當香港人可以用一人一票投票係午餐食乜野時: #1

當香港人可以用一人一票投票係午餐食乜野時　（真實故事改編）

是咁的，我係一條蛋散，就向某部門做ＩＴ狗，你都知，政府好鐘意請外判ＩＴ狗，我地部門都好多。咁物以類聚，啲阿Sir 係唔會同我地外判狗公一齊食既，如果有後生又睇得下的狗女佢地會邀請一齊既，所以我地呢啲狗公會一齊出動搵食。

入得來做狗的有兩類，一類係出面做做下想休息下，讀下書，會入來hea一兩年；而另一類係想考公墓園服務巿民的。所以啲我地個狗群流動性都好大，每年AP2放榜就走幾個，又有幾個新入來咁。

如是者，隨著部門擴展，狗隻數目就越來越多，每一日，我地都好煩惱去邊食好。因為人多總有意見，有人鐘意食A，有人唔鐘意食B咁。試過有次企向單位樓下傾左超過五分鐘都無結論。丫，漏左樣野無講，其實我地係有個TG group講邊度食飯，但隨著一代新人換舊人，而家既面孔己經唔同晒，而個近期社會發生連串一場場抗爭運動，新人舊人都向度日日講黃色笑話，就無晒人再講去邊度食飯，真係「正經野又唔見咁上心」喎。

作為IT狗，好自然諗到用科技手段而且平衡各方利益啦。拿，你又唔好似為我地係個「反送中」運動開始左先要搞「普選」是日午餐喎，其實老早有另一條口多多唔做野既蛋散話要用TG寫個robot投票，不過講完無左件事咁解。





其實本地社運都係咁，開頭個個話要勇武，無人肯衝，到有人衝，又有內鬼拉位又督灰，咁無計架，如是者，十年過去。講返我地餐飯，又如是者，過左好幾個月，終於等到天降大任的英雄加入我地呢個狗公群。

佢寫program真係幾勁，但最重要係有heart，點知佢真係寫左個好簡單既polling出來向個TG。嘩，你實覺得救世主終於出現啦，普選應該可以解決晒啲「爭咬問題」啦。well，真係唔講由至可，一講我都差啲笑到打唔完篇文，向此情此境既香港，真係好應境。

首先，條友唔知求其定有心，個polling得幾間茶記食巿揀，即係係一個有篩選既投票黎，仲要比晒堆唔知乜野鋪。即係普選特首，比CY, 777同何妖你投，正呀喂，啲人打生打死既普選，呢度幾下就實現啦。之但係，一切從呢度先開始。。。

未完，待續～