《我哋已經到達終點站⋯⋯》: 第二十八章

某一日，我被派去揸102，喺西九龍車廠攞車之後出發去美孚總站。

不過我都好似好耐無揸過102，亦因為咁無乜點去筲箕灣，有啲掛住Alice沖嘅咖啡添。

收工單102去到登打士街，有個熟人上車。

「唔該師傅。」

「咦，好耐無見啦喎。」





無錯我見到Rachel細佬，佢孭住部單反同袋，睇嚟去影車喎。

「係呀。」

「去邊呀？紅隧口？」

話說紅隧口天橋係其中一個影巴士嘅熱門地點，睇住唔同嘅巴士出隧道，用相機紀錄落嚟，不失為一件賞心樂事。

尤其唔少全車身廣告巴士係會派去紅隧線行走，要捕全廣就啱曬。





「你又知嘅？」

「無，我估下啫。」

話咁快就嚟到海底隧道收費廣場，跟住架新記106尾，等佢走咗我就埋站。

「師傅Bye。」

「Bye。」





過咗海之後嘅站都係不斷有人上落，所以無得車手上身，要慢慢碌返總站。

終於返到總站，因為要揸部車返廠，睇嚟無得坐低飲咖啡，襯有少少時間休息，可以買杯咖啡拎走嘅。

去到Alice嘅Cafe，見佢執緊嘢，不過我照推門入去啦。

「Hi。」

「咦，Charlie？好耐無見啦，做咩咁耐無嚟呀～？」言語間透露出驚喜。

「我派唔中102嘛，所以咪少咗嚟～」

「哦～飲咩呀，我請你啦。」

「Latte呀，不過可唔可以幫我沖落個樽？」我拎出放喺袋入面嘅保溫瓶。





「可以呀。」Alice嘅笑容果然無時無刻都能夠殺死人～

喺佢沖緊咖啡嗰陣，我繼續聊佢傾計。

「係呢，你頭先執緊咩呀？」

「我諗住執埋啲嘢就去上堂嘛。」

「咁我咪阻住咗你？」

「唔緊要啦，我預多咗時間，遲少少上車都Ok嘅。」

「咁你去邊度上堂呀？」





「做咩？想接我放學～？」

Alice你唔好露出啲小惡魔般嘅笑容啦，我驚我真係頂唔順㗎。

「你係咪想先～？」哈，我的自信又不知從哪來。

「我⋯我⋯O⋯Ok㗎。」睇嚟Alice都估唔到我答咗個咁奇怪嘅答案而感到怕羞。

「噗！不過你都未講你去邊度上堂。」我好唔爭氣咁笑咗。

「哼！唔講呀！」鼓起泡腮扮嬲嘅Alice真係引死人呀～

「講啦～講啦～」

「Poly呀。」





「哦～咁我車埋你去上堂都仲得。」

「吓？」

「橫掂我收工要揸返架車過海，你跟我車咪得。」

「可以咩？會唔會唔係咁好呀？我可以自己搭102㗎喎。」

「怕咩呀，都無人會理嘅。」

「咁好啦。嗱，你嘅咖啡，我洗一洗埋啲嘢好快。」

好彩收工單有啲時間走盞啫。





。

。

去站長室整少少嘢，就叫埋Alice上車。

「咦，你唔坐下？」Alice無選擇行入去坐，反而企喺我側邊。

「Er⋯Er⋯我坐喺度睇你揸車得㗎啦。」

做咩食螺絲嘅，唔通佢有啲嘢想講？

喺筲箕灣總站開車，可以直上東區走廊，所以唔洗幾耐就去到銅鑼灣。

去到銅鑼灣上紅隧條橋，望落好似幾多車，咁我就兜上杜老誌道天橋，即係當年反咗架118嗰度呢，行巴士線入紅隧應該會快過慢慢塞上橋。

途中Alice都露出一個有口難言嘅樣子出嚟，尤其越來越接近目的地更甚。

「你好似未同我講你幾點放學喎～」我決定嘗試下聊Alice講嘢，等佢放鬆一下。

估唔到我講完之後佢即刻心情好咗好多，仲笑返添。

「6點，我6點放學呀。」Alice好開心咁講。

「咁我6點嚟Poly搵你？」

「好呀好呀。」望住Alice開心笑嘅樣，我自己都會心微笑。

埋站後，我打開前面畀Alice落車。

「嘿，我哋一陣見啦！」頂，Alice你知唔知你真係好得意呀～

「嗯。」

送走Alice後，我揸返架車返西九龍車廠。我見仲有時間，就返咗屋企沖個涼換件衫，順便準備拎埋架戰車出發。