《六樓B室》: 特別篇 - Hazel視角 (四)
特別篇 - Hazel視角 (四)
跟蹤我的變態男在我面前出現。
我終於看見他的模樣，因為今次他沒有戴口罩，也沒有穿有帽風褸。我好肯定，我從來未見過此人。
他手執著一束鮮花，並道：「Hazel，紮花送俾你㗎！」
我：「先生，我好似唔識你㗎喎！」
跟蹤狂：「唔識我唔緊要，最緊要我識你。送俾你㗎，你收咗佢先啦！」
我：「我係唔會收啲不明來歷嘅人送俾我嘅嘢。你係咪一直跟蹤咗我好耐？」
跟蹤狂：「係呀！我好耐之前已經識你，成日搭巴士都撞到你。我對你可以話係一見鍾情㗎，好想同你喺埋一齊，可惜俾我知道你有男朋友。所以我一直跟蹤你，一直等你，等到你同你男朋友分手，我就可以追你。既然上次俾你識穿我跟蹤你，我覺得係時候要同你表白。Hazel，送俾你㗎！」
我：「你痴線㗎，我都唔識你，仲要俾你跟蹤咗咁耐，你覺得我會接受到咩？」
跟蹤狂：「Hazel，試吓同我拍拖啦，試吓接受我啦，我會對你好好。」
我：「痴線㗎，你唔好再跟蹤我喇，再唔係我就報警！」
我立即拍走他送給我的花，立即逃離現場，幸好他沒有追上來。
※※※※※※※※※※
雖然他沒有再跟蹤我，但情況比之前更加惡劣。他差不多每日都在富耀大廈門口等我，每次都拿著一束鮮花，他說要用誠意打動我。他還對我講很多甜言密語，我真的想作嘔！
本來我想報警，但他現在沒有跟蹤我，只是差不多每日都送花給我，我拒絕之後他又沒有再追來。我怕警方覺得不算纏擾，不會受理我的投訴。
某日，我真的撐不住了。很大聲對痴纏男說：「夠喇，你唔好再嚟騷擾我，我係唔會鍾意你，再唔係我真係報警！」
痴纏男：「你依家唔鍾意我，唔代表日後唔會愛上我。你收咗佢啦，今日啲花好靚呀！」
我：「我有男朋友㗎喇，唔好再煩我，你冇機會㗎喇！」
痴纏男：「你呃我，之前跟你咁耐，都見唔到你有新歡。」
我：「你真係痴線㗎，你唔好再嚟煩我！」
我再一次絕塵而去，他也沒有追上來。不過我深信，明天他又會捲土重來。
唉，好煩呀！咁大個女都未試過咁樣被人煩住！
※※※※※時間線 - 第十八章※※※※※
今日，我沒有生意。本想外出逛街，但又怕在大廈門口遇到痴纏男。我一想起他，我就覺得很嘔心，甚麼行街的意慾也沒有。唉！唯有落一樓書店打書釘啦！
甫進入書店，便撞見迎面而來的阿傑。
阿傑：「咁啱嘅Hazel，我哋真係好有緣呀！」
我︰「唔覺喎，撞過三次渣嘛！」
上次他來我家找我，說要問我問題，之後發生了黃生斬黃太的事件，最後他也忘記了再找我。難道我在他心目中，真的不重要？
我︰「你上次係咪話有嘢要問我？」
阿傑：「係喎，我都差啲唔記得咗。」
哼，討厭的阿傑！我本想找他幫手對付痴纏男，但他可能只當我是普通鄰居。如果找他做這樣的事情，好像很突兀。算啦，問吓無妨。
我︰「咁即係唔重要啦，咁遲啲再問啦！喂，我有嘢想搵你幫手呀！」
阿傑：「係咪條渠又塞咗呀？無問題呀，我依家得閒。」
我︰「唔係呀，你今晚幫我做一樣嘢吖！」
我提出了我的要求，想他假扮我的男朋友，去擊退痴纏男。他聽到後，猶疑了好一陣子。
其實，我們都是單身，我的樣貌也不差，除非他真的很討厭我，否則也不會拒絕我的要求吧？如果被他拒絕，真的很樣衰。
我︰「使唔使諗咁耐呀，我好差咩！幫就幫，唔幫就算。」
阿傑：「幫。我哋從長計議。」
幸好，他答應了。
他邀請了我上他家喝咖啡。原來他真的沒有騙我，他沖咖啡的技術真的很專業，沖的咖啡味道很合我心意。
阿傑：「你上次請過我飲咖啡，留意到你鍾意嘅咖啡膠囊，我用番差唔多嘅咖啡豆，沖番俾你飲。」
我：「唔，都OK啦！」
原來阿傑有留意我。算你啦！
我再八卦地參觀一下他的屋企，沒有太多雜物，很整齊，沒有臭男人味。他又多了一個我喜歡的優點。
阿傑：「Hazel，我嚟問你，個痴纏男幾時開始煩你？佢點樣煩住你？煩得你有幾密？佢個樣猥唔猥瑣？有冇講過啲咸濕嘢去性騷擾你？有冇露過械？」
我：「點呀你，我唔係去差館報案喎，使唔使問得咁詳盡呀？」
阿傑：「係呀，知己知彼嘛！仲有呀，我哋扮拍拖嗰陣，有啲咩可以做，有啲咩唔可以做？默契唔好會俾人識穿㗎！」
我忍唔住，笑了出來。
我︰「笑死我咩，你使唔使咁認真呀！」
阿傑：「喂，我都唔想你俾條仆街咁樣騷擾落去，我一定要佢知難而退，永遠都唔會再返嚟纏住你。我認真㗎！」
聽到他說「我認真㗎」，心裡感到一點甜，因為他很緊張我的事。我不禁在他面前甜笑了出來。
阿傑：「你唔好誤會呀，我幫朋友喳！」
我︰「知道喇。幾時由鄰居升做朋友㗎？」
阿傑：「自從幫你通完渠之後囉。」
不知為何，他說甚麼我也覺得很好笑。
我︰「你到時拖住我隻手就得㗎喇，搭膊頭、攬腰都可以，除咗我個胸同patpat唔俾摸，其他都OK啦！同埋，唔可以錫我個咀㗎！」
既然他那麼認真地問，我就認真地回答吧。他聽到我的回答，突然淫笑起來。
我︰「做咩呀你，喺度淫笑，你諗緊啲咩賤嘢？」
阿傑：「冇呀！」
我：「你呢個樣，仲猥瑣過痴纏男。唔使你幫喇！」
阿傑立即收起笑容。
我望著阿傑。他雖不是靚仔，但樣貌也不差。人品不錯，好肯幫人。最重要是他說話不悶，人很有趣，和他傾偈很開心，也有共同喜歡的事物。我發覺，我喜歡了他。
※※※※※※※※※※
和阿傑道別之後，我落地下找痴纏男。我知他一定會如常拿著花束，在大廈門口等我。
痴纏男：「送俾你㗎，你收咗佢啦！」
我：「唔使喇。今晚七點半喺馬頭角道間西餐廳等呀，我有嘢想同你講。」
痴纏男：「好呀好呀，今晚一齊食飯啦，不見不散。」
※※※※※※※※※※
差不多時間去見痴纏男了。我和阿傑一同由富耀大廈出發，步行前往該餐廳。
愈接近那間餐廳，我愈有不安的感覺。可能阿傑見到我有些緊張，竟然十指緊扣地拖著我的手。
阿傑：「有冇好啲呀？你有啲緊張喎！」
我︰「邊有呀！」
阿傑：「放鬆啲啦，有我喺度嘛！」
我︰「你唔好借啲意喎！都未到餐廳就拖住我隻手！」
阿傑：「我哋隨時都會見到你嗰個痴纏男，俾佢見到我哋企到離行離列，實穿崩啦！」
我︰「哼！」
雖然我表面對他「哼」了一聲，但事實上，我很享受被他拖著手的感覺。
我們準時到達餐廳，原來痴纏男已經一早來到，坐在一卡位之上。
我︰「喂！」
痴纏男聽到我的聲音後，立即彈起身，並望向我們。