《六樓B室》: 第二十六章 不明氣體
第二十六章 不明氣體
六樓走廊比八樓多了一條水管。
我：「肯定就係呢條水管，令到我哋撞鬼。」
細賢：「唔好咁快下定論。一幢六十年嘅舊樓，經過好多次裝修同維修，多咗啲水管係好常見嘅事。同埋就算有『景滾』，都唔會做得咁揚掛？」
我：「就係搏你覺得太養眼，會認為一定冇問題。」
細賢：「咁我哋落去其他樓層睇吓啦！」
我和細賢由七樓開始，除了六樓之外，每層都仔細觀察。我們發現七樓、五樓和四樓都沒有多出來的水管。正當我興高采烈，以為水管就是關鍵所在的時候，我們發現三樓也有此水管。
我：「唉，原來真係維修嘅時候多出嚟嘅水管，六樓有，三樓都有。」
細賢：「睇埋二樓同一樓先啦。」
結果，連二樓都有，一樓則沒有。總結來講，大廈的二樓、三樓和六樓多了一條水管，其餘樓層則沒有。
由於除了水管之外，也發現不到有其他異樣，今日調查又暫告一段落。細賢有事要辦，先行離開。
我一個人站在三樓的走廊位置，死心不息地望著那條水管，又嘗試觸摸水管，發覺這只是一條普通水管，發現不到任何異樣。
正當我概嘆著調查又沒有進展之際，Hazel從她的3A單位走出來，原來是倒垃圾。她看見我在她門前，也有一點驚訝。
Hazel︰「嚇死我咩！好彩日光日白者。你搵我？」
「唔……唔係呀！」我吞吞吐吐地說。
可能我一直苦惱那個水管問題，突然遇到Hazel這一問，顯然有點不知所措。
Hazel︰「仲以為你搵我添！咁你落嚟三樓做乜呀？仲要鬼鬼鼠鼠。」
我以笑遮醜。
我：「咁，我可唔可以入嚟坐一陣呀？」
Hazel︰「好啦。」
※※※※※※※※※※
Hazel沖了咖啡給我喝。
我：「唉，好苦惱，唔知點講。我唔知點樣解釋我點解喺你門口，我唔講得俾你知，sorry！」
Hazel︰「唔講得就唔使講啦，你唔使同我解釋。」
我：「多謝你。」
之後我一直沒有說話，她也沒有再追問。此時，我想找人陪伴一下，Hazel也明白我的用意，只在旁陪著我，沒有講多餘的說話。
我：「痴纏男有冇再搵你呀？如果仲有，你要同我講喎！」
Hazel︰「冇喇，上次你做得實在太好。」
我：「咁就好喇！」
Hazel︰「咁你呢？你同你鍾意嘅人最尾有冇喺埋一齊？」
我：「有，我哋已經拍緊拖，但我好迷惘。」
Hazel︰「你又苦惱，又迷惘，我幫你唔到喎！」
我：「苦惱嘅嘢唔講得，迷惘嘅嘢可以講。我係同我鍾意嘅人拍緊拖，但我唔知佢係咪真心鍾意我！佢有太多嘢暪住我喇！」
Hazel︰「你同佢一齊開唔開心吖？」
我：「開心，好開心。」
Hazel︰「咁你想唔想冇咗佢？」
我：「唔想呀！」
Hazel︰「如果佢呃你係有苦衷，你會唔會原諒佢？」
我：「會。」
Hazel︰「你咁在乎呢段感情，如果我係你，我會同佢攪清楚成件事先。你由得佢唔理，心裡面有條刺，之後一定唔會開心。」
我：「明白。」
我想像不到，一個在不久之前曾向我表白的女仔，會和我探討我的感情問題。
Hazel︰「唔好諗咁多嘢喇。我最近學咗一個魔術，等我玩俾你睇啦！」
我：「好呀！」
Hazel取出了一張正方形的紙，然後平均分成九份，再隨意取其中一張，叫我寫上我的幸運號碼。然後再叫我在其餘八張紙隨意寫上不同的號碼，之後反轉放在枱面，她說她會找到我的幸運號碼。
其實這樣低層次的魔術，我中學時已知道原理。但Hazel一心想變魔術令我開心，我不可以踢爆她，還要扮作無知地表示怎可能估得到。
當然，Hazel順利地選對了寫上幸運號碼的紙，我立刻扮作驚訝，還問她是怎樣知道。她見她的魔術成功騙過我，她非常開心，還一臉得意洋洋。我望著她，原來她也有可愛的一面。
Hazel︰「其實好簡單㗎喳，我唔係隨意俾紙你寫number㗎，我係揀咗中間嗰張、四面都有撕痕嘅紙俾你寫㗎，所以我一睇就知啦！」
我：「咦，係喎，原來咁簡單！Hazel，好多謝你呀，你氹得我好開心，頭先啲苦惱嘢、迷惘嘢都唔記得晒喇！」
Hazel︰「你開心就好喇！」
我真的很開心，很開心有一位可以傾心事、很在乎我的異性朋友。
※※※※※※※※※※
魔術完結後，是時候回家。
我在三樓等lift的時候，我再次望向那條水管。我突然想起了一些事情。
雖然二樓、三樓和六樓的水管表面上是相同，但情況好像魔術中那九張看似一樣的紙，其實是不一樣的。二樓和三樓的水管可能是煙幕，其實六樓的水管真的有特別用途，就像唯一一張四面都有撕痕的紙。六樓那條水管可能真的有特別功能，和靈異事件有莫大關係。
我whatsapp細賢，講出我的想法，他也贊同。如果六樓那條水管真的有實質用途，究竟有甚麼用途呢？
細賢：「嗰條水管應該可以滲啲迷魂氣體出嚟」
我：「係 我都係咁諗 好正路嘅諗法 但係啲迷魂氣體儲存喺邊呢？成個system又點操作呢？」
細賢：「一定存喺6B單位啦」
我：「係 而且釋放氣體嘅開關係旺叔操控嘅」
細賢：「未必 之前講過 旺叔一個人能力有限 冇可能24小時監視住六樓 萬一有人誤打誤撞上咗6樓 就冇撞鬼 呢個漏洞實在太大」
我：「紅外線？」
細賢：「應該係 所以我一直都堅信有紅外線感測 一有人進入六樓 就會釋放迷藥 同時有警報俾旺叔 所以你之前試過去六樓 旺叔都喺短時間內到達」
我：「如果係咁 旺叔可能一樣有開關 但唔係控制釋放迷藥 而且控制紅外線感應」
細賢：「係 你講得啱 旺叔上次去六樓冇事 就係佢上去之前熄咗紅外線 所以冇迷藥」
我：「好 如果想知道我哋諗法係唔係真 我即刻上網訂兩個防毒面罩 到時我哋衝落六樓 睇吓有冇事」
細賢：「好 但要從長計議」
要証明我們的假設是正確，一定要戴著防毒面具，親身去一次六樓。如果我們沒有頭暈眼花的症狀，即代表迷魂氣體的假設成立。當然，我們還要從長計議。
※※※※※※※※※※
防毒面罩到貨後，細賢想來我家試戴，以及研究怎樣進入六樓。今晚Hailey如常到醫院探望蘭姨，一般她會晚上十時後才到達我家，而我今晚又六時半下班，於是細賢大約七時左右上來我家討論案情，然後十時前離開，以免被Hailey發覺我們在秘密查案。
細賢檢查過防毒面罩，質量不俗，應該做到我們想做的效果。
我：「如果OK，咁我哋要定一個日子，一鼓作氣衝落六樓，爆門入6B，乾手淨腳，唔好煩。件事已經拖咗好耐，我唔想再等。」
細賢：「我都想，但要先証實係咪真係有迷魂氣體呢個假設，同埋我唔排除有其他危險，我哋唔應該搵命搏。」
我：「咁不如先試吓戴住防毒面罩落去六樓先啦，唔好諗爆門住，不過要過傳說中嘅紅外線嗰關。」
細賢：「係。我有一個諗法，但唔知可唔可行，因為我想搵你個friend阿豪仔幫手。」
我：「豪仔？」
細賢：「係，佢信唔信得過？」
我：「佢係我小學同學，由細玩到大，我唔信佢我都唔知信邊個好。但佢點幫我哋手？」
細賢：「上次佢話喺你電話入面發現你俾人裝咗間諜app，佢係咪IT人？」
我：「係！」
細賢：「你覺得佢可唔可以幫你喺旺叔部電話入面裝一個相類似嘅app，控制返旺叔部電話？」