《六樓B室》: 特別篇 - Hazel視角 (五)
特別篇 - Hazel視角 (五)
※※※※※時間線 - 第十九章※※※※※
痴纏男：「Hazel！呢個係咩人，你做乜拖住佢？」
我︰「我都話咗我有男朋友㗎啦，你係都唔信，我咪特登約你出嚟，俾你睇清楚囉！」
阿傑：「Hazel，你坐低先啦，小心呀。」
阿傑扶著我的腰，慢慢讓我坐下。
我︰「阿傑，呢個就係騷擾咗我好耐嗰個男人。」
阿傑立刻對痴纏男瞪大雙眼。
阿傑：「先生，我唔想攪大件事，你之前騷擾我條女，我唔同你計，由今日開始，麻煩你喺Hazel面前自動消失。如果唔係，你唔好怪我唔客氣。」
痴纏男：「你嚇鬼呀，我嚇大㗎，你可以對我點。Hazel，你搵個男仔嚟激我，都搵個高質少少吖！」
痴纏男不怕阿傑兇他，更反過來兇阿傑。我見阿傑有些憤怒，但忍住了。希望接下來沒事發生！
痴纏男：「Hazel，你自從同你個ex分手之後，我已經跟咗你好耐，我都冇發現過你同過呢條騎呢怪出過街。你呃我唔到㗎，我係唔會死心。」
阿傑：「我哋依家唔係嚟同你交代我同Hazel嘅關係係點，依家係我要同你講，Hazel係唔會鍾意你呢個變態佬。唔係，係一個淨係識騷擾人、跟蹤人嘅變態佬。」
痴纏男：「Hazel，試吓同我一齊啦，唔好理呢條粉皮。我會對你好好，我會俾到幸福你，我大把錢。」
阿傑：「哈哈哈哈，你有幾有錢呀？」
痴纏男：「你唔信？好，我就俾啲証據你睇。」
痴纏男拿出手機，似要尋找相簿入面的相片。不消一回，他將找到的相片展示給我們看。
痴纏男：「嗱，睇唔睇到呀，呢幾張係我阿爸喺大陸有嘅物業房產證，仲有買賣合約嘅文件。睇到啦，我阿爸死咗之後，啲樓咪又係我嘅。」
這不是他有沒有錢的問題，而是我喜不喜歡他的問題。莫講話拍拖，我連和他做普通朋友的意慾也沒有。
Hazel︰「你死咗條心啦！就算你幾有錢，我都唔會鍾意你，我依家淨係鍾意阿傑一個，你唔好再煩住我喇！如果唔係我報警㗎！」
我開始有些緊張，不自覺地翹著了阿傑的手臂。我緊貼著他，真的少了緊張的感覺。
痴纏男：「報警唔會嚇到我，你哋告我唔到，你告我你哋都有排煩。」
阿傑：「先生，其實你講唔講得出你鍾意Hazel啲乜？」
痴纏男聽到阿傑這樣一問，突然停頓了幾秒，似是不知怎樣回答。莫非阿傑用硬不成，現在轉用軟去對付痴纏男？
痴纏男：「我鍾意Hazel嘅全部，係所有Hazel嘅嘢我都鍾意，優點同缺點都鍾意。」
阿傑：「咁Hazel有咩優點同缺點吖？」
痴纏男：「哼，你問咁多嘢做咩！總之所有關於Hazel嘅嘢我都會接受、都會鍾意。」
阿傑：「我初時識Hazel嘅時候，我好鍾意Hazel嘅率真，有嗰句講嗰句。同佢一齊傾偈好舒服，我哋好似有講唔完嘅話題，好似咩話題都講得。同佢一齊嘅時候，好舒服。」
聽到阿傑這樣說，我的心開始急速跳動。阿傑說此番話時，很真誠，不似是為了擊退痴纏男而虛構出來。莫非阿傑對我也有好感？
阿傑：「我見唔到佢嘅時候，我會經常諗起佢。我會為咗佢覆我message而開心到瞓唔著，亦都會為咗佢明明藍剔但冇回覆而坐立不安。我會為佢有嘢隱暪我而唔開心，亦都會為咗佢肯同我講真心話而感到安慰。我唔會忍心見到佢病，我會想盡辦法去照顧佢，痛錫佢。如果你鍾意一個人，係會想盡辦法令佢開心，而唔係做一啲傷害佢嘅嘢，令佢擔驚受怕。」
阿傑說的話很感動。我很想哭，但我哭的原因不是被他感動到，而是他所說的話，很可能不是想著我而講。
他可能已有心儀的對象！我和他的經歷不算太多，只和他見過三四次面，電話號碼也是剛剛才交換。他的說話很真實，似是他與其他女仔的經歷。
此時，餐廳侍應端來了一杯咖啡。
痴纏男：「Hazel，我知你鍾意飲咖啡，我特登叫咗呢杯滴漏咖啡俾你飲，呢度好出名㗎！嚟，快啲試吓啦！」
阿傑：「不如算啦先生。其實Hazel只係會飲espresso沖出嚟嘅咖啡，其他咖啡佢係唔會鍾意飲。其實唔啱口味就係唔啱，夾硬試都係唔會鍾意，就好似你咁，你就係Hazel心裡面嘅drip coffee。」
阿傑拖著我的手，示意我跟他立即離開。臨走時，他還對痴纏男補充了一句：「如果你再繼續走嚟騷擾Hazel，就証明你根本唔識得點樣去愛佢。」
我們離開了餐廳，往回家的方向走。阿傑一直很緊張地拖著我的手，生怕痴纏男會追上來。
途中，阿傑望著我。我低下了頭，不敢正面望著他。我很感激他可以幫我幫到這個地步，也很高興他說很喜歡和我相處的時刻。
我︰「阿傑！」
阿傑：「係。」
我終於敢望向他，但未敢再說任何話。
我們停了步，互望著對方。阿傑仍然是緊緊的拖著我的手，生怕我會走失一樣。
我︰「多謝你！」
阿傑：「都話應承咗你，我就會幫到底啦！不過，我唔敢放開你隻手，怕佢會追上嚟，要屈就你喇！」
我︰「傻人，唔屈就！」
我衝口而出，稱呼了他做「傻人」！這是我初戀時稱呼對方時用的詞語，之後兩次拍拖也沒有再用，甚麼「BB」、「老公」我更加不會用！看來，在我的心深處，我已認定他是我喜歡的人。
終於來到富耀大廈，幸好痴纏男沒有再追過來。來到我屋企門口，阿傑終於放開了我的手。
我很感激他今晚幫了我一個大忙，我想請他食飯，答謝他的幫忙。
我︰「你聽晚得唔得閒？」
阿傑：「吓，仲有第二個痴纏男？」
我︰「哈哈，唔係呀。我想請你食飯，當係多謝你今晚幫咗我一個大忙。」
阿傑：「唔使喇，你俾我拖咗你隻手咁耐，已經係最好嘅回報喇，唔使請食飯喇！」
從來都沒有我做不到的事情。
我︰「你冇得拒絕，已經約定咗你喇，到時你可以問埋我嗰條未問嘅問題。我今晚再whatsapp你喺邊度食啦。早抖！」