《我哋已經到達終點站⋯⋯》: 第二十五章

見到企都企唔穩嘅娘娘，我唯有抱佢入房休息啦，不過邊間係佢間房？

「喂，邊間係你間房呀？」

佢瞓到不醒人事，我又點會知邊間係佢間房呢，只好每間都睇睇啦。

第一間，開門見到整齊嘅梳妝枱。以我認識嘅娘娘應該無咁整潔嘅，再轉身望望，見到掛喺度嘅Cityflyer恤衫，咁哩間擺明係晴姐間房啦。

第二間，房入面無太多嘅嘢，得一個衣櫃同一張雙人床，再多個床頭櫃，上面放咗盞枱燈。咁應該係主人房啦。





第三間，張書枱亂到咩咁，床上面放咗堆公仔，啲衫亂咁放，包括娘娘啱啱換出嚟套衫。

。

。

。

仲有啲罩亂咁飛亂咁掛⋯⋯





睇嚟哩間係佢間房啦掛。

放低佢喺床上面，我就稍微執執同拎開床上面嘅嘢，等佢唔會整到嗰啲嘢。

以我所知女仔唔落妝就瞓係唔係咁好，所以我就搵缷妝水濕幾舊綿花，幫娘娘輕輕抹下塊面。點解我會知缷妝水喺邊？因為佢乜柒都求鳩其扔喺枱面。

落好妝之後我都係去洗手間拎條毛巾濕少少暖水繼續幫佢抹面，但同時又唔可以整醒佢。

你可能會話你拎錯其他人嘅毛巾咪仆街。放心，洗手間得一條Melody毛巾，我識咗嵐姐咁耐，又點會唔知佢鍾意Melody呢。





之後都係坐喺佢側邊陪住佢，廢事一陣間無人睇住佢會有意外，尤其娘娘依家係醉咗嘅。

過多一陣，我聽到有人開門，咁禮貌上我應該出去打聲招呼。

「細妹！食完執嘢啦，放喺度惹曱甴呀！？」

「Shh⋯⋯」我行出去並叫晴姐細聲啲。

「俊仔？你做咩喺度嘅？」

我一邊收拾好放喺枱上面嘅垃圾，一邊將件事嘅來龍去脈講畀晴姐聽。

「唉，哩個妹又係嘅。」

「算啦，佢返工都好大壓力㗎。」我當然唔會講我係導致娘娘唔開心嘅其中一個因素啦。





「好彩你睇住個妹喳。」

「又唔好咁講。」

「咁你自便啦，我沖涼先，聽日早更晨咁早要去東涌攞車。」

「好，橫掂我聽日放假，我睇住娘娘佢啦。」

「唔該曬～」