[靈異] [愛情] [我同條女敦倫外傳]我屋企養左隻女鬼...: 跟蹤

睇黎今晚會去食‘大茶飯’幹一番大事，因為我都覺得佢會再同條渣男見面，畢竟琴晚佢係係唔情願情況下俾阿盈上身得罪左佢條仔，佢清醒返一定會再搵佢講返清楚。

雖然樂兒依家就好似我對佢咁、有個影子係度，但條仔係更衰，佢已經唔再當佢係女朋友，而係當佢係雞當佢係提款機咋…

同埋樂兒佢內心根本冇咁衰，一切都係因為佢條仔先會變成咁，我相信呢個就係佢嘅苦衷，

佢唔同我講或者就係唔想我見到佢卑微嘅一面，更加唔想我介入佢地嘅感情事，因為佢知我如果知道左嘅話一定會好激動，就好似依家咁…
.
.
.




好快到左夜晚，我再次同唐生請一日假，然後阿盈俾左樂兒返工嘅地址俾我，我大概知係邊個位，之後我倆就一直係門口伏住佢，阿盈係走廊伏住睇佢幾時出，我就係屋企等待，

雖然佢7點幾先會去返工，但我地由4點幾就開始伏，因為唔知佢會唔會提早出門同條仔見面先，

最後佢同平時一樣7點幾先出，而佢亦都同平時一樣著住件T-shirt、超短熱褲、白色波鞋、孭住鐵鏈斜孭袋就出左門，徹徹底底一個mk look。

「阿洋佢出門啦，你快啲出去跟住佢。」

收到指示後我就開始出去偷偷跟住佢後面。





「阿洋，萬事小心。」

「嗯，知道。」

好快我就跟左佢落樓下，佢如常係小巴站等小巴，好彩出旺角啲小巴班次密，我可以前後腳咁搭後面嗰部小巴跟住佢，咁樣佢就唔會發現我。

等左一陣有一部小巴到站佢上左車，而我等左幾分鐘亦都有車，行車期間可能等燈或者停左陣站，我部小巴好快追上左佢嗰部，

到站嘅時候，我地幾乎係同時間落車，真係話都冇咁好彩，然後我就開始係人來人往嘅旺角從後跟住佢，我要金精火眼咁望住佢唔好走失，但亦因為多人，佢唔會咁易發現我。





行左大約幾條街嘅距離，佢就轉進了一條細街，細街再行前少少有一間吧，然後佢入左去，佢的確係酒吧返工…間吧吧顏色主要以黑色為主，而隔離就正正有條後巷係直通對面街，

跟住落黎將會係一個既漫長又沉悶嘅時間，因為我要等到佢收工，起碼要等5-6個鐘，我要搵啲野自己打發下。

其實我可以等到佢差唔多放工嘅時間先去，但我要想全程暗中保護佢，那怕佢返工前會同條仔見一見面先，不過最後都冇見到，係好事黎。
.
.
.
時間一分一秒地過，我行左陣街、酒吧附近食左個dinner同附近公園坐住打左陣機，終於打發左4個鐘黎到12點，我行返去間吧嘅對面望住條後巷，佢應該仲有一段時間先會走。

又過左10分鐘，我見到後巷有個身影由酒吧後門行左出黎，係餘光照射下，我認得呢個身影就係樂兒，佢早左放工，

而後門嘅隔離唔知幾時開始亦多左個人影係度，佢食住煙，我估應該就係佢條仔，樂兒一出黎就係同佢會合似的，我行過對面馬路後終於清楚見到佢個樣，

佢染金毛釘耳窿塊臉肥肥地，身型就高高大大少少肥，目測180cm，著住件短袖恤衫、牛仔褲同一對波鞋，隻手有紋身，睇落幾惡，原來係mk仔黎。





啪！

正當樂兒行左出黎，條仔二話不說就先大力打左佢一巴，樂兒隨即流下眼淚，見到佢被打嗰刻我好心痛，好想衝出去揼柒條仔，但我要睇定啲先，我係後巷隔離偷聽住佢地講嘅一字一句。

終於知道點解之前放學佢塊臉會多左啲瘀傷，原來都係佢條仔搞成佢咁，佢條仆街…

「八婆，你仲有面叫我出黎咩，你琴晚打撚柒我喎，我地分手啦。」

「浩正唔好散，你聽我講，件事唔係咁…唔係咁架，我琴晚好似斷左片咁我都唔知自己做左啲乜所…所以先傷害左你，嗰個唔係我黎架，你信我，我到清醒嗰陣已經返左屋企。」

原來條仔叫浩正，佢邊忽正，mk仔黎咋嘛，樂兒你大膽啲唔好俾佢食住啦，佢渣男黎架咋。

「你收皮啦死八婆，邊撚個信你作嘅故仔，你知唔知你琴日打得我幾撚痛？」





「浩正你俾多次機會我，我…我唔敢架啦，我唔會再打你，你唔好同我散…我真係好愛你。」

「俾機會？你應該慶幸我仲未將你啲相放上網，呢個已經俾左機會你。」

「你唔想散都得，你連埋琴晚未俾嘅錢俾多兩千五蚊我就唔散住，如果你今晚俾唔到我嘅你上pornhub睇你自己啲片啦八婆。」

「但我今晚賺得一千蚊，連埋我本身銀包啲錢都係得千五蚊，我真係冇咁多，可唔可俾住你先…？」

「食屎啦你得千五蚊？你琴晚仲要打鳩我我唔收你三千你已經偷笑啦，你夠膽同我講得千五咁撚少？你傻撚左呀？」

「我真係得咁多咋，求下你拎住咁多先啦，我之後會搏命啲搵返多啲俾你，求下你唔好同我散、唔好放我啲裸照上網…」

啪！

然後條仔又大大力打左佢一巴。