港女穿越記: 11

甦醒的亞傑發現自己身處郊外，但唔係「死亡」前的冷巷，一陣記憶湧入腦中，就好似當初「穿越」成為小安子咁樣，佢知道自己再次穿越，亦知道死亡前發生的一切，但今次冇身份的資料，就好似平空出現喺呢個時空。
 
靈機一閃的他摸向自己下身…喺度呀!! 條J返咗嚟!! 佢四下張望，發現空無一人，於是低頭，拉開褲…果然喺度呢…仲係自己在現代時候的SIZE，佢再望望自己的左手踭，見到細個時受傷留低的疤痕，即係呢個身體係佢的...佢決定將自己當成剛剛由現代穿越到而家，之前的太監生活太慘了，就當係發夢吧。
 
亞傑站起，發現前方有個樹林，就決定去樹林外圍，爬上樹睇清楚環境，即使冇發現，至少天黑時比身處礦野好。幸運的亞傑未行到樹林，就見到有個少女騎住驢車經過，少女望向佢，露出疑惑的眼神，亞傑望到呢個少女，有種奇怪的熟悉感。
 
少女正係杜月兒，佢見到呢個年輕男人，熟悉感就好似去到外地旅行，喺路上遇到香港人的感覺，雖然冇講嘢，但感覺係來自同一地方。既然佢呢個港女都可以穿越，有個港男穿越嚟，都唔出奇喎。但點樣去求證呢?不如好似D穿越小說的老土橋段：朗誦歌詞。有咩歌係多個年代的人香港人都識呢? 始終佢未必係現代人，可能係大佢幾十年的人。
 
「滄海一聲笑，滔滔兩岸潮。」最後杜月兒讀出呢兩句歌詞，應該係大家都認識的。
 


聽到呢兩句歌詞，亞傑知道對方都係現代人，佢只要接住唱落去，基本上就可以相認了。雖然唔知對方係咩人，但見佢一個少女都咁悠閒，仲有架車代步，作為佢「鄉里」，跟住佢至少唔駛餐風露宿。正想接住唱落去，卻發現自己唔記得歌詞....於是改唱另一首。
 
「浪奔~浪流~萬里滔滔~江水永不休。」亞傑唔係朗讀歌詞，而家直接唱出嚟。
 
「2019年，香港。」杜月兒微笑著說。
 
「2019年，屯門。」亞傑亦露出笑容。
 
杜月兒聽到後，跑向亞傑，緊緊抱住佢，然後失聲痛哭，亞傑完全唔知道可以有咩反應，回神後輕拍佢背…大約兩分鐘後，杜月兒推開亞傑，尷尬地笑，亞傑終於明白點解笑中帶淚的女人可以殺死人。杜月兒拎出手巾抹乾眼淚，開始同亞傑傾大家穿越的經過。佢知道帶亞傑返去「光明寨」中係最好的選擇，但佢完全唔了解亞傑的為人，唔敢冒風險影響寨中逐漸安穩的生活。
 


細想過後，杜月兒將亞傑帶去萬花樓，請季大娘搭路幫亞傑去衙門整返個戶籍 (古代的身份證)，安排佢入藉「北是村」，除咗比錢季大娘打點之外，仲比咗亞傑二十兩，佢可以買塊小小的地自己種或者收租，又或者做D小生意，只要慳慳地，未來半年都餓唔死，之後的日子就要睇佢自己喇。
 
由於杜月兒介紹亞傑時，話佢同自己由相同的城鎮而來，不過大家唔認識，知道佢唔見哂戶籍同錢，於是幫下佢。對季大娘呢個古人嚟講，遇到鄉里一定要好好招待，所以比間獨立的下人房佢暫住，直至佢搵到屋先搬走。
 
簡單梳洗後的亞傑，食過由膳房提供的饅頭同咸菜之後，躺在床上，打算思考日後的方向。但寧靜而安心的環境，令一直精神緊張的亞傑慢慢放鬆，沉入夢鄉。
 
在辦理戶籍期間，亞傑每朝都會幫萬花樓打掃後院，同埋去井邊打水，每次打水佢都會諗起「上世」做太監去打水，比人欺凌的事件。如果當日佢繼續忍耐，而唔係佈局幫李貴人爭寵上位，佢而家係咪依舊比人恰，定係一早被打死呢？
 
但世事無咁多如果，既然而家有機會重生，就唔好諗咁多，先安排好目前的生活。思來想去，佢都係想安安穩穩，衣食無憂，娶妻生子，呃⋯⋯喺古代生仔的風險好高，或者好似杜月兒的光明寨，收留老弱無依的人啦。但現在的佢，正正係被收留的人。
 


經過連日來的打聽，逛街。亞傑決定繼續製作佢的花草產品，因為佢見到五日一次的市集，有好多來自附近村莊的人賣農產品，佢搵到兩個賣各類花草的人，只係幾十文就可以買到幾籃花，亞傑仲叫佢哋搵多D唔同種類的花，下次市集會再買。
 
今次亞傑的目標客戶係中產階級，主要都係提供茶包，香囊之類。由於佢係自己一個人住，唔敢住得太偏僻，於是在萬花樓附近租咗間小屋，呢間小屋以前係租比剛由妓院贖身出嚟的妓女暫時落腳，只有兩房一廳加廚房廁所，甚至連一般家庭必備的倉庫都欠缺。但作為住慣細單位的亞傑，覺得呢度一年只係5兩租金，實在太超值了，雖然街尾就係幾間妓院的聚集處，但同時代表住夜晚都多人出入，而且有咩事都可以去萬花樓，至少有個照應。如果住喺城外，發生事都唔知點算。