「有冇表白呀？」


「...無...」


「吓！！！！？」

美波再度調低自己的音量：「點解唔表白呀，唔通由紀老師對你無意思？！」


「山內你細聲啲得唔得呀...」

克哉輕聲道：「咁果下就表白就真係太過急丫嘛，不過...」


「我最後有叫佢由紀，佢亦好似冇問題...做咩呀山內？」


只見美波扁起小嘴，責怪克哉

「咁都表唔到白，你好冇用丫老師」


「咁...果一刻好尷尬丫嘛，我...」



「啪」

一張備忘紙馬上飄到桌上


「嗯？」

美波再回頭，卻只見到紗理依的背影


「服部紗理依...」

克哉查看備忘紙上的訊息


「今晚九點我屋企等」





「老師...個紗理依...佢到底想點架？」

晚上，美波和克哉正在紗理依的大宅門外等候：「仲要我地吹住風響度等，有冇搞錯呀？」


「佢咁講得，好大機會...係叫我地一齊去揾寶藏」

克哉望望手錶，道：「紗理依...好大機會已經套到森川八郎既情報」





「咔！」

紗理依家的大門作響一聲，似乎就要邀請兩人進入


「老師，我地...」

「入去啦」



兩人一步一步通過玄關



「晚安呀，五十嵐老師，山內同學～」

紗理依和紅龍，正和森川八郎身處大廳中



「紗理依...」

克哉吞下口水，問：「你地已經知道，寶藏既位置？」


「嗯，八郎弟弟已經講左比我知啦～」

紗理依風騷笑道：「如果我地今次冇任何意外，相信係可以輕鬆得到寶藏」


森川八郎摸摸頭，笑著道

「係呀...我已經講左比姐姐聽啦...」



「你...對佢用左幻術呀？！」美波不敢相信，紗理依為了套出情報會對一個中學生使出幻術


「你竟然咁諗我，我點會咁殘忍呀山內同學...」

紗理依走到八郎旁，拍拍他凌亂的頭髮：「係八郎弟弟主動同我講架」


「嗯，因為...我直覺覺得，你地應該信得過架」

八郎摸摸面頰，道：「甲賀奇俠...點都比起捉我果班忍者好掛...」


「...紗理依唔似對過佢用幻術，似乎係真心幫我地...」

克哉開門見山，問：「咁依家你叫齊我同山內黎，就係要去拎寶藏？」



「無錯」

紗理依淺笑一下：「但我以免百鬼眾既人來襲，所以...我咪叫埋你地兩個囉」



「件所謂既寶藏到底係咩黎，好快我地就會有答案...紅龍」




「嗯，但目的地係邊度？」



紗理依佯笑一聲，向八郎叫道

「八郎弟弟，你答佢丫」


「吓...哦...」

八郎拎出一張已經發黃的紙張，攤：「其...其實，卷軸裏面既數字，係需要我地森川家既呢份...解碼系統先可以知道裏面既意思」



13,1
37,7
16,35
3,56
7,86
.
.
.
.



「呢堆數字...唔通全部都係對應返卷軸既數字？」美波開始察覺到端倪


「算係啦...」

八郎手執鉛筆，於卷軸上圈著多個數字與標點

「只要跟住我地森川家既解碼方法，就可以搵到」



35.677389, 139.728583

「呢個係...坐標？！」克哉不禁慨歎



「無錯，我地森川家響幕府年代早已經從西洋傳教士得悉坐標既概念，並將緯度應用響建築同密碼學上」

此時八郎散發出的氣勢，和平日的宅男有天淵之別



「呢個位置....我查到啦」

美波將手機放到卷軸之上：「係...赤坂御苑？」


「赤坂御苑...到底，點解寶藏會響果度？」克哉感到疑惑





「一切...去到就會知道，紅龍」


「係，小姐」

紗理依一聲令下，紅龍抱起絲毫不董忍術的八郎



「時不宜遲，我地行啦五十嵐」