《我哋已經到達終點站⋯⋯》: 第三十一章

話咁快嚟到中秋節，老媽子打電話嚟叫我去舅父度食晚飯。

而嗰日我係唔洗上堂又唔洗返工揸車，喺屋企休息放鬆係好重要㗎，話曬返工嗰陣有成百條人命喺我手上。

叮叮～

咦，唔知邊個Whatsapp我呢？

「飲嘢否？」哦～原來係Jason仔。





「幾時先？」

「就你啦。」

「今晚囉咁，順便過嚟打機啦。」

「Ok，得嘅你再Whatsapp我。」

上嚟打機，咁我依家應該落街買啲薯片零食先，廢事肚餓無嘢食。





落到樓下間超級市場，多數女人都係不斷兜，行均曬成間超市，但我唔會咁做，買到要買嘅嘢就Ok。

正當我諗緊薯片應該買原味，定係買BBQ味嗰陣⋯⋯

「買曬佢啦。」

「嗯，你啱。」

「吓，你見到我唔驚訝㗎咩？」





「大家都係住屯門，撞到有乜咁出奇？」

「唓～都唔好玩嘅～」

「得你一個嘅？」

「家姐返工，阿媽又去咗打牌。」

「哦～」

「咁你又有咩做呀？」

「無，喺屋企Hea，今晚同屋企人食飯。」

「我有冇得黐餐呀～～」





「你認真？」

「係呀，得我一個好悶呀。」

「咁我打電話同媽子講聲啦咁。」

同咗老媽子溝通完，佢好開心咁話要加餸。而娘娘同時亦都好開心，笑容滿面咁款。

多個人食飯啫，洗唔洗加餸咁誇張呀⋯⋯

咁未夠鐘食飯，娘娘走埋上嚟我屋企Hea⋯⋯

。





「你當自己屋企得㗎啦。」通常啲人都係講哩啲客套説話，我都唔例外。

結果佢就真係當喺自己屋企咁，攤喺我張梳化，不過唔緊要啦，我無乜所謂。

。

就咁睇吓片，打吓機咁樣，太陽就落山，我都準備返去食飯。

「行得未？」

「我個Look o唔ok呀？有冇整花個妝呀？有冇亂曬呀啲頭髮？」

我鬼知你有冇整花個妝咩⋯⋯

不過又咁睇，娘娘就咁着件黑色T Shirt，加條長牛仔褲，其實係唔錯。





「無呀，靚曬啦，行啦。」

「好啦～」

落停車場拎車，雖然舅父佢地都係住喺同區，但廢事食完嘢要娘娘搭車啦，所以都係揸車啦。

話說又見到架NSR，有機會真係想同車主傾吓計呢。

。

喺返緊媽子度嘅途中，我嚟度一個燈位。

「Vi～Vi～」從後傳嚟V4引擎聲吸引咗我。





過多幾秒，佢停咗喺我隔離。

「仔。」

「老竇？」

「哩位係？」老竇望一望我後座嘅娘娘。

「佢上嚟黐餐㗎。」

「朋友仔？」

「係。」

説時遲那時快，轉咗綠燈可以行。

。

老竇同我泊好車，落好碟鎖，就一齊去搭𨋢上樓。

「係呢，阿妹點稱呼呀？」老竇問。

「叫我阿嵐得㗎啦。」頂，我從來未聽過娘娘會咁溫柔咁講嘢。

「係呀，阿嵐一陣記得食多啲啦。」

「係嘅。」

「喂，老竇。」

「做乜？」搞錯，同我講嘢就粗聲粗氣。

「你邊度整架咁嘅嘢返嚟？」

「架RVF？」

「唔係你覺得我講咩？」

「買咪有。」

頂，我夠知買返嚟啦，唔通偷呃拐騙咩。

「你係咪想問做乜買架RVF返嚟呀？」

「嗯。」

「因為我想。」

Ok you win，法官大人我無嘢問。