《我哋已經到達終點站⋯⋯》: 第三十二章

上到去，媽子同阿婆喺廚房煮緊餸，舅父就同表妹打緊機，知道我哋嚟到，媽子即刻行出嚟。

「嚟到啦，誒，哩位一定係阿俊個朋友嘞。」

「Auntie你好，我叫阿嵐。」頂，又唔見嵐姐你對我咁好聲好氣。

「同阿俊傾陣計先，好快有得食。喂，唔好成碌木咁啦，快啲拎嘢比人飲啦。」又點我去做嘢。

「飲咩呀？」我問娘娘。





「你幫我揀啦，你揀咩畀我我都鍾意。」

妖，咁你叫我拎咩畀你呀？一陣唔啱心水又鬧我。

唉，求其拎盒檸檬茶畀佢算。

。

平時食飯嗰陣都係一班人傾下計咁，但今日兩老突然對嚟黐餐嘅娘娘好有興趣。





「係呢，你哋係點識㗎？」

「我同Charlie係中學同學嚟，之後都係前排先撞返喳嘛。」

唉，搞到我又諗返起嗰陣我點樣避開你⋯⋯

「原來係咁呀，辛苦曬阿嵐你中學嗰陣睇住哩個仔啦。嚟，食多啲。」講完阿媽又夾餸畀娘娘。

明明中學嗰陣係我睇住佢⋯⋯





「邊係呢，Charlie喺中學嗰陣不知幫咗我幾多。」

算你有返啲良心。

「係呢，阿嵐你依家讀緊書？」老竇問。

請問一下，人哋係唔係讀緊書同你有咩關係？

「唔係呀，我依家返緊工，不過都有學吓唔同嘅嘢。」

「哦～好好學喎。」

結果成餐飯啲話題都離不開娘娘，你唔煩我都覺得煩啦。

。





食完飯娘娘竟然主動幫手執碗，佢咁做的確係令我對佢改觀嘅，只因為當年中學有關清潔嘅事，佢都扔曬比我做。

叮叮～

「你幾點Ok？」Jason仔問。

望吓個鐘，八點半，車埋娘娘返屋企，九點半應該無問題嘅，不過都係預鬆少少啦。

「十點Ok？」

「Ok，我十點準時上嚟。」

咁啱媽子佢哋洗好曬碗，坐埋出嚟傾，所以我決定Whatsapp 娘娘。





「走未？」

「有急事？」

「唔係嘅，只不過我十點約咗人。」

「囡囡？」

我望住娘娘，佢笑一笑。

「No」

「咁等我同Auntie講啦。」

娘娘收埋電話之後同媽子講⋯⋯





「Auntie呀，我都夠鐘要返屋企啦。」

「哦，好呀好呀，下次再上嚟食飯喎。」

「係嘅～」

「喂，何梓俊送人返屋企啦。」媽子叫我。

「哦。」

。

「你屋企人真係好Nice呀。」





「因為你喺度嘛。」

「乜係咩～係喎，約咗邊個呀？」

「Friend。」

「哦？去飲嘢？」

「可以話係。」

「我又去～」

一陣間你又飲醉酒我咪仆街？

「吓？」

「唔準講唔得㗎。」

「但我返屋企飲喎。」

「唔理呀，一定要帶埋我呀！」

「唉，好啦。」

「Yeah～」

「但你千奇千奇唔好飲醉喎。」

「放心，我唔會醉嘅。」

呵，唔知上次邊個飲到攬住廁所嘔呢～

「咁返去之前可唔可以陪我買啲嘢？」

「無問題。」

「咁去市中心先啦。」

車咗佢去屯門市廣場，我廢事扔低架車，過佢自己一個去買算，我喺車度等佢。

半個鐘之後，娘娘佢拎住個屈臣氏膠袋同Uniqlo膠袋返嚟，但我對入面嘅嘢無興趣，所以睇都無諗過睇。