港女穿越記: 12

依照亞傑的計劃，係每次市集就收購花草，製作產品，在五日後的市集出售，只要每次淨利有三百文，就足夠維持基本生活。但萬事起頭難，佢冇諗過真係咁難！第一次擺攤完全無收入，第二次先賣出兩個香囊。於是佢帶住一堆可以鬆弛神經的茶包去萬花樓，向季大娘推薦。

推銷過程出奇地順利，因為最近杜月兒忙於修整光明寨，冇新意見提供，加上之前有批「姑娘」去咗南邊，近日的生意開始下降。雖然茶包唔算新意，利潤又低（去妓院通常飲酒），但如果真係可以放鬆身心，點都會吸引到客人繼續嚟。

然後亞傑又提早想去搵杜月兒，季大娘爽快咁講咗地址，但補充道：「如果唔係急事，你可以市集時坐牛車去山腳，來回都係兩文。」季大娘上下打量亞傑：「你平日應該都好少去城外，我怕你迷路又冇照應呀。或者你可以去月兒姑娘常去的布店、糧店留言，等佢去搵你。」

「多謝季大娘，咁我下個市集坐牛車過去啦。」

其實亞傑想睇下杜月兒有咩生財之道，話哂大家都係無啦啦嚟到古代，完全無農業知識。但佢又有驢車，又可以隨手比二十兩呢個陌生人。



市集當日，亞傑照樣去市集買花草同擺攤，今日生意好d喇，開檔半個時辰（一小時）就賣出咗5件貨，但之後半個時辰都冇生意。於是亞傑收攤後，拎咗幾個香囊同茶包，就坐住牛車去光明寨，牛車離開城門，大約5分鐘就到山腳，車夫指咗條路叫亞傑自己行。

亞傑行咗大約半個鐘先到光明寨，隔住圍欄向守門的老人說明來意之後，就企喺外面等，好快就見到杜月兒同一個少年一齊嚟到，杜月兒認出佢之後，就叫少年開門。然後佢哋一齊去到其中一間屋。
 
杜月兒叫少年先離開，自己去旁邊斟水同埋拎咗D糕點比亞傑。
 
「你要唔要茶? 」見亞傑搖頭，佢就繼續食糕點，冇主動問亞傑的來意。
 
亞傑拎出香囊同茶包，遞比杜月兒：「呢D係我而家擺攤賣的貨品，係我以前上網學的，好彩而家用得著，不過唔係幾賣得，全靠季大娘幫我買咗D…總算有固定收入，之前借你的二十兩，我暫時都還唔到。」
 


杜月兒拎起茶包同香囊，仔細望咗一陣，「你呢D貨色品質唔錯，但係擺攤好難賣出。」之後就詳細解釋而家商隊會定期帶人去南邊，連可能會有戰事都提及到：「如果你想喺呢個時空賺大錢，去南邊可能機會多D，不過我適應咗呢度，寧願冒險留低。我哋幾個月前種咗好多番薯同粟米，呢D易儲存又易種，如果你有興趣，不如我哋合作啦。」
 
「合作D咩?」
 
「根據一般穿越小說的設定，穿越者都係廚藝、農業、化學或者醫療的高手，嚟到古代輕輕鬆鬆就改變社會，但好明顯我哋都唔係。」杜月兒見亞傑點頭，接著道：「但我哋有現代的思想，而且我哋識字。」
 
杜月兒拎出一本書，遞比亞傑，亞傑見到係關於農業的書籍，雖然係繁體字，但因為用詞同現代有出入，雖然未係文言文咁深奧，但都要花時間先睇得明。
 
「我諗我一日都未必睇到兩頁呀。」亞傑說。
 


「所以我就提出合作喇，我哋識字，可以睇書去學習，例如書入面提到的耕種知識，我同寨入面的人，北是村種田多年的人講起，佢哋全部都未聽過，而經過我哋過去一年的實驗，書入面的種植方法係會大大提升產量。
 
「我而家就係靠住睇書去教導佢哋改善生活，但我一個人睇書實在太慢了，如果你可以幫忙就好喇。」
 
「只係幫手睇書? 咁係點樣合作?」
 
「除咗睇書之外，其實我仲想你帶寨入面的三個少年去擺攤，主要係賣番薯乾 / 果乾，佢哋係呢幾個月先開始學計數同埋接觸外人，我怕佢哋去市集會比人蝦或者學壞。寨入面另外有兩個男人，一個年紀大，一個有腳傷，都係唔適合外出的。」
 
兩人經過連串的溝通後，商定了亞傑每日去山寨食早餐，餐後用半個時辰(1小時)教寨中各人認字、計數。跟住就會同月兒一齊睇書兩小時，然後喺山寨食午餐，跟住就一齊研究下點樣準備戰爭或災難時的物資、安排。到下晝3點左右就返屋企整佢的花草製品。
 
到趕集日時，兩個少年 (三人輪流去)會一早帶住番薯乾/ 果乾，同亞傑一齊擺攤售賣。同亞傑嚟講，每日有去山寨就好似返工咁樣，仲包埋早午餐，仲可以喺山上執樹枝 (柴薪)返屋企燒柴。肯定唔會凍死，而且杜月兒仲將兩個月前買的驢仔借比佢代步。其實杜月兒提出可以在山寨旁幫佢起間屋，但亞傑想有D自由時間同空間，婉拒了。
 
歲月匆匆過了兩個月，三個少年成長得很快，佢哋幫自己取名為王木、王林、王森，並結拜為兄弟。經過呢兩個月的擺攤，讀書識字同埋亞傑的教導，三個自卑的少年慢慢建立自信，而家通常會一個人同亞傑擺攤，另一人會將山寨眾人收集到的野味、藥材，山珍拎去酒家或藥店賣，再跟據月兒定的規矩：三成係佢哋的佣金，一成係寨中的收入，六成就係貨主。.