《我哋已經到達終點站⋯⋯》: 第二十九章

話說我都有一排無揸電單車，對上一次已經係同Rachel去尖沙嘴嗰次。

呀，好耐無聽過600RR把聲啦～ 哄～哄～ 忍唔住呼咗兩啖空油添。

話說隔離個位新寫咗車牌，唔通有人租咗？

綁住個頭盔喺後面之後，就着車出發去理工大學。

。





喺西九龍公路一出喺佐敦，但係條爛鳩高鐵地盤搞到亂曬，我都差啲行錯路。

嚟到理工大學，揸咗去一個迴旋處咁嘅凹位，停埋一二邊。

仆街啦，我都無Alice電話，咁我點搵佢？

望一望隻錶，得返幾分鐘就夠六點㗎，唔通我要每個Core去搵咁憨鳩⋯⋯

「鈴鈴～鈴鈴～」無啦啦電話響，仲要係個私人號碼打嚟。





「喂？」

「喂～」咁甜美嘅聲音，一定唔會有錯。

「你係？」

「哼！我把聲都唔記得？明明頭先先約咗我。」電話後嘅Alice故作生氣。

「唔好嬲嬲啦，你依家喺邊度呀？」





「我嚟搵你啦，我嗰度好難搵㗎。」

「咁好啦，我依家喺條樓梯一落嗰個上落客區。」

「咁我知喺邊度啦，我嚟搵你啦～」講完就收咗線。

過多五分鐘，一個熟悉嘅身影喺樓梯行落嚟。

「Hi，等咗好耐呀？」

「唔係呀，你打電話嚟嗰陣我先啱啱到喳嘛。」

「咁我哋行啦。」

「你咁快諗咗去邊啦？」





「係呀。」

「咁請問去邊呢？」

「我哋去粉嶺。」

「粉嶺？」

「係呀，知唔知粉嶺名都喺邊？」

誒，假假地我都識揸678㗎喎，點會唔知喺邊呀，雖然678係唔經粉嶺名都嗰邊嘅，哈哈～

「我知呀。」





「咁我哋行啦，GoGoGo～」

作為一個紳士，幫手戴頭盔哩啲梗係少不免。

。

喺理工大學一出，公主道，窩打老道，獅隧，之後直落吐露港公路，如果揸私家車嘅話就要慢慢塞，不過揸電單車就可以攝車，我都唔知邊到嚟嘅信心喺雙騎同揸大cc啡呤嘅情況下攝車，不過攝車真係快好多。

嚟到粉嶺，無記錯火車站附近好似有骨位，所以兜咗去睇睇。咁啱有個師兄走，咁就泊低架車啦。

「其實你諗住帶我去邊呢？」

「嘿，一陣你咪知～」