二零五零年 – 我女神係暴徒: 第四十七章

「抱…抱歉! 長官! 已經是最快了…!」
 
老豆係呢一刻一定都已經知道左我去緊邊度…我無打算掉個鎖匙扣落車, 因為我知道無論點佢都有方法搵到我。我只係祈求…佢唔好係呢刻再落井下石…唔該你比個寧靜既時間我陪伴係迪儀身邊。
 
我呢個時候做左一個連自己都意想不到既舉動, 我拎出手機…打左比老豆。「嘟…」「喂! 阿仔呀! 你…」電話都未響到第二聲…就已經傳黎老豆把聲。
 
「老豆…我屌你老母! 你做乜撚野呀!! 你咁絕真係走去搞佢細佬…!!! 有冇人性嫁???」我大聲喝老豆既時候…我感覺到部警車飄左一飄, 我都即刻要握番住個扶手。
 
「熊仔…你冷靜D先! 你聽老豆…」
 


「冷你老母呀! 我遲D先同你計…唔該你…當我求下你啦…! 唔好阻住我去搵迪儀, 唔好騷擾我地…! 雖然我唔夠你打…但你再搞我地既話…下次就到你過去葵涌接我…!」 講完我就CUT左老豆線。
 
「長…長官! 張少校說是有緊急任務送你過去的…需…需要聯絡葵涌警區的巡邏編隊在那邊會合你嗎…?」揸車果個警官口震震咁問我…雖然佢應該聽唔明我同老豆講乜, 識廣東話有時都有便利既時候。
 
「我下車之後, 五秒內你們快點消失, 我不要在那附近看到有武警, 不然我叫我爸找你算帳啊!」
 
「報…報告長官! 我們沒有這樣的權限…! 那邊是葵涌區分…」
 
「你自己想想辦法啊! 總之我在那裡不要再看到武警!」
 


「是! 是! 長官!」
 
「牛頭角特務三隊呼叫葵涌大隊! 權限編碼: 丙三六九零零…疏散葵喜街附近武警編隊…! 重覆! 疏散葵喜街附近武警編隊…! 通話完畢。」
 
「葵涌大隊呼叫牛頭角特務三隊! 拒絕指令, 請重覆權限編碼, 剛才的權限編碼無效。通話完畢。」
 
「牛頭角特務三隊呼叫…」
 
呢個時候…通話器響起另一把聲…係李叔叔把聲。
 


「總部情報科呼叫葵涌大隊, 權限編碼: 甲零零一三七, 馬上執行指令。通話完畢。」
 
佢…同我老豆一樣係殺人兇手, 黑警死全家。如果呢個時候有魔鬼現身可以比我用自己條命換黑警冚家剷, 我會無條件答應。
 
「葵涌大隊遵命! 重覆! 葵涌大隊遵命! 通話完畢。」
 
駛過左呈翔道…突然開始落起大雨。雨水啪啪聲咁打落車身上面, 伴隨住一下又一下響亮既打雷聲。望向窗外既事物逐漸比雨水擋得愈來愈模糊…隻眼睇野變得愈來愈浮下浮下咁。
 
咦…? 無理由睇野浮到好似潛緊水咁…我伸手摸向自己塊瞼…咁濕既?…原來…我已經愧疚到再忍唔住自己既眼淚。
 
迪輝係由我害死既。