當香港人可以用一人一票投票係午餐食乜野時: #2

剛過去星期日，台灣大選結束左，台灣人終於趕走左大部分人唔鐘意既Korea 魚。​小英高票當選，唔係因為佢做得好，只係有更多人唔想Korea 嬴。「唔係想泛民贏，只係要建制輸」，​我地呢邊都有呢個口號好多年，而咁多年來，唔係泛民做得好，而係向不公平既選舉制度下，我地都只能咁樣去保住最「關鍵一席」。
​
​喂，食飯啫，做乜無啦啦拉扯到幾個地方既立法會同總統大選咁遠？你有所不知，我地個TG食飯 Group 本身都只係講下去邊度食，點知六月開始就變得好政治化，後來有埋黃店藍店，向食飯谷講政治更變得「理直氣壯」。
​
講咁多野，​我只不過想講，即使係一個唔係太完美既投票制度下，但只係想踢走啲大家都唔想去既地方食飯，攞個基本共識，唔駛十幾條友企向樓下on99傾唔出決定，係咪都發揮唔到作用呢？
​
​或者咁，我向度具體地講多少少食肆情況。咁呢，七八月之後，我地已經放棄左平時去得最多，後街果邊好食又大碟既深藍茶記。然後呢，過兩條街商場都有幾間ok 既，但就係貴囉，而且啲越南野呀、日本拉麵都食唔飽，我地都間中去，但經濟咁差，唔明佢地點解下半年可以加價，所以又少去左。
​
​至於呀x 哥升AP1離開我哋前個個星期都去一次果間，價錢貴少少但係睇左x 哥比較鐘意去，咁x 哥由聽講向度做Tcon 三四年先考到AP2留返向呢度做幾年就調去其他部門，小弟比agent 扼入來就係佢啱啱考到AP2頂佢個位。通常做AP2會有自己圈子，同啲AP1或者其他AP2 一齊食，升職都靠佢哋嘛。不過x 哥升左AP2後一個星期仲有成兩三日過來同我哋班狗公一齊食，佢話啱傾啲喎，佢都算有義氣年資又高，所以佢話去邊，大家都會跟，其實咁仲好，唔駛自己諗。
​




​跟住要講一間向樓上好有爭議性既，呢間堅平，仲有湯有汽水，連飯都任添，不過質素呢，其實又唔係好差，大約係「乾炒牛河」會有湯咁情況，不過你唔叫牛河就可以了，佢有星洲米都食得架，而果啲餸飯係可以加飯。果個價錢你仲想食乜?自從好得果間茶記入左黑名單，呢間就成為左新寵兒啦。但唔知點解，有位來左大半年既狗公對呢間好反感，次次話去都屌嘴，但佢為左過來吹水講政治，都會跟隊。
​
​另外有堆小黃店唔係有曱甴出現過湯裡面，就係服務差到爆，基於「不割席」原則，呢度就唔講太多啦。
​
​咁既然有左個polling ，只要大家跟住遊戲規則，至少都可以趕走唔想去果間丫。「袋住先」應該比「原地踏步」好卦？
​
​待續