二零五零年 – 我女神係暴徒: 第四十六章

「校長! 發生什麼事了??」下午4:07√√
 
「總之你快點過來!」下午4:08
 
望住校長一連兩個表示緊急既短訊…事情既嚴重性似乎遠超我想像, 我既直覺話我知…一定係老豆做左D野, 而當我係腦入面嘗試串連起呢兩日發生既事…一定係迪輝出左事…!
 
我係電話簿裡面手指一直向上掃…一路搵迪儀個電話…手指點解咁僵硬既…?! 握住電話既手同時係度震緊…唔好呀…千奇唔好出事啊…! 我輕輕觸碰迪儀個名…隨即傳黎「嘟…嘟嘟…嘟…嘟嘟…」……但最後都無人聽。
 
然後…我轉為打比校長, 校長接電話之後…我由電話傳黎既背景聲裡面, 隱約聽到迪儀既抽泣聲同吶喊聲…隨住一下又一下既喊聲, 我個心就好似比高射炮打一炮一樣, 完全粉碎。
 


校長交帶好我要去既目的地之後…我仍然聽到張少校係度講緊廢話…一直係度講乜野幫佢美言兩句…話佢係細路仔唔識世界?! 我用力由按摩椅彈番起身, 張少校終於停止左佢既廢話廣播。
 
「兄弟…想去洗手間嗎? 在那邊呢! 人來! 帶兄弟去…」
 
我無理佢…我急步行向房既門口, 我要盡快去到迪儀身邊, 我唔可以再係呢度曬時間! 「叮!」大腦裡面既潛意識突然傳黎響聲, 咦? 其實可以最快去到迪儀身邊既方法係…? 方法咪就放左係我眼前囉。
 
我回頭望向張少校, 我唔知我呢一刻臉上既表情係點樣, 但張少校望到我個樣之後…佢失平衡向後跌左落按摩椅個位度。「兄…兄弟?! 沒事吧…?」然後我一步一步行埋去佢度…佢隨即雙手舉起向我伸出兩個「五」既手勢「不要…不要啊!」。
 
印象中我拉住張少校既衣領, 叫佢馬上送我去目的地。然後我既意識就已經再無空閒分配比張少校同其他人。我感覺到我既身體比人搬運左上警車…然後四圍就只有警笛聲同一陣陣既引擎聲。
 


「滴嗚!…滴嗚!…滴嗚!…滴嗚!…滴嗚!」
 
由一陣陣既警車笛聲裡面回過神來…望向車窗外面, 我已經係龍翔道上面飛馳緊。自從老豆退役之後, 我就無坐過上警車, 無估到事隔多年之後…再坐上警車已經無左細細個果陣坐上警車所感受到既自豪感。對我黎講, 呢一刻佢只係一架特快既的士。
 
「前面的車輛立即讓開! 重覆! 立即讓開! 緊急事件! 前面的車輛立即讓開!」
 
望住前面一排既鐵騎開路, 加上警車無間斷發出既警號, 我係平日車來車往既龍翔道上面快速前進。
 
「還沒到嗎? 怎麼這麼久? 你有聽懂我說要盡快嗎?!」我用冷冰冰既語氣質問揸緊車既警官, 雖然我知道佢已經揸得好快, 但我心情好差想搵人發洩下, 特別係呢班無人性既警蓄。