甲賀奇俠: 42.約會2
「櫻子，唔好走！」
「...嗯？」
「我...今次...唔會再比你走架啦」
電影放映後，克哉和由紀都非常投入，雙目只瞪住銀幕
直到
「乞...乞痴！」
由紀突然的噴嚏，將兩人投入電影的氣氛破壞掉
「唔，唔好意思...」
由紀只好慌忙道歉，裝作無事繼續觀賞電影
「嗱，老師你到時咁著啦」
美波將衣著配搭掛起：「咁著，比起你平時返學好好多啦！」
「但山內，點解要著呢款冷衫呀？」
「嘿嘿，呢件冷衫就係比你加分用既！」
「加分？」
「冇錯！戲院多數都會開好大冷氣，如果結城老師響睇戲過程中覺得凍，你就可乘機借件冷衫比佢啦！」美波沾沾自喜講出自己的計劃
「但，如果佢唔鐘意我呢個舉動呢...？」
「結城老師唔係對你有好感既話仲點會同你出街呀？信我啦，呢條橋實掂既！」
「索...索...」
由紀的鼻水聲漸漸頻繁
克哉戰戰兢兢，脫下自己身上的毛衣
「到底...比唔比好呢...」
「索索...乞痴！索...」
克哉吞了一口水，用正在震抖的雙手拎住毛衣
「為左唔好比結城老師凍親...死就死啦！」
依靠一刻的衝動，克哉終於將毛衣蓋到由紀身上
「唔好望唔好望！」
克哉馬上轉頭，不敢再望由紀一眼
「...咦...？」
一秒過後，由紀才反應過來
克哉的毛衣竟來到自己身上
「五...五十嵐老師...」
由紀大感嗟異
但克哉此刻已口騰腳震，差點連小便也湧出
「結...結城老師你...唔唔唔...介意既話...就就...」
「...唔該...」
由紀雖然只說了一句，但已經甜在心頭
「好暖...」
「頭先...唔該哂你呀五十嵐老師...」
「唔...唔駛...咁我...都驚結城老師你凍親」
電影放映完畢後，兩人一步一步離開電影院
由紀繼續掛開話題匣子
「頭先套戲...五十嵐老師你覺得點呀？」
「唔...我覺得男主角...都算係個好長情既人，明明男女主角都對對方有好感，但偏偏因為佢仲掛住前度，差啲就放棄左呢一段感情」
「五十嵐老師你...都係長情既人黎架？」
「唔算既...起碼要我執屋既話我都可以斷捨離既...」克哉摸住下巴，答
「咁...！五十嵐老師你拍拖都係咁架！？」
由紀察覺自己問得過於唐突，馬上道歉：「呃...唔...唔好意思呀...我問得太突然...」
「呃...呃唔係既，因為...我冇拍過拖...」
克哉尷尬笑道：「可能係我太悶同太老土，平時又冇乜興趣...」
「都唔係丫...」
由紀淺淺一笑：「響我眼中，五十嵐老師你反而好穩重，有你響我身邊會好放心架...」
「吓...」
此刻，克哉和由紀互相對望，時間猶如停頓一樣
「弊啦...好似又太進取啦...」
「係...係呢？既然都呢個時間...不如...我地食埋晚飯丫」
由紀馬上轉換話題，兩人尷尬的氣氛才被打破
「...嗯...好呀...近有一間西餐廳我食過都唔錯...」
「嗯好呀，我諗...五十嵐老師你既口味都正常既，哈哈」
克哉帶住由紀到自己所指的餐廳
「嘩...好靚呀...」
古色古香的餐廳環境使由紀四周張望
「唔好意思呀，五十嵐老師...明明係我主動約你，但我咩都冇準備，淨係掛住諗著咩衫...」
「諗著咩衫？即係...佢特登打扮過先出黎？！」
「呃...咁...咁我地叫野食先囉」
「好哇」
「五十嵐老師，一直以黎多謝你呀，幫我解決左咁多問題...」
由紀笑道：「所以，今日既洗費唔好同我爭啦，嘻」
「既然由紀老師話過想多謝克哉老師你，咁你就應該大方接受」
克哉跟住美波的提示，道：
「...咁...就多謝你先啦結城老師...」
「五十嵐老師...仲係唔叫我做由紀」
由紀每次聽到到克哉稱呼為「結城老師」時，心裏都會酸了一道
「我唔客氣啦...」
不久後，食物都已遞上至兩人面前
「嗯！好好味呀，五十嵐老師你果然冇介紹錯呀！」
由紀像小孩般一啖一啖將眼前的意大利菜式放進口裏
「鐘意就好啦...呼，好彩野食都啱結城老師胃口」
克哉放下心頭大石
「哈...其實我食咩都可以架，畢竟我...都好耐冇去過呢類地方食飯...」
由紀苦笑道：「平時放左學都係去超市睇下有咩餸可以買，或者有冇特價既便當，一係...直接食個杯麵就當係晚飯」
「咁...五十嵐老師你呢？」
「我平時呀...都係自己煮架咋」
克哉笑道：「出去食太貴啦，所以大部份時間都係自己搞掂哂...」
「嘻嘻，咁五十嵐老師你同我都係同一類人喎」
由紀拎出手機：「係呢，五十嵐老師你記唔記得我果次咪整過朱古力請你食既...」
「嗯！我記得呀...」
「我最近呢...研究緊點整芝士蛋糕呀，如果我整好既話...可唔可以再揾五十嵐老師你試味呀...？」
「啊...可...可以呀...」
「真係架？太好啦」
由紀聽到後笑逐顔開：「不過，好似搞到五十嵐老師你變左白老鼠咁添，唔好意思呀...」
「又...又唔會既，我自己都鐘意食甜野既...」
兩人漸漸習慣和對方對話，氣氛也越來越輕鬆
飯後，兩人沿住車站慢步回家
「今...今日多謝你啦，結城老師...」
就今日的約會，克哉向由紀道謝
「五十嵐老師你幫左我咁多，我先係講多謝果個...」
由紀甜笑著，似乎也滿意今日的約會
「噗通噗通...」
克哉心跳加速，甚至流出冷汗
「如果由紀老師個樣好似好滿意咁，而佢又同你一齊行返屋企既話，咁果段路就係好機會啦！」
「好機會？」
克哉想起美波最後的提示
「咁緊係表白啦，由紀老師咁樣好明顯對你都有意思啦，咁仲等幾時呀！」
「真係要表白？！會唔會太急呀...」
克哉偷望身旁的由紀：「如果衰左，分分鐘朋友都再做唔到喎」
時間一分一秒過去，兩人都未有任何對答
「我到啦，今日真係多謝你呀五十嵐老師」
到達住所樓下，由紀再次對克哉道謝：「今日...過得好開心呀」
「呃...唔駛...」
「多謝你送我返黎呀，咁...我返上去先啦...拜拜」
「...拜拜...」
由紀欲言又止般，慢慢踏上樓梯
「結城老...」
克哉鼓起不知從何來的勇氣，大叫：「由...由紀！」
「...呃...?」
由紀聽到克哉親口叫出自己名字，既驚又奇，馬上回頭
「聽...聽...聽日見啦」
一句簡單的說話竟使克哉心驚膽跳
「...嗯，聽日見啦」
由紀終於從鬱悶中露出笑顔：「...克哉...」
「咔！」
由紀一返到家中，也馬上心力交粹盤躺到睡床上
「佢...終於肯叫我由紀啦...」