《我的MK妹同桌》: 9
大家食得七七八八就搵嘢做，唔知邊條粉皮提議話玩沙灘波。
咁石澳個場離沙灘好近，咁好多時我哋BBQ完咗都會去沙灘玩，但沙灘波我都好似係第一次玩。
呀詩仲玩得過我，好興奮咁和議。
我同幾個男仔負責去買波，買完波返嚟發覺呀詩同子晴有講有笑咁，無啦啦就fd咗，無人會答到你點解㗎。
我哋決定咗玩數字球，規矩就自己google，我都唔解釋了，總之輸咗嗰個就要俾人拋落海。
男仔輸又幾閒啊？個個都背心短褲踢拖㗎啦，凍凍地咪著件嬲嚟囉，目標係要令女仔輸咋嘛。
而經歷老到嘅呀詩可以撐到後面，只不過佢係失策嘅，最後都輸L咗，罰就難免㗎啦，而呀Ken係第一個上前捉住呀詩，跟住就一個個上去，輪住⋯⋯
捉佢。
用男人嘅心態話你知，有時男仔會對一個女仔衰，係想個女仔鐘意上你，但喱個衰唔同仆街，只不過係想做傳聞中嘅男人唔壞女人唔愛咁。
而呀Ken正正貫徹喱種主義，但我偏偏有點睇唔過眼。
最後呀詩都係俾人拋咗落海，我係第一時間衝過去拉返佢起身嗰個嚟，一旁嘅人好大聲咁喝采。
「WOW！」
「好型啊！」
「好Man啊！」
我根本對喱啲無感覺，喝采又好，稱讚又好啦，都唔重要。因為我見到呀詩成身濕曬，顫抖咁抱住自己行返上嚟。
問心，係幾肉赤嘅。
我拉住呀詩返去爐嗰邊，佢哋繼續係度玩。
呀詩喺玩之前有同我講⋯⋯
「點算啊？我無帶衫嚟喎，我仲著埋絲襪添。」
「你頭先唔除？」我問反佢轉頭。
「都無時間俾我除啦，唔通你要我係班仔面前除，俾佢哋J啊？」
「咁⋯⋯」又幾撚有道理喎。
「咁你盡量唔好輸囉，如果唔係一陣凍死你啊。」閒聊幾句就開波，見住一個個落水嘅人都猛話嗌凍，就希望呀詩唔好輸。
好彩仲有些少火，可以暖一暖。
「你快啲除撚咗你個絲襪先啦。」見佢濕曬咁，頭髮未濕得曬，濕啲唔濕啲，加埋啲海水咸咸地咁，真係好咸濕姐！
「又要除鞋，煩死人啦。」
「你著住我對拖鞋先啦。」我除咗自己對拖鞋俾佢，然後呀詩就開始除鞋，然後就咁除絲襪。
唔知係咪睇得咸片多，我以為會好似AV入面啲絲襪咁連住的，以為佢要去廁所除方便啲啦，點知佢就咁係大髀，伸手入熱褲嗰度除。我嚇一大跳，即刻背住佢。
「哈哈哈！」呀詩大笑，「做咩啊？怕醜仔啊？」
「你咪理啦。」
「真係唔睇？」佢挑逗地說，真係沒幾個男仔可以忍得住。
呀Ken就一定會話：「睇咪睇！驚你啊？」
我唔想好似佢咁⋯⋯
「易唷！」呀詩唔知係邊學埋啲咁嘅日文，無錯佢係用日文講，姐係「可以唷」嘅意思，會經常性出現在日本的流行性文化入面。
「屌你！快啦！」真係俾佢講扯扯地，仲要著緊沙灘褲，好明顯㗎嘛大佬⋯⋯
我最後都係無望到，我堅持自己嘅紳士守則！
之後我諗住陪呀詩去附近嘅士多度買拖鞋，然後我諗住起身行過去啦，呀詩好奇怪咁問我⋯⋯
「你諗住點去買啊？」
「咪就咁行過去囉。」我赤腳咁踢下隻腳，唔著拖鞋有幾閒？
「下？好污糟喎！」
「驚乜姐，買完返嚟用水沖沖佢就搞掂啦。」男人老狗真係無咁姿整。
「下？好污糟啊，唔好啦。」我成頭問號。
「咁唔係你想點啊？！」
「揹我。」呀詩扁扁嘴，伸曬兩隻手出嚟，要抱抱。
我心當堂軟曬落嚟，體驗一次咩叫「冧」。原來男仔都可以受冧，應該就係女仔嗲你、撒嬌嘅時候啦。
我仲要扮到好唔情願咁，扭扭擰擰話唔好啦，無非都係想呀詩再講多次，而我又可以再聽多次。
最後係我換返對拖鞋，然後蹲低揹起赤腳嘅呀詩。
啊⋯⋯估唔到佢人仔細細，咁鬼重嘅？
然後佢成個人壓落嚟，好辛苦啊⋯⋯啊小建強⋯⋯
佢嗰兩服勢力十分之龐大，可以全面地感受到嗰兩服壓力，軟綿綿咁。
我揹得佢咁辛苦，後面條友仲要周圍郁不突止，仲要嫌三嫌四嫌我慢。
而頭先呀詩除咗對絲襪落嚟之後，隻腳幾正，幼得嚟又白滑，我忍不住再睇多幾眼。
而依家我揹緊佢，摸緊佢白滑嘅雙腳，就難免色心起。
一個血色方剛嘅青少年，會對你起啖，係鐘意你嘅證明；如果無，咁就真係唔鐘意。
咁有陣時條女唔係話差，甚至有啲人話靚又正咁款，但無反應就點都係無反應㗎啦。男人就好坦白嘅，扯唔扯得起旗說明了一切；而女人可能又要物質啦，又要感覺啦，又要安全感之類，你做得一樣又唔知要做邊一樣，實在讓人難以捉摸。
我同佢去咗間士多求其買咗對拖鞋就返去沙灘搵佢哋，而佢哋唔知係邊度搵嚟一艘沙灘艇，玩得興高采烈，壓根兒無見到我哋兩個。
於是我哋兩個人就沿住個沙灘漫無目的咁行，姐係鳩行。
我哋好似置身係啲電視劇咁，好浪漫咁行係個沙灘上面，我第一時間就係諗起喱啲電視劇橋段，咩用海水潑下條女。
「屌你咩！啱啱先乾返少少咋，又整濕我。」呀詩嘅漫罵聲伴隨著海浪打過嚟。
證明咗啲咩？各位連登仔知啦？
我即刻攞水潑返自己。
「噗！」呀詩笑咗出嚟，「你真係好戇鳩。」
「本來我今日出嚟好唔開心㗎，今日嚟到之後成個人開心返曬。」呀詩一邊行一邊低著頭。
想講又唔知點講咁款，欲言而止。
「其實我琴晚見到呀彥⋯⋯」
「佢同第二條女一齊，喺我出嚟倒垃圾嘅時候，係條女出嚟先再到呀彥，好似諗住送佢返去咁。」
係喱個時候，最好就等呀詩講完先。
呀詩續道：「以前嘅我可能會衝過去同佢對質，但諗多一層，我過去，咪姐係罵佢賤人、仆街，當堂好似輸咗咁。」
「並唔係輸咗佢，無咗條仔，而係輸咗個氣勢，好似係佢飛咗我。」
「佢哋都好明顯見到我，但我扮見唔到佢哋，直行直過。不過條八婆就嬲打嘅，話：『你條前菜喎！』，係我行過佢哋嘅時候，當其時得我哋三個，唔係講緊我姐係講緊鬼啊？」
「喱啲時候無得縮㗎，啖氣忍唔撚到，當堂著撚曬，我爆鳩佢seed。」睇出佢堅嬲，啲粗口爆曬出嚟咁。
平時講粗口當係調味料咁，幫啲句子調下味咋嘛，但當做主菜就好難食。
不過算啦，由佢，佢依家啲火可以用嚟煮飯添。
「我話你遲下都係咁㗎咋！八婆！」
跟住呀詩望一望我，今次我讀唔透佢嘅眼神，我唔知佢想點，想講啲咩。
「然後，佢話：『好似你咁囉，搵第條仔打鳩我哋啊嘛！』」
「屌，仆街⋯⋯」我又忍唔住用調味料了。
「你話啊！？你做乜嘢要打佢哋啊？」呀詩突如其來地扭我耳仔，每次佢出手都唔輕，但我知⋯⋯佢嘴角邊嘅笑容係咩含意。
頭先呀詩講「搵第條仔打鳩我哋啊嘛」嗰陣，佢斜斜地望住我，表情同眼神都帶點妖邪之氣，好明顯係暗示緊我啦喱條八婆。
「咁我見佢哋唔順眼啊嘛！嗱，我講明啊，我淨係打咗呀彥一嘢咋，我無打過條女㗎，我唔打女人㗎。」我要聲明一下。
「一嘢咋⋯⋯」呀詩不滿地道，「咁廢㗎。」
「點姐，我肯打佢一嘢已經好勇猛啦。」
「下次打多幾下啊嘛！我又唔會怪你嘅。」呀詩仲對我單單眼。
呀詩好似見攰，係一個無乜人嘅位坐低咗落嚟。
「一陣整親我咁點啊？你估打人唔痛㗎？」我開始懷疑，喱啲係咪姐係曖昧？
曖昧姐係似有若無，似係情侶咁，但又唔係情侶，大家彼此猜測對方心意，我諗⋯⋯
「知啦。」呀詩溫柔地笑了笑，「但我琴晚都係返咗去大喊一場。」
呀詩雙手環抱住自己，瑟縮起來。依家天色開始慢慢暗起嚟，我擔心佢哋想走人，但呀詩似乎仲未有想走嘅念頭。
我默不作聲，係喱個咁安靜嘅環境等佢放鬆下先啦，我無對佢做啲咩，我同佢之間就好似有份不言而喻嘅信任感，大家都清楚之後會點咁樣。
「當下係覺得憤怒，覺得無咗喱個男仔咪算囉，但返到去自己冷靜落嚟，我以為自己會無乜嘢，唔會有咩感覺，點不止原來都會痛⋯⋯個心好似俾人吉咗嘢咁。」
「原來感覺喱樣嘢真係控制唔到，你想加強控制，只會變得自欺欺人⋯⋯」
「係我瞓返晚之後，醒返就無乜事，好似發咗場夢咁，到今日，我開心好多，而且同一大班人玩幾開心，大家有講有笑咁，以前班MK出到嚟都係圍喂威，一齊食煙飲酒，又成日嗌曬無聊咁，周圍無嘢搵嘢玩，去機鋪啦，去網吧咩都齊。」
「我諗我依家真係可以同呀彥劃清界線啦⋯⋯」
呀詩講完之後，無再講過嘢，空氣亦跟隨住冷咗幾分，我哋就咁靜靜地望住個海，我個心莫名地緊張。
其實⋯其實佢係咪等緊我開口⋯⋯？
「所以你一早知呀彥佢嘅事？」最後都係呀詩打破喱個沈默，我不禁暗斥自己廢。
「係啊。」既然佢都知，我都剩係得返坦白承認喱個選擇㗎啦。
「傻瓜！」其實由廣東話講出嚟嘅話，係有啲怪㗎，但好無奈⋯又幾好聽喎衰鬼！
「傻瓜傻瓜傻瓜！！！」呀詩柔聲地大喊。
「做咩啊？」我俾佢嘅無哩頭逗笑。
「你一早知做咩唔話我知啊？」佢嗰種扭計得嚟又帶點責備嘅腔調實在好怪雞。
「我⋯⋯」一時之間我釐清唔到自己嘅思緒，組織唔到自己想表達啲咩，唔知點講好。
「姐係⋯⋯我⋯⋯嗯⋯」我支支吾吾。
我坐係度好專心咁諗緊點樣講嘅時候，呀詩突發攬住我，而佢啲頭髮飛埋嚟打落我塊臉度。
我一個重心唔穩，差啲就連人帶呀詩仆落啲沙度，但好彩我用手頂住，先至無成個人瞓咗落去。
好唔容易整理好嘅思緒俾佢搞返亂曬⋯⋯但心頭係暖嘅。
每次我都猜唔透佢想點，佢嗰種古靈精怪嘅性格成日都俾到唔少刺激同埋驚喜俾我，同佢一齊真係唔怕悶。
「喂喂喂⋯⋯你唔係問我點解嘅咩大佬？」
「嗯！你講啦！我聽緊㗎。」我背住佢睇唔到佢嘅表情，我只係見到個天開始暗，天邊唥色開始變落嚟，側邊嘅街燈都著起上嚟，成個海灘變得好唯美。
「我⋯」呀詩壓住我令我講嘢無咁順暢，但此時此刻嘅我好享受佢咁樣抱住我，多過諗第啲嘢。
「我唔想你唔開心啊，明知條友咁仆街，嗰陣我真係超嬲㗎，嬲條友仔無撚用，得知惡字，但其實乜都唔夠膽做；嬲條友根本唔係男人，玩弄感情不但止，仲想一腳踏兩船；嬲條友俾綠帽你戴。」
「佢講咩話鐘意你姐，佢根本唔知鐘意一個人係點！係啦喎，鐘意你會咁樣對你啦喎？對你粗粗魯魯咁，又唔識得尊重你，最尾咪又係搞上第條女，MK仔始終都係MK仔，佢充滿住MK魂啊。」
提起條友，我就越諗越嬲，真係好憎人玩弄感情，一定有報應㗎。
我份人可以玩好多嘢，但就唔會玩弄感情。因為玩弄感情真係好仆街，你遲下俾人玩返你感情，真係唔好問點解。姐係如果我見到你仆街，我唔會踩多你一腳，我只會講聲：抵死。
呀詩聽到後越攬越大力，大力到我有啲抖唔到氣。
「喂喂呀詩⋯⋯」我拍拍佢個背，佢先識得鬆手。
「呀強⋯」呀詩鬆開後，輕輕呼叫我個名。
「你呢⋯⋯之⋯之前呢⋯⋯咪問咗嗰條問題嘅？你可唔可以問多次啊？」
係昏黃嘅燈光下，啲光直接打落呀詩臉上，我可以清楚睇到呀詩嘅表情。臉上一點羞澀嘅神情都無，反倒眼神好堅定，好認真。
亦都好靚，楚楚動人，佢嘅神韻可以讓我足足望住佢數幾分鐘。
我清楚地知道，佢係想我問咩。
「你可唔可以做我女朋友啊？」我再次問道。
然後就係呀詩撲過嚟，用佢嘅嘴唇話咗個答案俾我知。
喱一吻，好用力，亦都好長。我未嚟得切感受佢第一下衝埋嚟驚喜，我見呀詩已經閉起雙眼，而我仲擘大對眼望住佢，睇得出佢好是享受，我亦都試著慢慢閉起雙眼，感受呀詩帶領我接吻。
打茄輪，係真係好爽！！
嗰種感覺好奇怪，要學起上嚟亦唔難，諗起我頭一次錫呀詩就俾佢笑，就覺得好羞恥。因為我淨係錫囉，成個傻仔咁⋯⋯
我諗錫咗5分鐘了吧？此刻嘅時間過得異常地慢。
「佢哋係嗰度啊⋯⋯」係我哋錫得興高采烈嘅時候，總係有人嚟搞搞震，搞到幾鬼死尷尬。
「係喎！」一把熟悉嘅聲音喺不遠處傳來。
我同呀詩即刻彈開，然後不約而同咁一齊望向後面。
係子晴同蕃薯仔。
只見子晴個樣怕怕羞羞，一臉尷尬咁行過嚟，似乎佢見到曬。
蕃薯仔就成個烚下烚下咁跟埋嚟，一定係班友仔做波俾佢啦，經過頭先嗰一吻之後，我覺得我成個人唔同曬了。
看透了，變強了。
「我⋯我哋⋯差唔多走⋯⋯係時候去執下嘢。」子晴感覺唔知點開口好。
係返去嘅途中，子明同蕃薯仔行係前面，我哋兩個行其後。
我一路行一路觀察子晴蕃薯仔，基本上，佢哋仲尷尬過我哋兩個，成程無乜點講過嘢。
係我專心觀察緊佢哋同時，呀詩拖起我隻手，主動嘅佢除咗會令我驚喜之外，仲會令我覺得我應該更加主動啲，身為男人。
所以今次我直程拖住佢嘅手，變為十指緊扣。
行到返去，眾人嘅焦點瞬間落落我同呀詩身上，行係前面嘅子晴同埋蕃薯仔完全無為意，紛紛擰轉頭一看究竟。
「WOW！」
我無諗住鬆開呀詩隻手，仲要專登路經呀Ken見面同佢對視一眼，露出勝利者應有嘅姿態，而呀Ken亦皮笑肉不笑咁望住我哋，俾個讚我之餘仲講咗句：「叻仔喎！」
我哋執好曬以後，就坐小巴返去，我心情仲好鬼雀躍，咁耐以嚟嘅努力終於有成果！
好似你卡關卡咗好耐，終於都爆關咁。
係小巴上，男同女都分開坐嘅，而呀詩就同子晴一齊坐，好似變老友咗，MK妹與乖乖女。
而係小巴座後面係成堆仔，少不免俾人盤，其實男人堆都會有八卦嘅心理。
「強哥仔拍拖啦喎！點啊，點溝返嚟㗎姐？」當其實嘅社會，係仲未有出pool喱個用詞。
而面對記者會式嘅提問，我都係一律用官腔回答。
「咪又係咁。」
「姐係點啊？」
「姐係咁囉。」
「點啊？」四兩撥千斤，唔好以為無用啊，撥下撥下佢哋就無癮唔會再問，當然全程都係講笑咁講笑啦，我哋班男仔係後面玩得都幾大笑。
尤其是呀Ken，其他都幾好，但呀Ken係幾chur，係咁問問問，而我已經完全無理到佢。
繼呀彥喱個MK仔後，呀Ken都算係我第二黑人憎嘅人嚟。
「關你咩事姐？」最後我頂唔順，回咗佢一句，因為其他人已經坐返係自己位講緊其他嘢。
「咩姐，問下都唔得啦喎？」我當係俾佢攞返個尾彩，無再駁返佢。
蕃薯仔坐係我隔離，熱鬧過後，佢靜俏俏地同我講：
「你哋打茄輪嗰陣我哋睇到曬⋯⋯」其實佢咁講係咩意思呢？我唔知應該點回應佢。
「我真係好羨幕你，可唔可以教下我啊？」蕃薯仔一臉誠懇地問我。
老實講，我真係唔知可以教啲咩，我好想幫佢，但唔知點樣幫先好。然而蕃薯仔好期待我過兩招俾佢咁，搞到我都勁唔好意思。
「其實無㗎喎蕃薯仔，大膽啲，唔好俾自己後悔就得㗎啦。」我好怕點咗條錯嘅路俾佢。
一陣佢衰咗，發覺佢係聽咗我嘅說話，就算佢無怪我，我自己都過意唔去啦。
「成日係佢目前就會好緊張，好似感覺同子晴嘅距離越嚟越遠咁⋯⋯」
我發覺差唔多到筲箕灣，小巴司機打救了我。
「咁你要諗點樣拉近個距離先得㗎，最後都係好似考試咁，你補習都係幫你補下啲概念，到最後去考試嘅都係你。」
哇，簡直係金石良言啊屌！我覺得喱個比喻得唔錯，成功嘅人講嘢就係唔同啲咁。
落車嘅時候，我拍一拍蕃薯仔膊頭，講咗聲加油。
大家四散之後，我哋好有默契地相視而笑，然後拖起手嚟，然後⋯⋯就無然後了。
因為我哋唔知跟住落嚟做咩好，喱個成為我哋啱啱一齊無幾耐嘅第一個考驗。
唔知點解，追呀詩嗰陣就好清楚自己想做咩，反而追到手就唔知應該點做好。
我哋兩個拖住手fing下fing下咁，唔知做咩好，我個腦已經光速咁轉緊。
「不如去你屋企沖個涼再落嚟食個飯啊？」呀詩提議道，而佢知我屋企近啲。
「你上得嚟可能就落唔到嚟食飯啦喎。」我拖緊呀詩嘅手轉攻去佢膊頭，想嘗試一下搭住自己條女膊頭嘅感覺，係條街度示眾。
因為平時迎面見住啲MK仔攬住啲MK妹經過我面前嘅時候，餘光都會望下我，而對視到。就算佢無咩表情，無咩挑釁，都會覺得自己輸咗。
無得贏嘅，就算你隔離有條女，而對家嘅女高你一個level，你都係無得贏㗎。
「你落唔到嚟食飯就可能無得返屋企添啦喎。」我光明正大地挑釁佢。
「嚟咪嚟！驚你啊？」永遠唔好諗住大鳩呀詩，因為會贏唔到。
而我嘅顧忌，點都係屋企人。
而且我預料呀詩會拒絕我，話咩進展太快之類嘅，但原來喱啲對佢嚟講唔算得係啲乜，又長知識了。
「反正聽日又唔洗返學！」佢嘅得戚樣，成個勢俾佢食住曬，喱方面佢真係強項。
「下次等我屋企人唔係度先啦。」我投曬降，無曬佢辦法。
「咁咪乖囉。」呀詩意未深長地一笑。
「咁依家點啊？」我問返佢。
「食完飯就返去先囉，反正聽日放假，不如去睇戲囉？」拍拖後第一樣要煩嘅，就係搵節目。
喱一晚係我人生最開心嘅一晚，個腦好似錄影機咁，不停重溫今日嘅畫面，內心不停地Yes! Yes! Yes!
好想快啲見到佢，只係想同佢痴埋一齊。
我哋一早傾好咗睇咩，佢話好想搵人陪佢睇哈利波特第七集，嗰陣時哈利波特最後一集分咗成兩集，而我一向對哈利波特無乜興趣嘅，可以陪下佢就乜所謂都無啦。
為咗今日拍拖，我都專登打扮下，Gel頭是必須的，但唔係MK仔嘅我，唔會著得好MK，但至少要著得型！
所以拎咗件算OK嘅襯衫，加gel埋頭，用埋定型噴霧，刷個牙都特別落力。
呀詩今日似乎都係⋯⋯心中一陣竊喜，我睇得出佢今日有化少少妝，而且仲著咗條短裙仔，十分誘人。
當你見到對方都同你一樣盛妝打扮下，感覺重視今次拍拖嘅感覺，真係好窩心好暖上頭心，好是雀躍。
而佢想出旺角，佢話想行下旺角喎，睇下衫。
果然旺角係MK仔女嘅集中地，如非必要我都唔會出旺角，今次當係朝聖囉。
我喱啲港島撚，有咩事咪去銅鑼灣囉，旺角又要過海又剩，何必呢？
今日出街我都帶多少少錢，我屋企就唔算窮嘅，老豆老母俾嘅零用錢都算多，有時用剩嘅零用我會儲起佢，最多有時咪用嚟買點數。
舊年時仲未興用課金一詞，我哋都係買點數多，嗰陣買得最多就係橘子。好多Game都係橋子產品，除咗放咗唔少錢入去之外，都放咗唔少青春係入面。
啊⋯⋯喱個唔係重點，重點係我為咗今日拍拖，我拎曬所有零用出街，個荷包係滿到仆街，淨係廿蚊都一疊啊。
去到買飛，排隊條龍真係好長，啱啱上映無幾耐，個個都爭住想睇喱一套，好多場都滿曬，估唔到咁早嚟都會無位⋯⋯
最後幾經辛苦買到飛，我都好識做地無叫呀詩俾錢。
「一陣請返你食爆谷啦！」呀詩豪爽地說，絲毫不計較，幾抵得諗。