《我的MK妹同桌》: 10
距離開戲仲有一段時間，我問呀詩：「咁依家點啊？去邊好啊？」
「去朗豪坊囉，雖然已經行到厭曬，但同你係第一次嚟行啊嘛，嘻嘻！」呀詩甜滋滋地笑了。
唔知點解，我會好自然地聯想起佢同呀彥嘅嘢，想必佢之前係同呀彥成日嚟啦，又難怪嘅。
「朗豪坊係邊度嚟？」我真心問。
呀詩呆咗咁望住我，不誇張，幾秒，一臉難以置信嘅模樣：「唔係啊？你係咪香港人嚟㗎？朗豪坊都無去過？」
「係啊。」我尷尬地回，好似啲大鄉里咁。
「啲大陸人落嚟都會去朗豪坊喎大佬！哈哈哈！」呀詩大癲大肺咁，唔知話佢失禮好定真性情好。
「咁我真係好少出港島啊嘛，旺角更加少嚟啦。」我強力反駁。
「講笑咋嘛，依家姐姐帶你去行街街啊。啊你平時真係得打機㗎咋？書你又唔會溫啦，又唔會出旺角，咁你仲有咩做啊？」呀詩佢係好奇啊？定真係串鳩我？
「屌你，我仲有打波囉好無？」
「WOW，原來我男朋友仲有打波㗎？」呀詩用力地攬住我，隻眼閃閃發光。
終於係呀詩口中確認咗喱個關係，之前係有些少若得若失咁，儘管已經又拖手又攬又錫咁，但親耳聽到係會更加有安全感。
「有啊！間唔時會落街場打下。」
「下次帶埋我去啊？」
「睇下點先啦，哈哈！」我哋已經行到朗豪坊超長型扶手電梯度。
係另一條扶手電梯度，姐係對面落嚟嗰條，迎面見唔少男男女女係度打茄輪，再唔係就攬下啊咁樣，咁條電梯流流長，好應該搵下啲嘢做嘅。
我都有樣學樣，轉身攬住呀詩，呀詩都無反抗，笑笑口地問：「做咩啊？學人哋咁做啊？」
「唔得咩？」我就係要有樣學樣！
我都即刻同呀詩打返個茄輪，但因為身高差嘅關係，我錫佢有啲辛苦，幾下就收咗皮。
呀詩喺我心口輕搥咗幾下，個臉紅咗小小，好鬼死可愛。
「做咩啊？！好辛苦啊？」呀詩看出我異樣。
「頭先彎低腰錫你好辛苦囉條腰。」我坦言。
「哎呀⋯⋯整親條腰咁慘啊？男人最緊要係條腰喎。」呀詩強調個「腰」字。
「我同你換位啦！」
「唔洗啦，喱度咁多人⋯⋯」我都唔係幾好意思換位。
「係囉！咁多人望住都唔怕打茄輪，怕換個位？」MK妹嘅最大特點，就係從來都唔理會別人嘅目光同埋意見，我行我素。
最後都係換咗位，搵啱個位就一路打茄輪到上頂。
上面係一個超大型shopping mall，係另一個天堂。
呀詩開始周圍行周圍睇，而我真係唔知點做好，咪學TVB啲電視劇咁陪女朋友行街囉，坐係間店入面啲位囉，然後呀詩就周圍去行去睇。
行到一間有賣手飾嘅鋪頭入面，呀詩睇啱一對手繩，我唔知間鋪叫咩名，亦無留意。而呀詩企係嗰個櫃前面一段時間，我行過去問：「睇啱啊？」
「你覺得點啊？一人一條做情侶手繩囉？」佢問道。
「好啊。」可以滿足呀詩嘅，我都會盡全力滿足。
「你睇啱邊條啊？」
呀詩指一指，係一條皮製嘅手繩，睇一睇個貴，撞鬼你囉成600蚊一條，兩條成1200蚊⋯⋯
以前1200係咩概念？係一部Nokia新手機嘅價，姐係等於買到部手機啦。
「但有啲貴囉。」呀詩扁扁嘴，依依不捨地道：「走囉。」
見佢咁捨得，我都肉赤，心都軟埋，當係好好紀念我哋今日第一日拍拖啦。
「一係我買俾你啦。」我認真地說。
「唔洗啦。」呀詩拉緊我行出鋪頭。
「你真係想要咪買囉。」
「去行下其他地方先啦，旺角大把喱啲鋪，話唔定其他鋪頭有平呢？」呀詩好識精打細算，一齊咗之後發覺佢有唔少優點。
我俾佢說服咗。
呀詩再行咗幾間之後就嗌攰嗌肚餓，然後落返去搵嘢食，又要經過嗰個長到要死嘅電梯。
一上電梯，經過先前嗰一次，我哋好有默契咁配合，而呀詩嘅接吻技巧真係唔話得，合埋眼，享受緊喱個如夢幻般唔真實嘅感覺。錫咗一輪，以後差唔多到啦，點知原來先到一半。
我哋搵咗間茶記，食完都差唔多夠鐘睇戲了。
入戲院之前，呀詩亦遵守佢嘅承諾，我體貼咁問我食咩餐好，決定好就去咗買，好鐘意喱種舒適感，偶有小緊張，小驚喜咁。
我真係覺得自己係全世界最幸福嘅男人。
暗暗亦決定如果一陣睇唔啱嘅話，就去買嗰條手繩俾佢啦！
喺中學，錢唔多，所有嘅付出都係我嘅所有，包括我嘅心。
——一樣最唔值錢，但最寶貴嘅嘢。
睇完戲後，呀詩好興奮咁分享頭先嘅劇情，仲話最後嗰一集想同我嚟講，我亦都話好。
呀詩睇完之後好亢奮，係咁話好鐘意哈利，我問佢：「乜你唔係鐘意哆啦A夢咩？」
佢反問返我：「咁你又係咪淨係鐘意一個AV女優啊？」
我無聲出⋯⋯波多嘢嘅淫，麻倉憂嘅清純， 上原亞衣嘅敬業，我都好欣賞。
然後呀詩繼續講，我又繼續聽。
我哋去行下旺角其他地方，呀詩好熟路咁左穿右插，而我根本唔知邊度打邊度，一個商場行完又下一個商場。
我開始攰，而呀詩仲好有精神，又睇衫又睇鞋又剩。
「點啊，有無心水啊？」我指手繩嗰方面。
「嗯⋯⋯無啊，都睇唔啱，唔買啦。」呀詩直言。
「咁買返嗰條囉好無？」我認真係想買，我會戴住佢戴好多年。
「唔洗啦，我唔想你曬錢。」我哋係個商場度徘徊著。
「真係？」疑心重嘅我，再確定多一次。
「係啊！你留返啲錢同我拍拖好過啦。」呀詩由拖我變為撓住我隻手，一副甜蜜嘅樣子，望住佢滿足嘅樣，我心靈好似俾佢填滿咗一樣，叫幸福感？
一返到學校，我哋一齊咗嘅消息好快傳遍學校，話邊個邊個同個MK妹一齊。
而點解會咁快咁多人知呢？
原因係呀詩喺Facebook嘅感情狀況轉為戀愛中，而且仲標埋我，邊個邊個In a relationship。
而佢個名亦都無轉到，我系牙詩，張Icon喺好有復古風味，黃黃地色嘅背景，一張嘟嘴嘅自拍，加些少曝光咁啦。
咁佢tag埋我，我其他fd都知，琴晚我Facebook好多留言，MSN都震唔少，今日上堂都幾多人偷偷地擰轉頭望下我哋咁樣。
「WOW！恭喜我哋班終於第一pair情侶！」呀Ken喺我同呀詩食完lunch返嚟大大聲咁講，而佢側邊有男有女，明顯地圍埋一齊吹緊水。
咁通常買飯返學校食嘅同學仔，都會食得比較快，食完就會返班房搵人吹下水嘅又有，一陣有小測就會見到成堆人係度溫，趕下一堂功課嘅又有。
我同呀詩係學校無咁明目張膽，唔會拖手，係行得埋啲咁解姐。
呀Ken一講完，我同呀詩都好尷尬，唔知講咩好，而隔離嘅人又幫手起哄。
我就返去自己位度，唔理佢哋。
而我班兄弟都好識做，講話：「得啦，聽日唔洗預你食飯啊嘛。」
喺琴晚嘅MSN入面，牛仔已經提早同我講。
「一陣放學去食冷麵？」呀詩約我。
「但我今日唔得啊⋯⋯」
「下？點解啊？」呀詩驚訝地道，放學會一齊去拍拖是常識吧？佢臉上嘅表情話俾我知。
「我哋幾個fd一早約咗今日去網吧打機啊⋯⋯」
「咁我又去！」呀詩好積極。
「今日真係唔得呢，成班仔，下次有機會一齊去網吧打機囉！」我安慰呀詩。
而呀詩好似因為咁樣成個下晝都唔係幾開心，冷冷淡淡咁。
而我⋯⋯其實唔係約咗班仆街打機，而係諗住去旺角買上次呀詩睇中嗰兩條手繩。
我唔知呀詩收到會係咩感覺，但我真係好想俾個驚喜佢，所以見到佢唔開心，悶悶不樂咁，我都係唔理佢。
一放學，我就諗住執好個書包走人，呀詩都收得好快，快步跟埋上嚟。
「⋯」
我再行快啲落樓梯，佢亦都跟住行得好快，緊貼喺我身後，我行佢又跟住行，我停佢又跟住停。
大佬⋯⋯個樓梯好多人㗎，而且又遇上某幾個老師，佢哋都用奇怪嘅眼光望住我，搞到我鬼死咁尷尬，唔知係咪身有屎，梗係覺得啲老師嘅眼神會睇穿我哋拍緊拖咁。
出到學校門口，我就忍唔住問呀詩：「做咩跟住嚟姐？」
「邊有啊？」啊⋯屌你，小學雞到咁？玩喱招？
「我去邊係我自由嚟㗎嘛！」呀詩理直氣壯地說，咁的確喺嘅，佢係有理由理直氣壯㗎喎，佢又係我女朋友。
我無理到佢，由佢跟住我行囉，我行到去巴士站前，眼前有架過海嘅巴士，唔理三七二十一上咗去先。
「嘟」一聲，從我後面傳過嚟，我回頭一看，果真呀詩都上埋嚟，仲要催我，示意我行快啲。
我哋坐咗上層，佢都跟住坐埋嚟，一副成功人士嘅得戚樣，但不發一言，自顧自地拎出部MP3出嚟聽歌。
我見佢聽得咁滋味，我都唔打擾佢啦，我無MP3咩依家！？
當我拎咗個MP3出嚟嘅時候，呀詩一嘢㩒住我隻耳機繩，然後霸氣地除咗佢另一邊耳仔嘅耳機，戴落距離我最近嘅耳仔度。
一把熟悉嘅聲音傳入我耳中，一把聽唔清佢講乜嘢嘅台灣人。
好熟悉嘅旋律⋯⋯
怎麼了 妳累了 說好的 幸福呢
我懂了 不說了 愛淡了 夢遠了
開心與不開心一一細數著 妳再不捨
那些愛過的感覺都太深刻 我都還記得
呀詩哼著那動人嘅旋律，幸福盡在不語中。
喱首係我第一首聽周杰倫嘅歌，我之前都間唔中喺其他地方聽過周杰倫嘅歌，但我好唔鍾意條粉皮。
因為我覺得佢勁扮曬嘢，又成日 chock曬樣咁，尤其是佢嗰套功夫灌籃，唔知乜撚嘢嚟。
本來係幾抗拒嘅，但喺呀詩嘅淫威底下，都係屈服了。
而我唔鍾意周杰倫嘅歌係覺得條友好MK！咁呀詩會聽佢啲歌，不意外。
加上市面上咁多好歌，淨係廣東歌都好多你揀啦，陳奕迅、容祖兒、万刀甲，做乜嘢要聽佢啲歌姐？
但聽聽下，又覺得真係幾好聽，我一邊望住窗外嘅景色，一邊專心聽緊周杰倫嘅歌。
時間過了 走了 愛情面臨選擇
妳冷了 倦了 我哭了
離開時的不快樂 你用卡片手寫著
有些愛只給到這 真的痛了
日後，我漸漸被呀詩影響，聽多咗周杰倫，因為我慢慢發覺，佢嘅歌寫得出鍾意一個人最細微嘅心聲。
以前聽，係覺得周杰倫唱出我嘅心聲。
依家聽，係聽緊我啲回憶。
我聽咗成程周杰倫，一首接一首，後來首首都成經典。
就到旺角，我就俾返個耳機呀詩，然後想落車，呀詩坐係出面擋住曬，亦無想讓路嘅意圖。
「落車啦。」我同佢講。
「又話去網吧？！其他人呢？」佢終於出聲。
「依家咪去囉，行啦！」我呃佢。
呀詩聽後，半信半疑地落車。
「又話自己想去邊就去邊？做咩跟住我啊？」我篤穿佢嘅虛假。
「咩姐？我邊有！」呀詩仲係度死雞撐飯蓋。
「我⋯⋯我嚟睇你係⋯⋯係咪去網吧咋嘛！」見到佢死頂嘅樣又幾好笑。
「旺角網吧你無嚟過呢？」我都唔知旺角邊度有網吧老實講。
「超！我成日去啦，喱度我地頭嚟㗎！」我信㗎⋯⋯
呀詩一步步跟住我，我亦都無打算瞞佢，徑自嚟到朗豪坊，快步行上超長扶手電梯。
呀詩一臉疑惑地望住我，天真地問道：「乜喱度有網吧？」
「係啊，今日新開即刻嚟試啦。」我認真地講大話。
「係真唔係啊？」呀詩皺曬眉頭咁。
「我會唔知？？？仲話地膽喎⋯⋯」我知我成功了，成功令呀詩信，嗯⋯⋯咁樣都算係俾到驚喜佢嘅，雖然同我一開始嘅計劃唔太一樣。
我哋嚟到琴日行嘅鋪頭前面，呀詩先恍然大悟。
「喂⋯⋯」佢嗌住我。
我去到個櫃前面，叫看似老闆嘅人過嚟，話想試下喱兩條。
老闆都好通氣，好好笑容咁介紹條繩，又話買俾女朋友仔啊？
我叫埋呀詩過嚟試戴下，係幾襯呀詩嘅，幾有質感。
係過程當中，呀詩怒瞪住我，扁扁嘴咁，個樣呆呆地，嬲嬲爆，又甜蜜蜜咁。
最後買咗一人一條，同色系，買咗佢鍾意嘅黑色。
「你啊！敢呃我！」佢搣我手臂。
「喂喂喂⋯⋯痛啊⋯⋯」我嗌曬救命，然後佢繼續將行動升級，將搣轉為扭。